नेपालगन्ज : कोहलपुर नगरपालिकाले १४ औं जिल्ला स्तरीय राष्ट्रपति रनिङ शिल्ड हात पारेको छ । नेपालगन्जमा आइतबार सम्पन्न भएको उक्त प्रतियोगितामा २१ स्वर्ण पदक, २२ रजत र २९ कास्य पदक जित्दैं कोहलपुर पहिलो भएको हो ।
जिल्ला खेलकुद विकास समितिले यही फागुन २६ देखि प्रतियोगिता सञ्चालनमा ल्याएको थियो । प्रतियोगितामा डुडुवा गाउँपालिका बाहेक बाँकेका ७ वटा स्थानीय तहले भाग लिएका थिए । प्रतियोगितामा राप्तीसोनारी गाउँपालिकाले दोस्रो स्थान प्राप्त गरेको छ । प्रतियोगितामा राप्ती सोनारीले १२ स्वर्ण, १२ रजत र ८ कास्य पदक जित्न सफल भएको हो ।
यसैगरी नेपालगन्ज उपमहानगरपालिकाले तेस्रो स्थान हासिल गरेको छ । नेपालगन्जले ६ स्वर्ण पदक, ९ रजत र ७ कास्य पदक प्राप्त गर्दै तेस्रो स्थान हासिल गरेको हो । प्रतियोगितामा बैजनाथ गाउँपालिकाले ६ स्वर्ण, ३ रजत ८ कास्य पदक सहित चौथो, खजुराले ४ स्वर्ण, २ रजत र ९ कास्य सहित पाँचौं, नरैनापुर १ स्वर्ण सहित छैठांै र जानकी गाउँपालिका ३ कास्य पदक सहित सातौं स्थानमा आएको छ ।
प्रतियोगितामा ५० स्वर्ण, ४८ रजत र ६४ कास्य पदकका लागि ७ वटा स्थानीय तहबाट छनोट भएर आएका खेलाडीले प्रतिस्पर्धा गरेका थिए । प्रतियोगितामा एथ्लेटिक्सतर्फ नेपालगन्ज उपमहानगरपालिकाका राहुल सुनार र नेपालगन्जकैं चमेली चौधरी, भलिबलमा ब्राइटल्याण्डका मनिष पुन र सरस्वती माध्यामिक बिद्यालय राप्ती सोनारीकी निकिता कुमारी थारु, कबड्डीमा जनता माध्यामिक बिद्यालय खजुराका साहबुद्धिन बेहना र ज्ञानोदय माध्यामिक बिद्यालय खजुराकी आशु क्षेत्री सर्वोत्कृष्ट खेलाडी घोषित भएका थिए ।
जिल्ला खेलकुद विकास समिति बाँकेका अध्यक्ष सन्दिपजंग शाहको सभापतित्वमा भएको समापन कार्यक्रममा विजयी खेलाडीलाई पुरस्कार वितरण गरिएको थियो । समापन समारोहका प्रमुख अतिथी एवम् लुम्बिनी प्रदेशका आन्तरिक मामिला कानुन तथा सहकारी मन्त्री कृष्णा केसी ‘नमुना’, लुम्बिनी प्रदेशका पुर्वमन्त्री एवं ओलम्पियन सुरेन्द्र हमाल, नेपालगन्ज उपमहानगरपालिका मेयर प्रशान्त विष्ट, कोहलपुर नगरपालिका मेयर पुर्णप्रसाद आर्चाय, खजुरा गाउँपालिका उपाध्यक्ष मन्जु मल्ल, बैजनाथ गाउँपालिका उपाध्यक्ष निर्मला रोकाय, बाँकेका प्रमुख जिल्ला अधिकारी बिपिन आचार्य लगायतले पुरस्कार तथा प्रमाणपत्र वितरण गरेका थिए । उक्त कार्यक्रममा जिल्ला खेलकुद विकास समितिका उपाध्यक्ष चेतकान्त भट्टराईले स्वागत मन्तव्य ब्यक्त गरेका थिए ।
