बाँके (डुडुवा) : डुडुवा गाउँपालिका अध्यक्ष नरेन्द्रकुमार चौधरीले गाउँसभामा विवाद झिक्नुको कुनै कारण नभएको बताएका छन् । गाउँपालिकाको १५ औँ गाउँ सभामा बिहीबार गणपुरक संख्या नपुगेर स्थागित भएको थियो । एमाले निकट जनप्रतिनिधिले सभा बहिष्कार गरेपछि बैठकमा गणपुरक संख्या अपुग भएको थियो ।
गाउँपालिका कार्यालय वनकट्टीमा शुक्रबार पत्रकार भेटघाट गर्दै अध्यक्ष चौधरीले गाउँसभा बहिष्कार गर्ने पक्षको वास्तविक समस्या आफुले बुझ्न नसकेको प्रष्ट्याए । ‘उहाँहरुको पीडा के हो बुझ्न मैले सकेको छैन, पेटको समस्या हो की, के को समस्या हो,’ उनले भने ‘म उहाँहरुसँग छलफल गर्छु ।’
संवादको माध्यममार्फत समस्याको निकास खोज्ने अध्यक्ष चौधरीले बताए । उनले अगाडी थपे, ‘संवाद बाहेक यसको कुनै निस्कर्ष नै छैन, जो संवादमा आउँछ, त्यो सँग संवादमा बस्ने हो, बिस्तारै बिस्तारै उहाँहरु संवादमा आउनु हुन्छ ।’
भिडियो रिपोर्ट हेर्नुस् :
गाउँसभा बहिष्कार गरेका एक जना वडा सदस्य आफ्नो सम्पर्कमा आएको अध्यक्ष चौधरीले सुनाए । ‘हामीले हाम्रा मालिकलाई कसरी बढी सेवा दिन सक्छौं, हामीले त्यो सोच्नुपर्ने हुन्छ,’ उनले भने । सभा बहिष्कार गर्ने पनि सिस्टम र पद्धती हुने भन्दै अध्यक्ष चौधरीले रोडमा आगो तापेर या चिया खाएर बहिष्कार गर्यौं भन्नेलाई आफुले केही भन्न नसक्ने बताए ।
‘बहिष्कार भनेको त के हो भने सभामा आएर आफ्नो मत राख्ने हो, आफ्नो कुरा राखेर यो नीति खराब हो, यो कार्यक्रम खराब हो भन्ने हो, यो कार्यक्रम कुनैपनि हालतमा लागु भयो भने जनताको बर्खिलापमा हुन्छ भन्ने हो, अनि त्यसमा चित्त बुझेन भने नाराबाजी गरेर बाहिर जाने हो,’ चौधरीले भने ‘रोडमा आगो तापेर, चिया खाएर यो कार्यक्रम बहिष्कार गर्यौं भन्नेलाई के भन्ने ? मेरा मालिक त कति सोझा छन्, यही नोकरलाई रुचाएका छन् ।’
आफुले गाउँपालिकाको नेतृत्व सम्हालेपछि थुप्रै लोकप्रिय काम गरेको उनले सुनाए । नेपालका स्थानीय तहले नगरेका कतिपय काम डुडुवामा भएको अध्यक्ष चौधरीको भनाई छ । पत्रकार भेटघाटमा उपाध्यक्ष साहिदा बानो, जनता समाजवादी पार्टी(जसपा) निकट वडाअध्यक्ष लगायतको उपस्थिती रहेको थियो ।
यो पनि पढ्नुस् :
गणपुरक संख्या नपुगेपछि डुडुवाको गाउँसभा स्थगित
