देउखुरी : लुम्बिनी प्रदेशमा थपिएका तीनजना मन्त्रीहरूले बिहीबार (आज) शपथग्रहण गर्दै पदभार ग्रहण गर्न लागेका छन् । मुख्यमन्त्री चेतनारायण आचार्यले नेपाली कांग्रेसबाट २ र जनता समाजवादी पार्टीबाट एकजना मन्त्रीलाई बुधवार आफ्नो क्याबिनेटमा थपेका हुन् ।
कांग्रेसबाट जन्मजय तिमिल्सिना र देवकरण कलवार तथा अशोक राई नेतृत्वको जसपाबाट आदेश कुमार अग्रवाललाई उनले मन्त्री नियुक्त गरेका हुन् । थपिएका तीनैजना मन्त्रीको शपथ आज हुँदैछ। उनीहरूलाई प्रदेश प्रमुख कृष्ण घर्तीले शपथ ग्रहण गराउने छन् ।
बर्दियाबाट निर्वाचित कांग्रेसका तिमिल्सिनालाई सामाजिक विकास मन्त्रालयको जिम्मेवारी दिइएको छ भने नवलपरासीबाट निर्वाचन कलवारलाई वन तथा वातावरण मन्त्रालयको जिम्मेवारी दिइएको छ। यसअघिका मन्त्री बादशाह कुर्मीले राजीनामा दिएपछि वन मन्त्रालय रिक्त रहेको थियो ।
यसैगरी जसपाका अग्रवाललाई आन्तरिक मामिला तथा कानुन मन्त्रालयको जिम्मेवारी दिइएको लुम्बिनी प्रदेशका उद्योग, पर्यटन तथा यातायात मन्त्री प्रचण्ड विक्रम न्यौपानेले जानकारी दिए । कांग्रेसबाट मन्त्री नियुक्त भएका तिमिल्सिना पहिलो चरणमै मन्त्री बन्ने सुचीमा थिए । तर उनलाई अन्तिम समयमा शपथ खुवाइएको थिएन ।
पहिलो चरणमा मन्त्री बन्नबाट पछाडि पारिएका तिमिल्सीना मन्त्री बन्ने दौडमै थिए । सरकारमा बुधबार तीन मन्त्री थपिए पनि मन्त्री परिषद्ले पूर्णता भने पाएको छैन। प्रदेशमा एक मन्त्रालय अझै रिक्त छ। अहिले ११ सदस्यीय मन्त्री परिषद् बनेकोमा यो प्रदेशमा १२ मन्त्रालय हुन् ।
अहिले प्रदेशमा युवा तथा खेलकुद मन्त्रालय रिक्त रहेको छ । यो मन्त्रालय साना दलहरूलाई दिने तयारी मुख्यमन्त्रीको छ । तर मन्त्रालयमा दाबी गरिरहेका नागरिक उन्मुक्ति र लोसपाबाट कसलाई सरकारमा सहभागी गराउने भन्ने विषयमा मुख्यमन्त्री अनिर्णीत छन् । बुधबार लामो प्रयास पछि मुख्यमन्त्री तीन मन्त्री नियुक्त गर्न सmल भए ।
मूलतः कांग्रेसबाट मन्त्री बन्ने आकाङ्क्षीहरू बढी भएका कारण कांग्रेसले मन्त्री बन्नेहरूको नाम टुंगो लगाउन सकेको थिएन । लामो प्रयास पछि कांग्रेसले आफ्नो दलबाट मन्त्री बन्ने दुई जनाको नाम टुंगो लगाएर मुख्यमन्त्री आचार्यलाई बुझाएको थियो ।
