एउटी श्रीमती आमाको अर्को रूप भन्छन्, खै तिम्रो जीवनमा त्यो आमाको भूमिका निभाउन सकेँ कि सकिनँ, त्यो त थाहा छैन । तर पनि, एक मुठी सास बाँकी रहुन्जेलसम्म कोशिस गरिरहनेछु ।
हुन त, आमा बन्न त्यति सजिलो पनि कहाँ छ र १ मलाई मेरी आमाले भनेको कुरा एउटी श्रीमती असल भई भने उसको श्रीमान्लाई आमाको केही हदसम्म भए पनि अभाव कम महसुस हुन्छ । त्यही पूरा गर्ने मेरो कोशिस जारी छ । ३१ साउनमा तिमी एक वर्षको पुग्ने, २४ साउन तिम्रो न्यानो काख खोसिएको दिन, तिमीले तिम्रो आमाको न्यानो काख गुमाएको २८ वर्ष पुग्यो अनि आजबाट तिमी २९ वर्षका लाग्यौ ।
तिमीलाई जन्मदिनको अनगिन्ती शुभकामना सानु । भनिन्छ, मरेपछि भगवान भइन्छ रे । सायद हाम्रो ममी पनि भगवान् हुनुभएको छ होला । आज तिमी यति ठूलो भइसक्यौ भनेर हेर्दै हुनुहुन्छ होला कहिँ कतैबाट । आजसम्म तिमीले आफ्नी आमाको फोटोसमेत देखेका छैनौ, पटक–पटक तिमीले सपनामा देख्न खोज्दा पनि तिम्रो सपनामा आउनुहुन्न।
तिमीले हरेक रात कल्पना गरेर सुत्छौ तर बिहान उठ्दा तिमीले सपनामा आफ्नी आमालाई देख्दैनौ । मन खिन्न नबनाऊ, हामी जसलाई धेरै माया गर्छ नि, उसलाई सपनामा पनि देखिँदैन रे । तिमीले नदेख्दा त आमाको यति न्यास्रो मानिरहेका छौ, कतै सपनामा पनि देख्यौ भने झन् तिमीलाई गाह्रो हुन्छ भनेर आमा सपनामा नआउनुभएको हो बुझ्यौं ।
उहाँ तिम्रो साथमा नभए पनि आमा हो, तिमीलाई के कुरामा गाह्रो अप्ठ्यारो पर्छ भन्ने कुरा थाहा छ उहाँलाई । त्यसैले धेरै जिद्दी नगर । तिमीले र मैले आजसम्म बिताएका उमेरको ठ्याक्कै आधा समय हामीले एकअर्कासँग बिताइसकेका छौँ । मैले कक्षा ११ र तिमीले कक्षा १२ मा पढ्दै गर्दा पहिलोपटक एउटा ट्युसन क्लासमा तिम्रो र मेरो भेट भएको थियो । तिमी कलेजको जेहेन्दार विद्यार्थी, तिमीलाई नचिन्ने पनि सायदै थिए होला र पनि तिम्रो र मेरो चिनजान एउटा ट्युसन कक्षामा भएको थियो ।
त्यसबेला हामी दुवैजना उमेरले १५, १६ वर्षका थियौँ । तिम्रो र मेरो बोलचालको माध्यम एउटा कापी थियो, याद छ नि तिमीलाई ? त्यो उमेर न माया प्रेम के हो भनेर जान्ने उमेर थियो, न त बुझ्ने नै । तर पनि, हामी त्यही दिन एकअर्काका हौँ भन्ने महसुस भइसकेको थियो । तिमीलाई पनि, मलाई पनि । साथी हुँदै सुरु भएको हाम्रो यात्रा एकअर्काको दुःख, सुखको सारथि बन्न पुग्यौँ । तिमी हेर्दा पनि गोरे गोरे, पातलो, सोझो यसै माया लाग्दा थियौ ।
