नेपालगन्ज : आफुमाथी ‘फिल्मी शैली’ मा भएको बलात्कारको घटना सम्झदा १६ वर्षीया सरिता केसी (नाम परिर्वतित) लाई अहिले पनि सपना जस्तै लाग्छ । उनी त्यो घटनालाई सम्झिन चाहदैनिन् । तरपनि उनको मस्तिष्कमा त्यही घटना दोहोरिरहन्छ ।
पीडित सरिता मानसिक रुपमा यतिबेला निकै तनावमा छिन् । ‘घटनालाई बिर्सन खोज्छु, तरपनि याद आइहाल्छ,’ उनले भनिन् ‘घटना अहिले पनि सपना जस्तै लागिरहेको छ ।’ नेपालगन्ज-१ निवासी सरिता शुक्रबार करिव १२ बजेतिर घरबाट निस्केकी थिइन् । दिदी कहा बस्दै आएकी उनी बागेश्वरी मन्दिरको दर्शन गर्न भनि घरबाट निस्किन् । मन्दिरमा गएका बेला उनको भाई नाता पर्ने एक जना युवाले फोन गरेर खजुरातिर घुम्न जान आग्रह गरे ।
सरिताले भाईको आग्रहलाई नर्कान सकिनन् । भाईले आफ्ना अन्य दुई जना साथीलाई पनि सँगै लिएर दुई वटा मोटरसाईकलमा खजुरा पुगे । उनीहरु दिनभरी खजुराका विभिन्न ठाउँमा घुमफिर गरे र फोटो खिचे । खजुरास्थित पुलचोकमा फोटो खिचेर घर फर्किने तयारी गरिरहेको अवस्थामा अपरान्ह करिव ५ बजेतिर स्थानीय युवाहरुको घेराबन्दीमा परे ।
‘फोटो खिचेर फर्किनै लागेका थियौं, पहिले एक्कासी एउटा बाइकमा दुई जना केटाहरु आए, लगत्तै अर्को बाईकमा पनि तीन जना केटाहरु त्यहाँ आईपुगे,’ सरिताले सम्झिदै भनिन् ‘एक जनाले मलाई पिट्यो र बाईकमा बस्न दवाव दियो, नत्र जे पनि गर्ने धम्की दिएपछि म उसको बाईकमा बस्न राजी भए, अरु चार जनाले मेरो भाई र उसको साथीहरुलाई कुटपिट गरिरहे ।’
आफुलाई त्यहाँबाट एक जना अपरिचित युवाले मोटरसाईकलमा राखेर नेपालगन्ज पुर्याइदिन्छु भनेर अनकन्टार जंगलमा पुर्याएको र त्यहीँ बलात्कार गरेको पीडित बताउँछिन् । ‘मलाई जंगलमा लगिसकेपछि यौन प्रस्ताव राख्यो, मैले अस्वीकार गरेपछि सबै केटाहरुलाई बोलाएर बलात्कार गर्ने डरत्रास देखायो, मैले हात जोड्दै विन्ती गरे, उसले मलाई बलात्कार गरिरह्योे,’ पीडित सरिताले भनिन् ।
जंगलमा बलात्कार गरिसकेपछि पनि युवाले छाडेनन् । त्यसपछि उनले युवतीलाई राधापुरस्थित आफ्नै घरमा पुर्याए । करिव ७ बजेतिर घरमा लगेर खाना खुवाए र घरमा ति युवाले दोस्रो पटक युवतीमाथी बलात्कार गरे । पीडित भन्छिन्, ‘जंगलमा बलात्कार गरिसकेपछि अब म घरमा जान्छु, मलाई छाडिदिनुस् भन्दाखेरी उसले बहाना बाजी गर्यो, बाइकको तेल सकिएको र आफुसँग पैसा पनि नभएको कुरा गर्यो, त्यसपछि आफ्नै घरमा लगेर गयो ।’
घरमा लगिसकेपछि पनि आफुलाई बलात्कार गर्न नछाडेको पीडित युवती बताउँछिन् । ‘घरमा लगिसकेपछि पनि मसँग यौन प्रस्ताव राख्यो, मैले मान्दैन भनेपछि साथीहरुलाई बोलाउँछु भनेर फेरी डरत्रास देखायो, त्यहाँ पनि मैले उसको करकापमा मेरो शरिर उसलाई सुम्पिए,’ उनले भनिन् ‘मलाई जवरजस्ती बलात्कार गर्दै गरेको अवस्थामा प्रहरी घरमै पुगेर मलाई उद्धार गरेको हो ।’ युवतीलाई प्रहरीले शुक्रबार राती करिव ८ बजेतिर उद्धार गरेको थियो ।
युवाहरुको समुहबाट कुटाई खाएका पीडित युवाले नै खबर गरिदिएपछि प्रहरीले घटना थाहा पाएको थियो । बलात्कार गर्ने ब्यक्तिलाई आफुले अहिलेसम्म नदेखेको र नचिनेको पीडित युवती बताउँछिन् । पीडित अहिले स्थानीय एक गैर सरकारी संस्थाको संरक्षणमा छिन् ।
जिल्ला प्रहरी कार्यालय बाँके समक्ष बलात्कार आरोपीविरुद्ध जाहेरी दिइसकेकी पीडित युवती न्याय पाउने अपेक्षामा छिन् । ‘मलाई न्याय दिनुपर्यो, अपराधीलाई कानुनी सजाय दिनुपर्यो, जेलमा हाल्नुपर्यो,’ उनी भन्छिन् । बलात्कारमा संलग्न रहेको अभियोगमा खजुरा गाउँपालिका वडा नम्बर १ राधापुर निवासी १८ वर्षका हरिष नेपालीलाई घटनास्थलबाटै पक्राउ गरेर अनुसन्धान सुरु गरिसकेको जिल्ला प्रहरी कार्यालय बाँकेले जनाएको छ ।
कार्यालयका प्रहरी नायव उपरीक्षक(डिएसपी) मधुसुदन न्यौपानेले अभियुक्तविरुद्ध पीडितले कार्यालयमा जाहेरी दर्ता गराइसकेको र प्रहरीले आवश्यक अनुसन्धान सुरु गरिसकेको बताए । ‘बलात्कारमा संलग्न युवालाई नियन्त्रणमा लिइसकेका छौं, घटनाको मतियारको रुपमा अर्का एक जना युवा पनि हाम्रो नियन्त्रणमा छन्, अन्य तीन जना युवाहरु फरार छन्,’ उनले भने ।
बाँके जिल्ला अदालतबाट सोमबार ७ दिनको म्याद पाएर अभियुक्तविरुद्ध अनुसन्धान कार्य अगाडी बढाइएकोे डिएसपी न्यौपानेले जानकारी दिए । प्रहरीले समयमै सूचना पाएका कारण २ घण्टा भित्रमा प्रहरी परिचालन गरेर युवतीको उद्धार गर्न सफल भएको उनी बताउँछन् । ‘बाँकेमा फिल्मी शैलीको जस्तो घटना भयो, समयमै प्रहरीलाई सूचना प्राप्त भएको हुँदा पीडित युवतीको सकुशल उद्धार भयो र बलात्कारमा संलग्नलाई पनि रंगेहात समात्न सफल भयौं,’ न्यौपानेले भने ।
-नागरिक दैनिकबाट
