नेपालगन्ज : अवरुद्ध रहेको ‘नेपालगन्ज-पोखरा’ सिधा हवाई उडान फेरी सञ्चालनमा आउने भएको छ । नेपालगन्ज-पोखराको नियमित उडान आगामी भदौं ३१ गते (१६ सेप्टेम्बर २०२६) बाट फेरी सञ्चालनमा आउन लागेको हो ।
उक्त रुटमा हरेक हप्ताको आइतबार, बुधबार र शुक्रबार गरी तीन वटा उडान राखिएको र यसका लागि टिकट बुकिङ समेत खुल्ला गरिएको बुद्ध एअर नेपालगन्जका प्रमुख बिनित शाहले जानकारी दिए । बुद्ध एअरको नयाँ भाडादर अनुसार नेपालगन्जबाट पोखराका लागि न्यूनतम (‘ई’ क्लास) ८ हजार १३ रुपैयाँ ३७ पैसादेखी अधिकतम(‘वाई’ क्लास) सम्मको १२ हजार १ सय ८१ रुपैयाँ ५३ पैसा कायम गरिएको छ ।
यस्तै पोखरादेखी नेपालगन्जका लागि न्युनतम भाडादर ७ हजार ९ सय १३ रुपैयाँ ३७ पैसादेखी अधिकतम १२ हजार ८१ रुपैयाँ ५३ पैसा कायम गरिएको बुद्द एअरले जनाएको छ । स्थलमार्गको यात्रा जोखिमपूर्ण भएकाले पोखरा जाने यात्रुहरु उडानको प्रतिक्षामा बसेका छन् । दसैं नजिकिदै गरेकाले यात्रुलाई थप राहत मिल्ने अपेक्षा गरिएको छ । कतिपय यात्रुहरु अहिले पनि स्थलमार्गबाट जोखिमपूर्ण यात्रा गर्न बाध्य भईरहेका छन् । पहिरोका कारण पटक–पटक सडक अवरुद्ध हुने गरेको छ ।
नेपालगन्ज-पोखराका लागि बुद्ध एअरले २०७८ साउनदेखी केही समयसम्म दैनिक एउटा उडान र त्यसपछि हप्तामा ३ वटा उडान गर्दै आएको थियो । पछि यात्रुको चाप केही घटेपछि उडानमा पनि कटौती गरिएको थियो । सरकारले हवाई इन्धनको मुल्य बृद्धि गरेसँगै भाडा बढेपछि पर्याप्त मात्रामा यात्रु नपाएर बुद्धले गत बैशाख दोस्रोत सातातिरबाट नेपालगन्ज–पोखरा रुटको उडान नै बन्दा गरेको थियो ।
यसअघि बुद्ध एयरले नेपालगन्ज नेपालगन्ज-पोखराका लागि हवाई भाडा न्युनतम ५ हजार २ सयको हाराहारीमा कायम राखेको थियो । तर इन्धनको मुल्य ह्वात्तै बढेपछि न्युनतम भाडा ८ हजार २ सय सम्म पुर्याइएको थियो । पर्यटन ब्यवसायी एवम् नाट्टा बाँकेका पुर्वअध्यक्ष श्रीराम सिग्देल बुद्धले नेपालगन्ज–पोखरा रुटमा पुनः नियमित उडान गर्न लागेको बताए । यसले हवाई यात्रुलाई सहजता ल्याउने उनको विश्वास छ ।
नाट्टा बाँकेका तत्कालिन अध्यक्ष सिग्देलकै पहलमा नेपालगन्ज-पोखराका लागि पहिलो पटक चार्टर उडान गरिएको थियो । नाट्टाकै समन्वयमा पछि मात्र बुद्ध एअरले आफ्नो नियमित उडान राखेको हो ।
सम्बन्धित समाचार :
नेपालगन्ज–पोखरा उडान बन्द, स्थल मार्गमा सास्ती खेप्दै यात्रु
