नेपालगन्ज : नेपाली कांग्रेसको आसन्न १४ औं महाधिवेशन नजिकिदै गर्दा यतिखेर नेपालगन्ज उपमहानगर क्षेत्र सबैको केन्द्रमा परिरहेको छ । पुर्वप्रधानमन्त्री एवम् नेपाली कांग्रेसका पुर्वसभापति स्वर्गिय सुशिल कोइरालाको गृहनगर भएका कारण पनि नेपालगन्जलाई जिल्लादेखी केन्द्रसम्म निकै महत्वका साथ हेर्ने गरिन्छ ।
आसन्न निर्वाचनमा नेपालगन्ज उपमहानगर सभापति पदमा तीन जना आकांक्षी देखिएका छन् । कांग्रेस कार्यकर्ताको नजरमा यि तीनै जना ब्यक्ति आफैमा योग्य र बलियो मानिन्छन् । यि मध्ये कस्ले बाजी मार्ला ? कांग्रेस कार्यकर्ताले अहिले विभिन्न कोणबाट अड्कल बाजी गरिरहेका छन् ।
नयाँ नेतृत्वका लागि वर्तमान उपमहानगर सभापति प्रशान्त विष्ट, नेतृ उमा थापामगर र बिनोद रिजालले आकांक्षा राखेका हुन् । तीनै जना आकांक्षी पार्टीका युवा नेता हुन् । उनीहरु कांग्रेसको भातृ संगठन नेपाल बिद्यार्थी संघ, नेपाल तरुण दल हुदै पार्टीको मुल राजनीतिमा आएका हुन् ।
वर्तमान सभापति विष्टले तत्कालिन नेपालगन्ज नगर सभापति भएर पाँच वर्ष र उपमहानगर भएपछि थप पाँच वर्ष गरी १० वर्ष कार्यकाल सम्हाल्ने अवसर पाए । १४ औं महाधिवेशनमा पनि विष्टले पुनः उपमहानगर सभापतिमै उम्मेदवारी दिने तयारी गरेका छन् ।
जिल्लामा पालिका स्तरको अधिवेशनका लागि अहिलेसम्म महिलाले सभापति पदमा आकांक्षा राखेका छैनन् । नेतृ थापा सम्भव त जिल्लाकै एक मात्र पालिका सभापतिको उम्मेदवार हुदैछिन् । उनी नेपालगन्ज उपमहानगरपालिकाको उप–प्रमुख पनि हुन् । नेपाल बिद्यार्थी संघ र नेपाल प्रेस युनियनको पुर्वकेन्द्रिय सदस्य तथा महेन्द्र बहुमुखी क्याम्पस नेपालगन्जमा स्ववियु कोषाध्यक्षमा उनको अनुभव छ ।
यस्तै युवा नेता रिजाल वर्तमान नेपाल तरुण दल बाँकेको जिल्ला सचिव हुन । पार्टीको भातृ संगठनमा रहेर लामो समय काम गरिसकेका उनले यसपटक उपमहानगर सभापतिमा उम्मेदवारी दिन लागेका हुन् । उपमहानगरमा पार्टीको संगठन बलियो बनाउनका लागि सभापति पदमा उम्मेदवारी दिने तयारी गरेको रिजाल बताउँछन् ।
‘ जबसम्म संगठन मजबुद हुदैन, तबसम्म पार्टी बलियो हुदैन,’ उनले भने ‘मेरो उम्मेदवारी पार्टी संगठन बनाउनका लागि नै हो ।’ स्वर्गिय सुशिल कोइरालाको गृहनगर नेपालगन्जमा पार्टीको प्रतिष्ठा स्थापित गर्न आफु नेतृत्वमा आउन खोजेको रिजालले बताए ।
यस्तै नेतृ थापाले संगठन निर्माण नै आफ्नो प्रमुख एजेण्डा रहेको बताईन् । ‘संगठन निर्माण नै मेरो प्रमुख एजेण्डा हो, आउँदै गरेको स्थानीय, प्रदेश र संघिय निर्वाचनमा पार्टीलाई जिताउनका लागि मेरो उम्मेदवारी हुन लागेको हो,’ उनले भनिन् ‘कार्यकारी पदमा महिलाको उम्मेदवारी अहिलेसम्म छैन, महिलाले पनि नेतृत्वमा आउन सक्षम छन् भन्नका लागि मैले उम्मेदवारी दिन लागेको हुँ ।’ नेतृत्व हस्तान्तरण पनि आफ्नो चुनावी एजेण्डा रहेको नेतृ थापाले बताईन् ।
वर्तमान सभापति विष्टले आफुले पार्टीलाई झन् बलियो बनाउन पुनः सभापति पदमा उम्मेदवारी दिन लागेको बताए । ‘आउने स्थानीय निर्वाचनमा नेपालगन्जका २३ वटै वडामा पार्टीका साथीहरुलाई जिताउने मेरो पहिलो एजेण्डा हो, यसअघिको अनुभवलाई अब कार्यान्वयनमा लैजानेछु,’ उनले भने ‘साथीहरुको आवश्यकता र सुझाव अनुसार म फेरी एक पटक दोहोरिन लागेको हुँ ।’
सभापति विष्टका अनुसार नेपालगन्जको १ देखी २३ वडामा नयाँ र पुरानो गरी ३ हजारको हाराहारीमा क्रियाशिल सदस्य रहेका छन् ।
सम्बन्धित समाचार पढ्नुस् :
बाँकेको सदस्यता विवाद टुंगियो, निर्वाचन तालिका सार्वजनिक हुदै
