चितवन : चितवन राष्ट्रिय निकुञ्जले गत माघ ९ गते निर्माणाधीन सडकको नालीमा परेर गैंडा मरेपछि निर्माणाधीन ठेकेदारविरुद्ध पक्राउ पुर्जी जारी गरेपछि नेपाल निर्माण ब्यवसायी महासंघले आपत्ति जनाएको छ ।
केहीदिन अघि चितवनमा निर्माणाधिन नालाको खाल्डोमा परेर गैडा मरेको थियो । महासंघका महासचिव रोशन दाहालले विज्ञप्ती जारी गर्दै निर्माण कम्पनीविरुद्ध गैरकानुनी रूपमा सम्बन्धित निकायबाट कारबाही अगाडि बढाइएकोप्रति आफ्नो गम्भीर ध्यानाकर्षण भएको जनाएका हुन् ।
इन्डो–सगुन जेभी निर्माण कम्पनीबाट नाली निर्माणको क्रममा राष्ट्रिय निकुञ्ज तथा वन्यजन्तु संरक्षण ऐन नियमविपरीत हुने कुनै पनि काम कारबाही नभएको र निर्माण सम्झौताबमोजिम नै निर्माण कम्पनीले अनुसरण गर्नुपर्ने सम्पूर्ण सुरक्षाका मापदण्ड अपनाइएको महासंघले जनाएको छ ।
सडक डिभिजन कार्यालय भरतपुरअन्तर्गत उक्त आयोजनाको निर्माण क्षेत्रमा गैँडाको प्राकृतिक आवत जावतको क्रममा भएको दुःखद निधनको तथ्यलाई तोडमोड गरिएको महासंघको भनाइ छ । ‘तथ्य तोडमोड गरी निर्माण व्यवसायी उपर प्रचलित कानुन विपरीत हुने गरी अनुसन्धानको नाममा पक्राउ पुर्जी जारी गर्ने, दुःख-हैरानी दिने कार्यबाट विभिन्न बाधा अड्चनका बाबजुद भौतिक पूर्वाधार निर्माण कार्यमा अहोरात्र खटिएका व्यवसायीको मनोबल गिराउने र निर्माण कार्यलाई अगाडि बढाउन हतोत्साहित गर्ने काम भएको महासंघको ठहर छ,’ विज्ञप्तीमा जनाइएको छ ।
निर्माण स्थलमा कंक्रिटको नाली बनाइसकेपछि पूर्ण रूपमा सेट हुनका लागि प्राविधिक रूपमा केही दिन खुल्लै राख्नुपर्ने प्रावधान रहेकाले नाली नपुरिएको र सम्झौता बमोजिम कम्पनीले साइट सुरक्षाका मापदण्ड र उपायहरू अनुसरण गरी आयोजनाको नियमित सुपरिवेक्षण र निर्देशनमा निर्माण कार्य गरिरहेको अवस्थामा प्राकृतिक रूपमा घटना भएको तथ्य जगजाहेर हुँदाहुँदै निर्माण व्यवसायीलाई नियोजित रूपमा आरोपित गरी झुठो लाञ्छना लगाई मानमर्दन गरिएको कार्यप्रति महासंघले गम्भीर आपत्ति जनाएको हो ।
यस घटनालाई लिएर निर्माण कम्पनी इन्डो–सगुन जेभीका प्रतिनिधि सहदेव खड्कालाई अनुसन्धानको नाममा झुठो लाञ्छाना लगाई पक्राउ पुर्जी जारी गरी पक्राउ गर्ने लगायत काम कारबाही तत्काल रोक्न महासंघले जोडदार माग गरेको छ ।
