नेपालगन्ज : नेपाली कांग्रेसका सहमहामन्त्री जीवन परियारले स्थानीय निर्वाचनमा एक्लै वा गठबन्धन गरेर चुनाव लड्ने भन्नेबारे पार्टीको आधिकारिक निर्णय अहिले नभएको बताएका छन् । कांग्रेस बाँकेले शुक्रबार पार्टी कार्यालयमा आयोजना गरेको कार्यकर्ता भेटघाटलाई सम्बोधन गर्दै उनले भने, ‘नेपाली कांग्रेसले २०७४ को निर्वाचनमा गठबन्धन गरेको हो, जहाँ हाम्रो एक्लै लड्ने तागत छ, त्यहाँ एक्लै लड्नुपर्छ, यदी स्थानीय तहमा पार्टीबीच समझदारी हुन्छ भने त्यसलाई पनि अन्यथा लिनु हुदैन ।’
स्थानीय तहको निर्वाचनका विषयमा कानुनी जटिलता उत्पन्न भएको भन्दै सहमहामन्त्री परियारले यसका लागि दलहरुबीच एक खालको समझदारी कायम गर्न आवश्यक रहेको सहमहामन्त्री परियारले बताए । ‘संविधानमा स्थानीय जनप्रतिनिधीको कार्यकाल पाँच वर्ष भनेको छ, पहिलो चरणको चुनाव बैशाख, दोस्रो चरणको असार र तेस्रो चरणको चुनाव असोजमा भयो,’ उनले भने ‘निर्वाचन गर्न असोज वा बैशाख कस्लाई मान्ने भन्नेमा दुविधा छ ।’
अर्को प्रसंगमा उनले सबै दलबीच सहमती गरेर मात्र एमसिसी पास गर्नुपर्ने बताए । ‘सबै दलले सहमती नगरेर एमसिसी पास गर्नु हुदैन, अहिले सानो बच्चालाई एमसिसी पास गर्नु हुन्छ कि हुदैन भनेर सोध्दा हुदैन भन्छ, यो स्थिती छ,’ परियारले भने ‘एमसिसीका बारेमा पार्टी सभापतिले सबै दलहरुसँग राय, परामर्श लिएर सहमती गरेर मात्रै पास गर्नुपर्छ, नत्र भने यो चुनाव अगाडी एमसिसीको विषयलाई बन्द गर्नुपर्छ ।’
१४ औं महाधिवेशनबाट पार्टीले अनुभवी तथा परिपक्क सभापति पाएको र सभापति शेरबहादुर देउवालाई बलियो बनाउने तरिकाले काम गर्नुपर्ने बताए । ‘हामीले हाम्रा सभापति शेरबहादुर देउवालाई बलियो बनाउने तरिकाले काम गर्नुपर्छ, सभापति बलियो भएपछि संगठन बलियो हुने हो,’ उनले थपे ‘धेरै पटक प्रधानमन्त्री भइसक्नु भएको छ, दुई पटक सभापति भइसक्नु भएको छ, गगन र विश्वप्रकाश जस्ता महामन्त्री हुनुहुन्छ, हामी जस्ता सहमहामन्त्री युवाहरु केन्द्रिय समितिमा आएका छौं ।’
पार्टीको भातृ तथा शुभेच्छुक संगठनको निर्वाचन अब चाडो गर्नुपर्ने नेता परियारले बताए । ‘भातृ तथा सुभेच्छुक संगठनको अधिवेशनको विकल्प अधिवेशन नै हो,’ परियारले भने । पार्टी महाधिवेशनको ‘उत्साह, एकता र रुपान्तरण’ को अभियानलाई साकार पार्नका निम्ति सबै आफ्नो ठाउँबाट लाग्नुपर्ने धारणा राखे ।
पार्टीको १४ औं महाधिवेशन अन्तर्गत स्थगित भएका १६ जिल्लाको निर्वाचनलाई चाडो गर्नुपर्ने सुझाव धेरै जिल्लाबाट आइरहेको बताए । ‘निर्वाचन समितिले पुस २७ गते १६ जिल्लाको निर्वाचन मिति तोकेको थियो, त्यो निर्वाचनलाई पछाडी सरिसकेको छ,’ उनले भने ‘पदाधिकारीको बैठकले गरेको निर्णयबाट निर्वाचन सारिएको होइन, आधिकारीक रुपमा बुझ्दाखेरी माघ १२ गते राष्ट्रिय सभाको निर्वाचन गर्ने भएको हुँदा सारिएको भन्ने कुरा बुझियो ।’
कांग्रेसले यसपटक उठाएका राष्ट्रिय सभाका उम्मेदवार पार्टीमा धेरै योगदान गरेका र पुराना नेता भएको बताए । ‘युवराज शर्मा दाई जस्ता ब्यक्ति उम्मेदवार हुनुहुन्छ, कांग्रेसले अहिले राम्रो निर्णय गर्यो है भन्ने सन्देश गएको छ,’ उनले भने ।
कांग्रेस बाँकेका सभापति किरण कोइरालाको सभापतित्वमा सम्पन्न उक्त कार्यक्रममा जिल्ला सदस्य चिन्तामणि धितालले स्वागत गरेका थिए, भने प्रतिनिधी सभाका सांसद बिमला नेपाली, कांग्रेस बाँकेका पुर्वसभापति एवम् राष्ट्रिय सभा सदस्यका उम्मेदवार युवराज शर्मा र बादशाह कुर्मीले पनि मन्तब्य राखेका थिए ।
खुल्ला छलफलका क्रममा नेपालगन्ज-२ का वडाअध्यक्ष एवम् क्षेत्र नम्बर २ का सचिव सुनिलसिंह हमाल, क्षेत्र नम्बर १ का पुर्वसचिव डिल्ली गिरी, कांग्रेस नेता गोपालप्रसाद अधिकारी, नेपाल प्रेस युनियन बाँकेका अध्यक्ष अर्जुन ओली, बिद्यार्थी नेता चन्द्रप्रकाश देवकोटा लगायतले सह-महामन्त्री परियारलाई जिज्ञासा तथा सुझाव दिएका थिए । कार्यक्रम सञ्चालन कांग्रेस बाँकेका सचिव तप्त पौडेलले गरेका थिए ।
भिडियो हेर्नुस् :
