कोहलपुर : कोहलपुर नगरपालिकाको १२ औं नगरसभाले दुईवटा विद्येयक पारित गरेको छ । सभाले अन्य सार्वजनिक महत्वका एक दर्जन जति प्रस्ताव पनि स्वीकृत गरेको छ ।
नगर प्रमुख पूर्णप्रसाद आचार्यले प्रस्तुत गरेको प्रस्तावलाई नगरसभाले शुक्रबार सर्वसम्मत रुपमा पारित गरेको हो । गत पुष २९ गते बसेको पहिलो बैठकमा नगर प्रमुख आचार्यले कोहलपुर बाङ्मय प्रतिष्ठान विद्येयक-२०७९ र सार्वजनिक स्थानीय निकायबाट समायोजन भएका स्थायी कर्मचारीलाई प्रोत्साहन सुविधा उपलब्ध गराउने सम्बन्धमा व्यवस्था गर्न बनेको विद्येयक-२०७९ पेश गरेका थिए ।
नगरपालिकाको बजेट, योजना तथा कार्यक्रम संशोधन, नगरपालिकाको संगठन संरचनामा हेरफेर, लिजाको नतिजा २०७८/०७९, अर्धवार्षिक प्रगति समिक्षा प्रतिवेदन २०७८/०७९ लगायत सार्वजनिक महत्वका बिषय पनि बैठकमा पेश गरेका थिए ।
ती विद्येयक र सार्वजनिक महत्वको बिषयसँगै प्रस्ताव गरिएका थप ७ वटा सार्वजनिक सरोकारका प्रस्ताव पनि बैठकले पारित गरेको प्रमुख प्रशासकीय अधिकृत टिकाराम ढकालले जानकारी दिए । यातायात व्यवस्था कार्यालय बाँकेको ट्रायल सेन्टर कोहलपुरमा भएकाले यातायात कार्यालय पनि कोहलपुरमा स्थापना गर्न प्रदेश सरकारलाई अनुरोध गर्ने, कोहलपुर नगरपालिका तथा अखिल नेपाल फुटवल संघ (एन्फा) बीच भएको सहमती अनुसार नगरपालिकामा फुटवल एकेडेमी तत्काल संचालनका लागि एन्फा लगायतसँग पुनः अनुरोध गर्ने लगायत रहेको छ ।
नगर सभामा उपप्रमुख संगिता सुवेदीले नगरपालिकाले सुरु गरेको नीतिगत सुधार र सुशासनको परिणाम देखिन थालेको बताइन् । बैठकमा नगरपालिकाका प्रवक्ता एवम् नगरसभा सदस्य नमबहादुर आले, सदस्यहरु बीरेन्द्रकुमार शाह, लालबहादुर राना, हरि कठायत, माधवप्रसाद रिजाल, भीमप्रसाद पौडेल र इश्वरी बिक लगायतले बोलेका थिए ।
