नेपालगन्ज : खानेपानी मन्त्री अब्दुल खानले देशको आर्थिक समृद्धिमा खानेपानीले योगदान दिन सक्ने बताएका छन् । जनमत पार्टी नगर कमिटीले शनिबार नेपालगन्जमा आयोजना गरेको पत्रकार भेटघाटमा बोल्दै उनले नेपालका खोला नालाबाट ‘मिनरलयुक्त’ स्वच्छ पानी त्यसै बगिरहेकाले त्यसलाई उपयोग गर्न सकिने धारणा राखे ।
‘मिनरलयुक्त’ स्वच्छ पानी बगिरहेकाले त्यसलाई बजारीकरण गर्न सकेको खण्डमा बाहिरका देशमा पुर्याउन सकिने र देशको आर्थिक समृद्धिमा पानीले योगदान दिन सक्ने मन्त्री खानले जोड दिए । उनले भने, ‘हाम्रो देशभित्र यति धेरै नदी र झरनाबाट पानी बगिरहेको छ, केही गर्न नसकेपनि खाडी मुलुकमा मात्रै नेपालको पानी निर्यात गर्न सक्यौ भने हाम्रो देशको हितमा धेरै ठुलो योगदान हुन सक्छ ।’
भिडियो हेर्नुस् :
जनतालाई स्वच्छ खानेपानी पुर्याउने आफ्नो नैतिक जिम्मेवारी रहेको खानले बताए । नागरिकले स्वच्छ खानेपानी पिउन पाउने अधिकार संबिधानमै ब्यवस्था भएकाले यसतर्फ सचेत हुँदै मन्त्रालयले अनवरत रुपमा काम गरिरहेको दाबी गरे ।
‘स्वच्छ पानी पिउन पाउनु प्रत्येक नागरिकको हक हो भनेर संबिधानमा ब्यवस्था छ,’ उनले भने ‘यो जनताको मौलिक हक भएको कारणले गर्दा म यसको लागि अनवरत रुपमा काम गर्दैछु ।’ खानेपानी मन्त्रालय अन्तगतका निकायले जनतालाई कुनैपनि अप्ठ्यारो नपारी, राजनीतिकरण नगरी घर-घरमा स्वच्छ खानेपानी पुर्याउनु कर्तब्य भएको बताए ।
आफु एक/डेढ वर्ष मात्रै मन्त्रालयमा बस्न पाएमा काठमाडौं उपत्यकामा पानीको अभाव अन्त्य गर्ने दाबी गरे । यस्तै दुई देखी तीन वर्ष बस्न पाएमा तराई मधेसका सम्पूर्ण जिल्लामा आर्सिनिक न्युनिकरण गरेर स्वच्छ खानेपानी पुर्याउने लक्ष्य रहेको बताए । उनले भने, ‘यदी म मन्त्रालयमा चार वर्ष बस्न पाए भने पहाड र हिमालका जनतालाई म स्वच्छ पानी पुर्याउँछु, यदी म मन्त्रालयमा पाँच वर्ष बस्न पाए भने देशको पानी विदेशमा निर्यात गर्ने मेरो योजना छ ।’
यसका लागि विभिन्न निकाय, अन्र्तराष्ट्रिय स्तरका दातृ संस्थासँग एक चरणमा परामर्श गरिसकेको बताए । सन् २०३० सम्म नेपालमा स्वच्छ खानेपानी जनताको घर-घरमा पुर्याउने अन्र्तराष्ट्रिय स्तरमा गरेको हस्ताक्षर अनुसार काम गर्ने प्रतिवद्धता जनाए ।
पत्रकार भेटघाटका क्रममा जनमत पार्टीका युवा नेता तेजनारायण कँडेल, जनमत पार्टीका नगर अध्यक्ष शुभम गुप्ता, महिला संगठनका अध्यक्ष रेखा झा, नेपाल खानेपानी संस्थानका अध्यक्ष गुनाखर भुसाल लगायतको उपस्थिती रहेको थियो ।
