नेपालगन्ज : केही कमी कमजोरीका बीच समग्रमा स्वच्छ र निष्पक्ष रुपले प्रतिनिधि सभा निवाृचन सम्पन्न भएको बाँकेस्थित सम्वद्ध सरोकारवालाले जोड दिएका छन् । बेसको ब्यवस्थापनमा संवाद समुह लुम्बिनी प्रदेशले आइतबार नेपालगन्जमा आयोजना गरेको समिक्षात्मक संवादका क्रममा सरोकारवालाले यस्तो कुरामा जोड दिएका हुन् ।
संवाद समुह लुम्बिनी प्रदेशका वरिष्ठ सहजकर्ता सुशिल बस्नेतले सहजीकरण गरेको उक्त कार्यक्रममा बोल्ने सरोकारवालाले निर्वाचनमा कतिपय मतदान केन्द्र अपांगतामैत्री नभएको, मतदान केन्द्र आयोगको मापदण्ड अनुसार तयार नभएको, मतदान केन्द्र टाढा हुँदा कतिपय मतदाताहरु मतदान गर्न जान नसकेको, मतदान केन्द्रमा गोपनियतालाई ध्यान नदिइएको, मतदान केन्द्र र वरिपरीका स्थानमा सुरक्षाकर्मीले आचार संहिताका नाममा पिउने पानी ल्याउनमा समेत बन्देज लगाएको, पत्रकार र निर्वाचन पर्यवेक्षकले सबै ठाउँमा निर्वाध रुपमा रिपोर्टिङ गर्न नपाएको, निर्वाचनका क्रममा उम्मेदवारले आचार संहितालाई पूर्ण रुपले पालना नगरेको, निर्वाचन सम्पन्न भएपछि उम्मेदवारले पेश गरेको खर्च विवरण अपत्यारिलो देखिएको जस्ता विषयलाई उठाएका छन् ।
सो क्रममा बाँकेका सहायक प्रमुख जिल्ला अधिकारी पूर्णबहादुर खत्री, राष्ट्रिय मानव अधिकार आयोग नेपालगन्जकी प्रमुख द्धारिका अधिकारी, अग्रज कानुन ब्यवसायी प्रह्लाद बहादुर कार्की, एड्भोकेसी फोरमका बसन्त गौतम, राष्ट्रिय स्वतन्त्र पार्टीका प्रतिनिधि बुद्धिसागर सुवेदी, नेपाली कांग्रेसकी उमा थापामगर, नेकपा एमालेका भाष्कर काफ्ले, राप्रपाका हुकुम केसी, बासका निर्देशक नमस्कार शाह, पत्रकार महासंघ बाँकेका अध्यक्ष नवीन गिरी, गैसस बाँकेका कार्यबाहक अध्यक्ष मनबहादुर भण्डारी, पत्रकार अर्जुन ओली, मधु पौडेल, अर्जुन सुवेदी लगायतले निर्वाचनबारे आफ्नो अनुभव र सुझाव राखेका थिए । संवाद समुहका शुक्रऋषि चौलागाईले स्वागत गरेको कार्यक्रममा भावुक योगीले हालै सम्पन्न निर्वाचनको प्रतिवेदन प्रस्तुत गरेका थिए ।