तिमीले मलाई के देखेर मन परायौ, त्यो त तिमीलाई थाहा होला । तिमीले लगाएको सेतो क्याप टोपी मलाई एकदमै मन पथ्र्थो । हरेक दिन हाम्रो फोनमा कुरा हुन्थ्यो । त्यो बेला अहिलेको जस्तो कहाँको माया प्रेमका कुरा हुनु । एकअर्काको दैनिकी सुनाउँदैमा रात कटेको पत्तो नै हुन्थेन ।
कुरा गर्दै जाँदा तिमीले मेरो ममी हुनुहुन्न भन्दा म कति रोएकी थिएँ । तिमी झन् कति रुन्थ्यौ होला । हो, त्यही बेला मैले एउटा प्रण गरेको थिएँ जिन्दगीसँग– म उसको जीवनको आमा बन्न कोशिस गर्नेछु । त्यसपछिका दिनमा यो संसारमा तिमीबाहेक अर्को कुनै चिज छजस्तो नै लाग्न छोड्यो मलाई ।
जसरी एउटी आमाको लागि एउटा सन्तान सर्वस्व हो । मैले कहिल्यै तिमीबाट कुनै कुराको आशा नै राखिनँ । बस, तिमी जिन्दगीमा सफल भएको हेर्ने र तिम्रो ओठमा सधैँ हाँसो हेर्ने रहर मात्र लागिरह्यो । आज पनि तिमीलाई खुुशी देख्दा संसार जितेको जस्तो महसुस हुन्छ ।
तिम्रो सपना र लक्ष्यका अगाडि मैले मेरा कुनै सपना र लक्ष्य देखिनँ । बस, देखेँ त तिम्रो जित र खुशी । भनिन्छ, एउटी आमाले आफ्ना सन्तानले जस्तासुकै गल्ती गर्दा पनि माफी दिन सक्छिन, त्यस्तै तिमीले जानेर वा नजानेर गरेका गल्ती पनि मेरा लागि गल्तीजस्तो लाग्दैन, सहजै स्वीकार गर्न सक्छु । मैले त आफूले गरेको प्रण निभाउने कोशिस गरिरहेकी छु । त्यसमा कति सफल भएँ, त्यो त तिमीले महसुस गरेका हौला ।
यति भन्दै गर्दा तिमीले मेरा लागि केही गरेका छैनौँ भनेकोचाहीँ होइन है । आज म जे छु, जस्तो छु त्यसमा मेरा बुवा–आमापछिको हात तिम्रै छ । जिन्दगीमा मैले कैयौँपटक हरेस खाँदा तिमीले नै हात दिएर यहाँसम्म ल्याएका हौ । मैले जति माया तिमीलाई दिने कोशिस गरेकी छु, त्यो त तिमीले मलाई दिएको मायाबाटै सिकेको हो नि ।
तिमीसँग भेट भएको दिनदेखि आजसम्म मैले भगवानसँग कहिल्यै मेरा लागि मागिनँ, सधैँ तिम्रो खुशी मागिररहेँ। किन थाहा छ ? किनकि तिम्रो खुशीमै मेरो खुशी थियो । यो १४÷१५ वर्षको बीचमा हामीले कति दुःख गर्यौँ, के के भयो, त्यो त सबै लेख्दा एउटा किताब नै बन्छ ।
तिम्रो जन्मदिनको अवसरमा मेरोतर्फबाट उपहारस्वरूप यी केही शब्द तिमीलाई । अब त्यति धेरै नि खासै केही छैन जिन्दगीमा, तिम्रो खुशी र सफलता हेर्दै तिम्रो काखमा अन्तिम सास फेर्ने धोको छ । तिम्रो दुःख, पीडा, असफलता, मिहिनेत, खुशी र सफलताको साक्षी पनि मै हुँ । तिमीले जिन्दगीमा कति दुःख सहेका छौ, गरेका छौ, त्यसैअनुसारको सफलता पनि पाउँदै गएका छौ । आगामी दिनमा पनि तिमीले चाहेको र सोचेको सबै कुरा पूरा हुन । फेरि पनि तिमीलाई जन्म दिनको लाखौँ लाख शुभकामना बूढो ।
