बाँके, (राप्ती सोनारी) :
स्थानीय निर्वाचन नजिक आइरहँदा ‘कस्तो ब्यक्तिलाई छान्ने ? भनेर स्थानीय ६८ वर्षीय खलबहादुर भण्डारीको मनमा अचेल अनेक प्रश्न उठिरहन्छ । अहिले सम्म धेरै जना उम्मेदवार घरमा आएर भोट मागेपनि कस्तो उम्मेदवारलाई जिताउने भन्ने सोच्न भ्याएका छैनन् ।
‘कस्लाई भोट हाल्ने भनेर सोच्न भ्याएको छैन, तर जसले विकास गर्न सक्छ, त्यसलाई नै भोट हाल्ने विचार गरेको छु,’ उनले भने । राप्ती सोनारी गाउँपालिकामा यसपटक कांग्रेस, माओबादी र एमालेबीच कडा प्रतिस्पर्धा हुने उनको बुझाई छ ।
राप्ती सोनारी भौगोलिक रुपले ठुलो र टाढा रहेको गाउँपालिका हो । आसन्न निर्वाचनका लागि कांग्रेसबाट तप्तबहादुर पौडेल, नेकपा (माओबादी केन्द्र)का पट्टु थारु, नेकपा एमालेका रामदास थारु, राष्ट्रिय प्रजातन्त्र पार्टी (राप्रपा)बाट भुपेन्द्र ओली लगायत उम्मेदवार अध्यक्ष पदका लागि प्रतिस्पर्धामा छन् ।
कुल ९ वटा वडा रहेको उक्त गाउँपालिकामा २०७४ सालको निर्वाचनमा कांग्रेसले गाउँपालिका अध्यक्षमा लाहुराम थारु र उपाध्यक्षमा धनीकुमारी खत्रीसहित ५ वटा वडा जितेको थियो । यसपटक चुनावी प्रतिस्पर्धा कांग्रेस, माओबादी केन्द्र र एमालेबीच हुने देखिएपनि कस्ले जित्छ भन्नेमा अहिले नै एकिन गर्न गाह्रो भएको स्थानीय बताउँछन् ।
राप्ती सोनारी ४ बैजापुरका स्थानीय खलबहादुर विगतमा गाउँपालिका अध्यक्षले अगाडी बढाएका विकास योजनालाई निरन्तरता दिन सक्ने ब्यक्ति अब निर्वाचित भएर आउनुपर्ने तर्क गर्छन् । ‘हाम्रो लागि त लाहुरामले पनि राम्रै काम गर्नु भएको थियो, उहाँले टिकट नपाएपनि अब जितेर आउने गाउँपालिका अध्यक्षले विकासका कामलाई निरन्तरता दिनुपर्यो,’ उनले थपे ।
राप्ती सोनारी गाउँपालिकालाई राप्ती नदीले बीचबाट अलग गरिदिएको छ । स्थानीयका अनुसार राप्तीपारी माओबादीको बलियो पकड मानिन्छ, भने राप्तीवारी क्षेत्रमा कांग्रेसको बलियो जनाधार रहेको छ । राप्तीपारी क्षेत्रमा विशेषगरी थारु समुदाय र राप्तीवारी पहाडी समुदायको बढी बसोबास छ । हरेक चुनावमा थारु मतदाता निर्णायक मानिन्छन् । राप्तीपारी र राप्तीवारी दुबै क्षेत्रमा एमालेले पनि आफ्नो बलियो उपस्थिती देखाएको छ ।
२०७४ को निर्वाचनमा दोस्रो स्थानमा आएको एमाले यसपटक जित्ने दाउमा छ । कांग्रेस आफ्नो पुरानै विरासत जोगाउने रणनीतिमा छ, भने विगतमा तेस्रो स्थानमा आएको माओबादी केन्द्र पनि माथी उक्लिने प्रयासमा छ ।
२०७४ को निर्वाचनमा हारेका एमालेका तुलसीराम थारुले यसपटक टिकट पाएनन्, भने २०७४ को निर्वाचन हारेका पट्टुलाई माओबादी केन्द्रले यसपटक पुनः उम्मेदवार बनाएको छ । माओबादी नेता पट्टु २०६४ सालको संविधान सभामा समानुपातिकतर्फबाट सभासद भएका थिए ।
निर्वाचनका सन्दर्भमा खलबहादुरले भनेझै राप्ती सोनारी ४ का अर्का स्थानीय मनिराम थारुको बुझाई पनि उस्तै छ । राप्ती सोनारीमा यसपटक मुख्य प्रतिस्पर्धा कांग्रेस, माओबादी केन्द्र र एमाले बीच नै हुने ठोकुवा गर्छन्, उनी । ‘अहिले चर्चामा कांग्रेसका तप्त पौडेल, माओबादीका पट्टु थारु र एमालेका रामदास थारु हुनुहुन्छ, तर मेरो विचारमा यि तीन जनाबीच कडा प्रतिस्पर्धा हुन्छ,’ उनले भने ।
यो चुनावमा पार्टी, जात र धर्म नहेरी काम गर्ने क्षमतावान ब्यक्तिलाई जनताले भोट दिने मनिराम बताउँछन् । ‘अहिले सम्म जातीयता र भुगोलको नारा कसैले पनि लगाएको छैन, उम्मेदवारी पाइसकेपछि ब्यक्ति हेर्ने, वास्तविक जनताले मागेका विकास पुर्याउन सक्नेलाई यसपटक भोट दिन्छौं,’ उनले थपे ।
निर्वाचित भएर अब आउने ब्यक्तिले पैसा हुँदा हुदैपनि विकास बजेट फ्रिज गराउन नहुने उनको आग्रह छ । यसका साथै बाटो निर्माण र सुकुम्वासीका समस्या समाधान गर्न पहल गर्न सक्ने ब्यक्तिको खाँचो रहेको मनिरामले सुनाए । राप्ती सोनारीका सार्वजनिक चौतारा, चियापसल जस्ता सार्वजनिक स्थानमा अचेल स्थानीय निर्वाचन कै चर्चा–परिचर्चा हुने गरेको छ ।
राप्ती सोनारी ४ बैजापुरस्थित एक चियापसलमा कुम्भर गाउँका नरबहादुर थारु भन्दै थिए, ‘पार्टीभन्दा ब्यक्तिलाई चिन्नुपर्ने कण्डिसन छ अहिले, जो नेता जितेर आएपनि हाम्रो ठाउँको विकास गरिदिने हुनुपर्यो, चाहे जो सुकै पार्टीको किन नहोस्, हाम्रो यत्ति चाहना छ, चुनाव जितेपछि कसैले पनि गद्धारी नगरोस् ।’ जसले चुनाव जितेपनि विकास निर्माण हुनुपर्ने र सबैको साझा जनप्रतिनिधी भएर काम गर्नुपर्ने अधिकांस स्थानीयको सुझाव छ ।
