नेपालगन्ज : छोटो समयमा चर्चा कमाएका नेता मध्ये कमरुद्दिन राई पनि एउटा हुुन् । बोलीमा मिठास अनि जनताको काममा निरन्तर खटिएकै कारण उनी सबैको मन, मस्तिष्कमा बस्न सफल भएका हुन् । बि.सं. २०३४ सालमा नेपालगन्जमा जन्मिएका कमरुद्दिन सरल स्वभावका मात्र नभई असत्यका बिरुद्ध खरो रुपमा उत्रिन्छन् ।
'हुने बिरुवाको चिल्लो पात' भने झैं उनी सानै उमेरदेखी समाजसेवामा लागे । उनी १९ बर्षको उमेरदेखि नै राजनीति सुरु गरे, तर पद र शक्तिको लालच कहिल्यै गरेनन् । लामो समय राजनीति गरे पनि उनी पदभन्दा सेवालाई प्राथमिकतामा राखेर काम गरे । ‘मलाई पदभन्दा बाहिर बसेर जनताको सेवा गर्न औधि रुची लाग्छ,’ उनले भने । पदमा नहुँदा जनताको सेवामा केही समस्या हुने बुझेका उनी अहिले जनता समाजवादी पार्टी नेपालको केन्द्रिय सचिवको जिम्मेवारीमा छन् ।
उनी अहिले गरिव, निमुखा जनताको अधिकार स्थापित गर्ने सपना बोकेर संघीय सांसदको चुनावी प्रतिस्पर्धामा छन् । ‘नीति बनाउने ठाउँमा पुग्ने बित्तिकै मधेसी, मुस्लिम, अल्पसंख्यक, सिमान्तकृति समुदायको अधिकार स्थापित गराउन लाग्छु,’ उनले भने । उनी जिल्ला अध्यक्ष भएका बेला २०६४ र २०७० सालको संविधान सभाको निर्वाचनमा जसपा नेपालका उम्मेदवार विजयी भएका थिए । २०७४ सालको स्थानीय तहको निर्वाचनमा पनि पार्टीका उम्मेदवारले सम्मानजनक जित हासिल गरेका थिए ।
उनी नेपालगन्जमा मात्रै नभैइ समग्र बाँके जिल्लामा एउटा परिचित नाम अनि युवाहरुको रोजाईमा पर्न सफल भएका छन् । ‘मैले अरुको लागि धेरै गरे । अझ धेरै गर्न बाँकी छ । यो ज्यान रहँदासम्म गरिरहन्छु,’ उनले भने । उनी नामका लागि नभई कामका लागि पनि उत्तिकै खारिएका नेता हुन् । ‘म नेता नभई जनताको सेवक भन्न रुचाउँछु,’ उनले भने । दुई दशक बढी समय राजनीतिक यात्राको संघर्षपछि उनी नेपालगन्जको उप-मेयरमा विजयी भए ।
उनी उपमेयरमा विजयी भएपछि पनि पदको घमण्ड कहिलै गरेनन् । गरिव होस् या अमिर सबैलाई समान व्यवहार गरेका उनी निकट र बिकटको व्यवहार देखाएनन् । ‘उपमेयर हुँदा कमरुद्धिन राईले कहिलै काखा पाखा गरेको देखेनौ,’ नेपालगन्ज-२० का शिवकुमार बर्माले भने । उनको शालिन व्यवहारले अन्य पार्टीमा आस्था राख्ने र फरक बिचार भएकाहरुले पनि साथ दिएका छन् ।
नेपालगन्जको विकास र सेवामा प्रत्यक्ष जोडिएका राईले मुस्लिम समुदाय मात्र नभई समग्र बाँके क्षेत्र नम्बर २ को विकासमा होमिने योजना बनाएका छन् । उनको प्राथमिकतामा जहिले पनि महिला, बालबालिका युवा अनि उनीहरुले पाउने शिक्षाको विषय नै रह्यो । यसका साथै राज्यद्वारा पछाडि पारिएका समुदायको अधिकारको विषय नै उनको राजनीतिक जीवनको एउटा अभिन्न अंग बनेको छ । ‘जनताको काममा दिन रात खटिने छु । चुनावी नारा अनि प्रतिवद्धतालाई पूरा गर्न कुनै कसुर बाँकी राख्ने छैनन्,’ उनले भने ।
