नेपालगन्ज : नेपालगन्जमा रहेको कान्ति तालको अस्तित्व जोगाउन बिद्यार्थीहरुले आग्रह गरेका छन् । ‘प्राकृतिक सिमसार’ क्षेत्रका रुपमा रहेको नेपालगन्ज उपमहानगरपालिका वडा नम्बर २१ र २२ मा रहेको उक्त तालको अस्तित्व नै मेटिने गरी मोटर बोट सञ्चालन गर्न खोजिएपछि बिद्यार्थीले यस्तो आग्रह गरेका हुन् ।
नेपालगन्जस्थित ब्रिटिस इंगलिस बोर्डिङ स्कुलमा अध्ययनरत ‘इको क्लब’ का बिद्यार्थीले आइतबार कान्ति ताल क्षेत्रमै पुगेर तालको अस्तित्व नमेटाउन आग्रह गरे । ‘कान्ति ताल प्राकृतिक सिमसार हो, प्राकृतिक सिमसारलाई बचाउने हामी सबैको दायित्व हो,’ ब्रिटिस इको क्लबका अध्यक्ष जयन्द्र शाहीले भने ‘प्राकृतिक सिमसारलाई हाम्रो पुस्ताले देख्न पाउनु पर्छ ।’
कान्ति ताल प्राकृतिक रुपमा ‘बरदान’ नै भएको उनले बताए । इको क्लबका बिद्यार्थीले प्राकृतिक सिमसार बचाउनुपर्ने लगायत विभिन्न कुरा लेखिएका प्लेकार्ड समेत बोकेका थिए । बिद्यार्थीलाई प्राकृतिक सम्पदाको महत्व, आवश्यकता जस्ता विषयमा अतिरिक्त जानकारी दिने उद्देश्यले उक्त स्कुलमा विगत केही वर्षदेखी इको क्लब क्रियाशिल छ ।
बिद्यार्थीलाई समय–समयमा प्राकृतिक सम्पदाको अध्ययन तथा अवलोकन गराएर अतिरिक्त ज्ञान दिने गरिएको बिद्यालयका प्राधानाध्यापक एवम् हरित अभियन्ता हेमन्तराज काफ्लेले बताए । ‘हाम्रो स्कुलको इको क्लब एकदमै सक्रिय छ, हामीले बेला–बेलामा बिद्यार्थीलाई प्राकृतिक सम्पदाको अवलोकन गराउँछौं,’ उनले भने ‘यसबाट उनीहरुले धेरै कुराहरु सिक्छन् ।’ क्लबमा कक्षा ५ देखी १० सम्मका बिद्यार्थीहरु सदस्य रहेको प्रधानाध्यापक काफ्लेले बताए ।
कान्ति तालको अस्तित्व नै मेटिने गरी मोटरबोट सञ्चालनको तयारीको चौतर्फी रुपमा बिरोध भइरहेको छ । २५ विघा क्षेत्रफलमा फैलिएको उक्त तालमा ठेकेदारले मोटरबोट चलाउने तयारी गरेपछि चराको दुर्लभ चराको बासस्थान संकटमा परेको छ, भने प्राकृतिक सिमसार नै नासिने खतरा बढेको छ ।
उक्त तालमा माछा पालन लगायत गतिविधि गर्नका लागि उपमहानगरपालिका कार्यालयले २०७८ सालमा स्थानीय ठेकेदार फनबहादुर गुरुङलाई १० वर्षका लागि जिम्मा दिएको थियो । ठेकेदारले यसअघि तालमा माछापालन गर्दै आएकोमा यसवर्षबाट मोटरबोट चलाउन खोजेपछि बिरोध भएको हो । प्राकृतिक सिमसार क्षेत्रको अस्तित्व नै मेटाउने गरी कान्ति तालमा मोटरबोट सञ्चालन भएमा दुर्लभ चरासहित त्यहाँ आश्रय लिइरहेका जीव, जन्तुको बासस्थान तथा वनस्पती लोप हुने निश्चित रहेको यहाँका संरक्षणकर्मी बताउँछन् ।
