नेपालगन्ज : नेपाली कांग्रेसका नेता डा. मिनेन्द्र रिजालले उपनिर्वाचनमा खासै ठुलो क्षति नभएको बताएका छन् । पार्टीलाई अनुमान गरेको भन्दा कांग्रेसले कम मत प्राप्त गरेपनि चित्त बुझाउने अवस्था रहेको उनको भनाई छ ।
नेपाल प्रेस युनियन बाँकेले शुक्रबार नेपालगन्जमा आयोजना गरेको पत्रकार भेटघाटमा उनले भने, ‘स्थानीय तहको उपनिर्वाचनमा हामीले अनुमान गरेको भन्दा कम मत प्राप्त भएको छ, तर आम निर्वाचनमाभन्दा मत बढेको छ, उपनिर्वाचनले पार्टीलाई खासै ठुलो क्षति गरेको छैन ।’ उपनिर्वाचनमा कांग्रेसले केही स्थान मात्र गुमाएको पुर्वमन्त्री समेत रहेका डा. रिजालले बताए ।
कांग्रेस र एमाले मिलेर अहिले सरकार चलाएकोमा अनौठो मान्न आवश्यक नरहेको उनको भनाई छ । ‘पहिला पनि संविधान निर्वाचन गर्नुभन्दा अगाडी कांग्रेस र एमाले मिलेर सरकार चलाएको र निर्वाचन सम्पन्न गरेका हौं, अहिले पनि देशको आवश्यकता अनुसार मिलेर सरकार चलाउने अवस्था आएको हो,’ उनले भने ।
सहकारी ठगी प्रकरणमा संलग्न दोषीलाई जोगाउने पक्षमा कांग्रेस नरहेको भन्दै दोषी प्रमाणित नहुँदासम्म कसैका विषयमा टिप्पणी गर्न आवश्यक नरहेको नेता रिजालले जोड दिए । ‘सहकारी ठगीका विषयमा अहिले नै टिप्पणी नगरौं,’ उनले भने ।
अर्को प्रसंगमा नेता रिजालले समानुपातिक निर्वाचन प्रणालीको ब्यवस्था राम्रो भएपनि यसलाई दुरुपयोग गरिएको टिप्पणी गरे । रिजालले भने, ‘यो ब्यवस्था राम्रो हो, तर यसमा जसलाई ल्याउनुपर्ने हो, त्यसलाई ल्याइएन, जो आफैं चुनाव लड्न सक्षम छ, उसलाई समानुपातिकमा राख्ने काम भयो, यो राम्रो होईन ।’
नेपाल प्रेस युनियन बाँकेका अध्यक्ष प्रियास्मृति ढकालको सभापतित्वमा सम्पन्न पत्रकार भेटघाटमा कांंग्रेस बाँकेका कार्यबाहक सभापति गोपाल अधिकारी, सचिव सुधान्सु कोइराला, क्षेत्र नम्बर १ का सभापति पोषणराज केसी, जिल्ला सदस्य उमा थापा, किसान महासंघ बाँकेका सचिव महेन्द्र मल्ल लगायतको उपस्थिति रहेको थियो ।
