नेपालगन्ज : नेपाली कांग्रेस लुम्बिनी प्रदेशका सभापति अमरसिंह पुनले लुम्बिनी प्रदेशमा मन्त्रालयको संख्या नबढाउन कांग्रेसले दिएको सुझावलाई सत्तारुढ दलले लत्याएको आरोप लगाएका छन् । नेपाल प्रेस युनियन लुम्बिनी प्रदेशले प्रकाशन गरेको भित्तपात्रो विमोचन कार्यक्रमलाई नेपालगन्जमा शुक्रबार सम्बोधन गर्दै प्रमुख अतिथी समेत रहेका पुनले लुम्बिनी प्रदेश सरकारले जनताका पैसामा मनपरी गरेको बताए ।
‘लुम्बिनी प्रदेशमा मन्त्रालयको संख्या घटाउन कांग्रेसले ध्यानाकर्षण गराएको हो, तर अहिलेको सरकारले सत्ता टिकाउनलाई मन्त्रालयको संख्या थप्यो, प्रदेश सरकार मनपरी ढंगले चलिरहेको छ,’ उनले भने । पद बाँड्नलाई राज्य कोषबाट पैसा हिनामिना गर्ने छुट कसैलाई नभएको सभापति पुनले चेतावनी दिए ।
प्रमुख प्रतिपक्ष दल भएपछि प्रदेश संसदभित्र कांग्रेसले विकृति विरुद्ध जोडदार रुपले आवाज उठाउन नसकेको सभापति पुनको भनाई छ । ‘कतै पछि मन्त्री बन्न पाइएला, झण्डा हल्लाउँला भन्ने आशाले हाम्रा सांसदहरु बस्नु भएको छ की भन्ने लागेको छ,’ उनले भने । अर्को प्रसंगमा पुर्वमन्त्री समेत रहेका पुनले सहकारी काण्डका विषयमा संसदिय छानविन समिति बनाउनमा एमाले बढी आत्तिएको बताए ।
‘देशभरका सहकारी संस्थामा एमालेका ९० प्रतिशत कार्यकर्ता संलग्न छन्, कतै समिति बन्यो भने हाम्रा कार्यकर्तालाई जोगाउन सकिदैन कि भन्ने डरले गर्दा एमाले पहिल्यै झस्किएको हुनुपर्छ, त्यही भएर जो ब्यक्ति सहकारी काण्डमा मुछिएको छ, त्यो भन्दा बढी आक्रामक एमाले बनेको छ,’ सभापति पुनले भने ।
उक्त कार्यक्रममा विशिष्ट अतिथी एवम् नेपाल प्रेस युनियनका केन्द्रिय अध्यक्ष शिव लम्साल, कांग्रेस बाँकेका सभापति नारायणप्रसाद गौडेल, युनियनका वरिष्ठ उपाध्यक्ष प्रेम केसी, सामुदायिक रेडियो प्रशारक संघ (अकोराव) का केन्द्रिय अध्यक्ष अर्जुन गिरी, पत्रकार महासंघ बागमती प्रदेशका अध्यक्ष शिव देवकोटा, महासंघ बाँकेका अध्यक्ष दामोदर भण्डारी, युनियन बाँकेका अध्यक्ष प्रियास्मृति ढकाल लगायतले पनि मन्तब्य राखेका थिए ।
युनियन लुम्बिनी प्रदेशका कार्यबाहक अध्यक्ष जयसिंह केसीको सभापतित्वमा सम्पन्न विमोचन कार्यक्रममा स्वागत मन्तब्य सदस्य गौरव गिरीले गरेका थिए, भने सञ्चालन महासचिव नविन गिरीले गरेका थिए ।
