नेपालगन्ज : नेपालगन्जमा बिहीबारदेखी ट्राफिक सप्ताह सुरु गरिएको छ । सडक अनुशासन तथा सवारी दुर्घटना न्यूनिकरणका लागि लुम्बिनी प्रदेश प्रहरी कार्यालय, राजमार्ग सुरक्षा तथा ट्राफिक ब्यवस्थापन कार्यालय बुटवल र जिल्ला प्रहरी कार्यालय बाँकेको सहकार्य तथा नेपालगन्ज उपमहानगरपालिका र कोहलपुर नगरपालिकाको आयोजनामा ट्राफिक सप्ताह सुरु गरिएको हो ।
भिडियो रिपोर्ट हेर्नुस् :
उक्त सप्ताहको धम्बोझी चोकमा कार्यक्रमका प्रमुख अतिथी तथा उपप्रधान एवम् गृहमन्त्री नारायणकाजी श्रेष्ठले औपचारिक रुपमा उद्घाटन गरेका छन् । कार्यक्रमलाई सम्बोधन गर्दै श्रेष्ठले भने, ‘एउटा कुनै पक्षले मात्रै यसको समाधान गर्न सक्दैन, सवारी मार्ग, सडकको गुणस्तर, सवारी साधनको गुणस्तर, साथ साथै सवारी चालक, यात्रुको चेतना र अनुशासनको स्थिती, ट्राफिक प्रहरीको ऐन नियम लागुगर्ने प्रतिवद्धता र सक्रियताबाट मात्र सकारात्मक परिवर्तन ल्याउन सक्छौं ।’ सरकारले ट्राफिक सप्ताहमार्फत मुख्य त ट्राफिक नियमको जानकारी गराउने र यो सडक दुर्घटनाको कारण जानकारी गराउने र त्यसबाट बच्नको निम्ति ट्राफिक अनुशासन कायम गर्ने नै मुख्य पक्ष हुन आउने बताए ।
सो क्रममा राजमार्ग सुरक्षा तथा ट्राफिक ब्यवस्थापन कार्यालय बुटवलका प्रमुख(एसपी) श्यामबहादुर खत्रीले सरोकारवाला निकाय, चालक, सडक प्रयोगकर्ता, आम सर्बसाधारण लगायतले मर्यादित र सचेत भएर ट्राफिक नियम पालना गर्ने हो भने अनपेक्षित दुर्घटनाबाट बच्न सकिने बताए । ‘यही अभियानलाई सार्थक पार्न सुरु भएको ट्राफिक सप्ताहलाई विभिन्न कार्यक्रमका साथ मनाइनेछ,’ उनले भने ।
जिल्ला ट्राफिक प्रहरी कार्यालय बाँकेका प्रमुख(प्रहरी निरीक्षक) गोपिकृष्ण सुवेदीका अनुसार ट्राफिक सप्ताहभरी पैदल यात्रीलाई जेब्रा क्रसिङमा बाटो काट्ने तरिका सिकाउने, ओभर स्पिड र ध्वनी नियन्त्रण, क्षमताभन्दा बढी यात्रु बोक्ने सवारी चेकजाँच गर्ने, सवारी साधनको यान्त्रिक परिक्षण, सवारी चालकको स्वास्थ्य परिक्षण र पर्चा पप्पलेट वितरण, ट्राफिक सिंग्नलको प्रयोग गर्न प्रशिक्षण, समुदाय तथा बिद्यालय स्तरमा सचेतनामुलक कार्यक्रम लगायत गरिनेछ ।
कार्यक्रममा लुम्बिनी प्रदेशका गृहमन्त्री सन्तोषकुमार पाण्डेय, लुम्बिनी प्रदेशका शहरी विकास मन्त्री कृष्णा केसी, प्रदेश सांसदद्धय मिना श्रेष्ठ र अम्बिका काफ्ले, गृह मन्त्रालयका सचिव दिनेश भट्टराई, नेपाल प्रहरीका महानिरीक्षक बसन्तबहादुर कुँवर, सशस्त्र प्रहरी महानिरीक्षक राजु अर्याल, लुम्बिनी प्रदेशका प्रहरी प्रमुख(डिआईजी) कुवेर कडायत लगायतको उपस्थिती रहेको थियो । ट्राफिक सप्ताह उद्घाटन गर्नुअघि स्थानीय विपी चोकबाट धम्बोझी चोकसम्म बृहत रुपमा प्रभातफेरी निकालिएको थियो । प्रभातफेरीमा उपस्थित भएकाले ब्यानर तथा प्लेकार्ड बोेकेका थिए ।
