नेपालगन्ज : नदी खोलामा अबैध उत्खनन् रोक्न राप्ती सोनारी गाउँपालिका कार्यालयले कडाई गरेको छ । कार्यपालिका(बोर्ड) बैठकबाटै निर्णय गरी अबैध उत्खनन् रोक्न कडाई गरिएको हो । गाउँपालिकाको निर्णय पश्चात अबैध उत्खनन्मा प्रयोग गरिएका सवारी साधन नियन्त्रणमा लिइएको छ ।
गाउँपालिका कार्यालयका अनुसार उत्खनन्मा प्रयोग भएका पल्टु थारुको भे १ क ४३७ र सन्तोष एडीको भे १ क १७२२ नम्बरको जेसिभी तथा प्रदिप पौडेलको भे १ क १७२३ नम्बरको एक्साभेटर र भे १ ख ३५९४ नम्बरको टिपरलाई नियन्त्रणमा लिइएको छ ।
राप्ती सोनारी–६ फत्तेपुरस्थित राप्ती नदीको विभिन्न घाटबाट यि सवारी साधनलाई नियन्त्रणमा लिइएको प्रमुख प्रशासकीय अधिकृत सिंहराज डाँगीले जानकारी दिए । ‘नदी खोलामा पसेर अबैध रुपमा उत्खनन् गरिरहेको अवस्थामा यि सवारी साधनलाई नियन्त्रणमा लिएका हौं,’ उनले भने ‘नियन्त्रणमा लिइएका जेसिबी, एक्साभेटर र टिपरलाई नियम अनुसार जरिवाना गराएर छाड्नेछौं ।’
अबैध उत्खनन् रोकेर आगामी आर्थिक वर्ष २०७९/८० बाट नदी खोलामा ठेक्का लगाउने गाउँपालिकाको तयारी छ । नदीमा उत्खनन् भइरहेको भन्ने सूचना पाएपछि मंगलबार राप्ती सोनारी ६ का वडाअध्यक्ष लवराज खरेलको नेतृत्वमा दुई वटा जेसिबी नियन्त्रणमा लिइएको थियो । फत्तेपुरको घाटबाटै बुधबार थप एउटा एक्साभेटर र टिपर नियन्त्रणमा लिइएको प्रमुख प्रशासकीय अधिकृत डाँगीले बताए ।
गाउँपालिका अध्यक्ष तप्तबहादुर पौडेलले नदी खोलामा अबैध उत्खनन् रोक्न गाउँपालिका कार्यालय कडाईका साथ लागेको बताए । ‘गाउँपालिकाको मुख्य आन्तरिक स्रोत नै यहाँका नदी र खोला हुन्, नदी र खोलामा हुने अबैध चोरी निकासी रोकेपछि मात्र गाउँपालिकाको राजश्वमा वृद्धि हुन्छ र समग्र गाउँपालिकाको विकासमा टेवा पुग्नेछ,’ उनले भने ‘गाउँपालिकाको सबै कार्यपालिका सदस्य अबैध उत्खनन् रोक्न सहमत छन् ।’
गाउँकार्यपालिका बैठकले गाउँपालिका क्षेत्रमा घाट गद्दीहरुको स्थलगत अनुगमन गर्न कार्यपालिकाका सबै (१७ जना) सदस्यको उपस्थितीमा अनुगमन गर्ने निर्णय गरेको प्रमुख प्रशासकीय अधिकृत डाँगीले जानकारी दिए । उनका अनुसार यही जेठ १९ गतेदेखी अनुगमन सुरु गरिनेछ । अनुगमनका क्रममा प्राविधिक कर्मचारी र सुरक्षा निकायका प्रतिनिधीको रोहवरमा गाउँपालिका भरका सबै घाटगद्दी नापजाँच गरी एकिन गर्ने डाँगीले बताए ।
क्रसर उद्योगमा स्थलगत अनुगमन गरी नियम कानुन अनुसारका आवश्यक कागजात माग गर्ने र त्यहाँ रहेका नदीजन्य सामाग्रीको मात्रा नाँपजाँच गरी सो को खरिद वा संकलनका स्रोतको एकिन गरिने जानकारी दिए ।
सम्बन्धित वडामा रहेका निषेधित क्षत्रबारे जानकारी दिनका लागि गाउँपालिकाले यही जेठ १७ गतेदेखी लागु हुने गरी सम्बन्धित सबैका लागि सूचना प्रकाशन गर्ने र प्रचलित ऐन/नियम अनुसार आवश्यक काम कारबाहीका लागि सम्बन्धित निकायमा लिखित रुपमा पत्राचार गर्ने निर्णय पनि गरेको छ । गाउँपालिकाले खैरी खोला, मुगुवा खोला, टिकुलीपुरघाट सिधनियाघाट, बग्दैलाघाट, लालपुरघाट, आलिनगर खल्लाटपरीघाट, जलालाघाट, परुवा खोला, झिझरी खोलालाई निषेधित क्षेत्र कायम गरेको छ ।
अब्यवस्थित रुपमा रहेका पुरानो स्टक माललाई नियम अनुसारको पुरानो स्टक मालबस्तुको उचित ब्यवस्थापनका लागि गाउँपालिकाको प्राकृतिक स्रोत तथा खानीजन्य वस्तुको बिक्री तथा निकासी सम्बन्धि कार्यविधी २०७५ बमोजिम राजस्व रकम गाउँ कार्यपालिकामा बुझाउन निर्देशन दिइएको छ ।
‘उक्त मालबस्तु २०७९ सालको असार मसान्तसम्म सम्बन्धित घाट गद्दिकर्ताले अनिवार्य रुपमा उठाई सक्नुपर्नेछ, अन्यथा उठाउन नसकेको वा बचेको सम्पूर्ण माल २०७९ साउन १ गतेदेखी गाउँपालिकाले सम्बन्धित सरोकारवालाको सहयोग लिएर सो माल सामान सिज गर्नेछ,’ प्रमुख प्रशासकीय अधिकृत डाँगीले भने ।
आर्थिक वर्ष २०७९/८० मा समयमै सार्वजनिक खरिद प्रक्रियामा गइ नदिजन्य माल बस्तुको आवश्यकताका आधारमा तोकिएको मात्र उत्खनन् गर्ने गराउने निर्णय कार्यपालिका बैठकले गरेको छ ।
भिडियो हेर्नुस् :
