नेपालगन्ज : लुम्बिनी प्राविधिक विश्वविद्यालयले ‘बिटेक इन सिएस एण्ड एआई’ र ‘बिटेक इन आईटी’ अध्ययन गर्न लागेका बिद्यार्थीलाई अभिमुखिकरण गरेको छ । नेपालगन्जमा बुधबार औपचारिक कार्यक्रम गरेर विश्वविद्यालयमा भर्ना भएका बिद्यार्थीलाई अभिमुखिकरण गरेको हो ।
विश्वविद्यालयले यही मंसिर २० गतेदेखी नियमित रुपमा पठन पाठन सञ्चालन गर्ने तयारी गरेको छ ।विश्वविद्यालयका उपकुलपति प्रा.डा. विनोदप्रसाद ढकाल, विश्वविद्यालय सेवा आयोगका विज्ञ सदस्य प्रा.डा. कृष्णप्रसाद घिमिरे, लुम्बिनी प्रदेश मुख्यमन्त्री तथा मन्त्रीपरिषद कार्यालयका प्रदेश सचिव सुमन घिमिरे, विश्वविद्यालयका कुल सचिव (रजिष्टार) रेगबहादुर भण्डारी र डिन डा. किर्ति कुसुम जोशीले बिद्यार्थीलाई अभिमुखिकरण गरे ।
अभिमुखिकरण गर्दै उपकुलपति प्रा.डा. ढकालले विश्वविद्यालयलाई अगाडी बढाउन आफुहरुले स्थापनाकालदेखी नै मेहेनत गर्दै आएको बताए । गुणस्तरिय प्राविधिक शिक्षा प्रदान गर्नका लागि लुम्बिनी प्रदेश सरकारले आफ्नो गौरवको योजना अन्तरगत यस विश्वविद्यालय स्थापना गरेको उनले प्रष्ट्याए ।
लुम्बिनी प्राविधिक विश्वविद्यालयले समयमै कोर्स पुरा गर्ने, समयमा नतिजा दिने, विश्वविद्यालयभित्र राजनीतिक गतिविधिलाई निषेध गर्ने र बिद्यार्थीलाई ब्यवहारिक शिक्षामा जोड दिने उपकुलपति ढकालले बताए । बिद्यार्थीलाई देश तथा विदेशका विभिन्न विश्वविद्यालयमा लगेर शैक्षिक, प्रयोगात्मक तथा अनुसन्धान गतिविधीमा सामेल गराउने उनको भनाई छ ।
विश्वविद्यालय सेवा आयोगका विज्ञ सदस्य प्रा. डा. घिमिरेले ब्यवहार उपयोगी शिक्षा आवश्यक रहेकोमा जोड दिदै लुम्बिनी प्राविधिक विश्वविद्यालयले सोही शिक्षालाई सिकाउन प्रयत्न गर्ने बताए ।
यस्तै प्रदेश सचिव घिमिरेले सैद्धान्तिकभन्दा प्रयोगात्मक शिक्षा प्रभावकारी हुने बताए । प्राविधिक शिक्षाको माग विश्व बजारमा धेरै भएको अवगत गराउँदै उनले भने, ‘आईटी क्षेत्रले धेरै फड्को मारेको हुँदा यसको माग धेरै छ, र पढेको ब्यक्ती आफ्नो खुट्टामा उभिन सक्छ ।’ प्रदेशभित्रका संघ, संस्था तथा कार्यालयमा विश्वविद्यालयका बिद्यार्थीलाई ईन्टर्नसिप गर्न लगाउने बताए ।
यसैगरी कुल सचिव (रजिष्टार)भण्डारीले स्वागत गर्दै आफ्नै देशमा दक्ष जनशक्ती उत्पादन गर्नु विश्वविद्यालयको उद्धेश्य रहेको बताए । विश्वविद्यालयका पहिलो 'ब्याच'का बिद्यार्थीलाई अवसर र चुनौती दुबै हुने बताए ।
विश्वविद्यालयका डिन डा. जोशीले एउटा कार्यक्रममा २४ जना बिद्यार्थीलाई शिक्षण गरिने जानकारी दिए । उनका अनुसार अहिले पहिलो चरणमा दुई वटा कार्यक्रमका लागि ४८ जना बिद्यार्थी भर्ना छन् । बिद्यार्थीलाई छात्रवृत्तिको समेत ब्यवस्था गरिएको उनले बताए ।
बिद्यार्थीको पठन पाठनका लागि आंशिक र पूर्णकालिन प्राध्यापक नियुक्त गरिएको जानकारी दिए । विश्वविद्यालयमा भर्ना भएका बिद्यार्थीले आफ्नै देशमा प्राविधिक शिक्षा लिन पाउँदा खुसी लागेको प्रतिक्रिया दिएका छन् । उनीहरुले प्राविधिक शिक्षाका लागि अब विदेश जानु नपर्ने बताएका छन् ।
आफ्नै देशको विश्वविद्यालयमा गुणस्तरीय प्राविधिक शिक्षा लिन पाउँदा बिद्यार्थीहरु उत्साहित छन् । गुणस्तरिय लुम्बिनी प्रदेशको विभिन्न जिल्लाबाट अध्ययनका लागि बिद्यार्थी यहाँ आएका छन् ।
