नेपालगन्ज : उद्योगी व्यवसायीलाई समावेशी प्यानलले अपिल गरेको छ । नेपालगन्ज उद्योग वाणिज्य संघको शनिबार हुन लागेको निर्वाचनमा आफ्नो प्यानलमा मतदान गर्न अपिल गरेको हो । समावेशी प्यानलका संयोजक र्ईश्वरप्रसाद पोखरेल, नेपालगन्ज उद्योग वाणिज्य संघका पूर्वअध्यक्षद्वय कृष्णप्रसाद श्रेष्ठ र नन्दलाल बैश्यले संयुक्त हस्ताक्षर गरी अपिल गरेका हुन् ।
समग्र बाँके क्षेत्रको प्रतिनिधित्व हुने सानादेखि ठूला व्यापारिक घरानासम्मका उद्योगी र व्यवसायीलाई उम्मेदवारका रुपमा चयन गरेको पुनः स्मरण गराउँदै उनीहरुले समावेशी प्यानल एकताबद्ध भएर चुनावी अभियानमा जुटेको र एकतामा फुट ल्याउन, बैैमनस्यता कायम गर्न, उद्योगी व्यवसायीबीच फाटो ल्याउन अनेक भ्रम छर्ने, हुँदै नभएका कुराहरु अतिरञ्जित गर्ने इत्यादि खेलहरु हुनसक्ने तर्फ निकै संयम र चनाखो हुन मतदातालाई सचेत गराइएको छ ।
‘व्यक्तिगत स्वार्थ सिद्धि वा कसैको बहकाउमा लागेर वा भ्रामक सूचनाका आधारमा धारणा नबनाउन सम्पूर्ण उद्योगी व्यवसायीसँग आग्रह गर्दछौं, समावेशी प्यानलको एकता अक्षुण्ण राखेर तन, मन, बुद्धि, र बर्कतले पूरै प्यानललाई विजयी बनाउने अभियानमा लाग्न हामी सम्पूर्ण मतदाता, उद्योगी व्यवसायीहरुमा अनुरोध गर्दछौं,’ उक्त अपिलमा भनिएको छ, ‘उद्योगी व्यवसायी बीचको एकता नै सिंगो समावेशी प्यानलको जित हो । उद्योगी व्यावसायीहरुको हित हो ।’
उक्त प्यानलबाट अध्यक्षमा टंकबहादुर धामी, चिरञ्जीवी ओली उपाध्यक्ष (उद्योग), हरिलाल न्यौपाने उपाध्यक्ष (वाणिज्य), मन्दिरा पाण्डे उपाध्यक्ष (महिला), भीमबहादुर रानाभाट महासचिव, मदनराज शर्मा उप-महासचिव, सलाउद्दिन जसगढ कोषाध्यक्षको उम्मेदवार रहेका छन् ।
यस्तै सदस्यहरुमा इन्दिरा कुमारी शाही, तोपबहादुर थापा, विष्णु श्रेष्ठ, बुद्धिबहादुर बिके, सुदन केसी, शिवराज कुर्मी, धर्मेन्द्र ठटेर, टीकामणि उपाध्याय, डम्बरबहादुर चन्द, जमालुद्दीन अन्सारी, सञ्जयकुमार अग्रवाल सदस्य (एशोसिएट), कमल कुमार कार्की सदस्य (एशोसिएट) र फणाधर भण्डारी सदस्य, सम्बद्ध (वस्तुगततर्फ) उम्मेदवार रहेका छन् ।
