नेपालगन्ज : नेपाली कांग्रेसका सहमहामन्त्री किशोरसिंह राठौंरले महिलाको अधिकारका लागि कांग्रेसले ठुलो संघर्ष गरेको बताएका छन् । नेपालका जति महिलाले प्राप्त गरेको अधिकार दक्षिण एशियामा अरु कुनै देशका महिलाले नपाएको उनको भनाई छ ।
महिलाहरुको महान पर्व हरितालिका तीजको अवसरमा नेपाली कांग्रेसको भातृ संगठन नेपाल महिला संघ बाँकेले सोमबार आयोजना गरेको तीज मिलन तथा शुभकामना आदान प्रदान कार्यक्रमलाई सम्बोधन गर्दै प्रमुख अतिथी समेत रहेका सहमहामन्त्री राठौंरले भने, ‘कांग्रेस कमजोर भयो भने यो ब्यवस्था रहदैन, महिलाका अधिकार गुम्छन् ।’ महिलालाई अधिकार दिने पार्टी भनेकै नेपाली कांग्रेस भएको उनको दाबी छ ।
कुनै समयमा महिलाले ढुक्कसँग तीज पर्व मनाउन सक्ने अवस्था नरहेको भन्दै महिलालाई स्वतन्त्र रुपले तीज मनाउने वातावरण बनाउन कांग्रेसले भूमिका खेलेको बताए । कांग्रेसको तीन पुस्ताको योगदानले नेपाली महिलाहरुले स्वतन्त्रता पूर्वक आफ्ना पर्व मनाउन पाएको सहमहामन्त्री राठौंरको भनाई छ ।
नेपाल महिला संघ बाँकेका सभापति नारायणी रुपाखेतीको अध्यक्षतामा भएको उक्त कार्यक्रममा कांग्रेस बाँकेका उपसभापति गोपालप्रसाद अधिकारी, प्रदेश सांसद मिना सिद्धिकी, बैजनाथ गाउँपालिका उपाध्यक्ष एवम महिला संघ क्षेत्र नम्बर ३ का सभापति निर्मला रोकाय, महिला संघ बाँके क्षेत्र नम्बर २ का सभापति गिता राना, महिला संघ क्षेत्र नम्बर १ का सभापति केशकुमारी भण्डारी लगायतले मन्तब्य ब्यक्त गरेका थिए । महिला संघ बाँकेका सचिव रत्ना राणाले सञ्चालन गरेको उक्त कार्यक्रममा उपसभापति उमा थापाले स्वागत गरेकी थिइन् ।
कार्यक्रममा प्रदेश सांसद माया पुन, सञ्जु चौधरी, सुशिला नेपाली, जिल्ला समन्वय समिति बाँकेका उपप्रमुख सिता कार्की, नेपालगन्ज उपमहानगरपालिकाका मेयर प्रशान्त बिष्ट, कांग्रेस बाँकेका सचिव सुधान्सु कोईराला, सहसचिवद्धय बिनोद थारु र रेणुसिंह ठाकुर, कोषाध्यक्ष यज्ञबहादुर बस्नेत, क्षेत्र नम्बर २ का सभापति रमेशकुमार गुप्ता, किसान महासंघ लुम्बिनी प्रदेशका महामन्त्री महेन्द्र मल्ल ठकुरी, महासंघ बाँकेका उपाध्यक्ष टेकबहादुर खड्का, महासमिति सदस्य द्रोपती ओली, ट्रेड युनियन कांग्रेस बाँकेका कार्यबाहक अध्यक्ष तोजिन्द्र बिक, नेपाल प्रेस युनियन बाँकेका निर्वतमान अध्यक्ष अर्जुन ओली लगायत बाँकेका विभिन्न ठाउँबाट आएका महिलाहरुको उपस्थिती रहेको थियो ।
