नेपालगन्ज : प्रेस स्वतन्त्रता सेनानी एवम् वरिष्ठ पत्रकार स्वर्गिय पन्नालाल गुप्ताले लोकतन्त्र र प्रेस तथा अभिब्यक्ति स्वतन्त्रतामा पुर्याएको योगदानको चर्चा गरिएको छ । उनको २०७६ माघ १५ गते निधन भएको थियो ।
गुप्ताको दोस्रो वार्षिक पुण्य तिथीका अवसरमा शनिबार आयोजित स्मृती सभामा बोल्ने अधिकांस बक्ताले उनको योगदानको चर्चा गरेका हुन् । प्रेस स्वतन्त्रता सेनानी पन्नालाल गुप्त प्रतिष्ठानले आयोजना गरेको सभामा प्रमुख अतिथी एवम् राष्ट्रिय सभाका सदस्य युवराज शर्माले लोकतन्त्र, नागरिक अधिकार प्राप्ती र प्रेस तथा अभिव्यक्ति स्वतन्त्रताका लागि गुप्ताले अतुलनीय योगदान पुर्याएको बताए ।
उनको विचार र व्यवहारलाई अवलम्वन गर्न उनले सबैलाई आब्हान पनि गरे । पत्रकारितामार्फत समाजलाई सुसुचित गर्दा गुप्तालाई तत्कालिन प्रहरी प्रशासनले थुप्रै पटक पक्राउ गरेको शर्माले स्मरण गरे । नेपाल पत्रकार महासंघ बाँकेका पुर्वअध्यक्ष निरज गौतमले स्वर्गिय गुप्ताको सरल र असल स्वभावसँगै पत्रकारिता प्रतिको आस्था र निरन्तरता उदाहरणीय भएको बताए ।
प्रतिष्ठानका अध्यक्ष विजयकुमार गप्ताले स्वर्गिय गुप्ताको स्मृतिका लागि दिर्घकालिन रचनात्मक कार्यका लागि सार्वजनिक अपील गरे । स्वर्गिय गुप्ताको स्मरणमा निवास नजिकै चोक नामाकरण गरि शालिक स्थापनाका लागि अगुवाई गरिदिन पत्रकारका संगठनहरुलाई अनुरोध गरे ।
नेपाल प्रेस युनियन बाँकेका अध्यक्ष अर्जुन ओलीले स्वर्गिय गुप्ताको विचार र ब्यक्तित्वलाई पछ्याउन सकेमा नेपाली पत्रकारिता क्षेत्रको उचाई बढ्ने बताए । प्रतिष्ठानका महासचिव शुक्रअषि चौलागाईले सञ्चालन गरेको उक्त सभामा अवधी पत्रकार संघका अध्यक्ष राकेशकुमार मिश्र, प्रतिष्ठानका कानूनी सल्लाहकार राकेशकुमार सोनी, प्रेस मञ्चका उपाध्यक्ष आशीष गुप्ता, सूचना तथा मानवअधिकार अनुसन्धान केन्द्रका अध्यक्ष एवं अधिवक्ता विश्वजित तिवारी लगायतले श्रदासुमन प्रकट गरे ।
गुप्ता नेपाल पत्रकार महासंघ बाँकेको पुर्वअध्यक्ष तथा नेपाल प्रेस युनियन बाँकेको संस्थापक अध्यक्ष हुन् । युनियन बाँकेले संस्थापक अध्यक्ष गुप्ताको सम्मान स्वरुप करिव ५ वर्षअघि प्रेस स्वतन्त्रता सेनानी पन्नालाल गुप्ता राष्टिय पत्रकारिता पुरस्कार स्थापना गरेको थियो । गुप्ताको सम्मान स्वरुप युनियन बाँकेले रथारोहनसहित नागरिक अभिनन्दनका साथै हरेक वर्ष जन्मोत्सव मनाउने गरेको थियो ।
भिडियो हेर्नुस् :
