नेपालगन्ज : नेपालगन्जस्थित भेरी अस्पतालको स्तरवृद्धि गर्नका लागि ब्यवसायिक संरचना हटाउने कार्य बीचमै रोकिएको छ । अस्पतालले दशकौं पुराना ब्यवसायिक संरचना हटाउने कार्य केही महिनाअघि सुरु गरेको थियो । अस्पताल विकास समितिले यि जीर्ण संरचना हटाउँदै गर्दा बीचमै रोकिन पुगेको हो ।
अस्पतालले आधाभन्दा बढी संरचना भत्काइसकेको अवस्थामा बीचमा रोकिएपछि अहिले उक्त अभियान अलपत्र परेको छ । भेरी अस्पताल विकास समितिसँग रेडक्रस सोसाइटी बाँके शाखा र चिकित्सक संघ भेरी शाखाको विवाद अहिले पनि मिलेको छैन । उनीहरु बीचको विवाद अदालतसम्म पुगेको छ ।
अस्पतालले संरचना भत्काउन खोजेपनि रेडक्रस र चिकित्सक संघले संरचना भत्काउन मानेका छैनन् । रेडक्रस र चिकित्सक संघका ती ब्यवसायिक संरचनामा होटल तथा पसलहरु रहेका छन् । भेरी अस्पताल विकास समितिका अध्यक्ष प्रमोद धितालले रेडक्रस र चिकित्सक संघलाई सहमतीमा ल्याएर अगाडी बढ्न खोज्दा ब्यवसायिक संरचना हटाउन ढिलाई भएको बताए ।
‘भेरी अस्पतालको जमिनमा चिकित्सक संघ र रेडक्रसको ब्यवसायिक संरचना बनाइएको छ, अहिले अस्पतालको स्तरवृद्धि गर्ने क्रममा भत्काउन खोज्दा उहाँहरु मान्नु हुदैन,’ उनले भने ‘हामीले रेडक्रसको रक्तसञ्चारलाई विस्थापित नै गर्न खोजेको चाही होइन, अझै ब्यवस्थित गर्न खोज्दैछौं, तर उहाँहरु मान्नु हुदैन ।’
चिकित्सक संघ र रेडक्रसका ती ब्यवसायिक भवन अत्यन्त जीर्ण भइसकेको अध्यक्ष धिताल बताउँछन् । अस्पताल विकास समितिले ब्यवसायिक संरचना हटाउन खोजेपछि चिकित्सक संघ र रेडक्रसले अदालतमा अन्तरिम आदेश माग गर्दै रिट निवेदन दर्ता गराएका थिए । तर, अदालतले उनीहरुको माग बमोजिम अन्तरिम आदेश दिन मानेन् ।
उच्च अदालत तुलसीपुर, नेपालगन्ज इजलासले असोज १२ गते ‘अन्तरिम आदेश जारी गर्नु नपर्ने र कानुन बमोजिम गर्न’ आदेश दिएको थियो । ‘अदालतले पनि उहाँहरुको मागलाई अन्तरिम आदेश दिन मानेन, हामीलाई अदालतबाट कुनै बाधा अड्चन छैन, हामी जतिबेला पनि संरचना भत्काउन सक्छौं, तरपनि सहमतीमै यसको निकास खोज्न तयार छौं,’ अध्यक्ष धितालले भने ।
तत्कालिन अस्पताल विकास समितिले रेडक्रस र चिकित्सक संघलाई उपयोग गर्न मात्र जग्गा दिएको भएपनि उनीहरुले बढी नै जग्गा ओगटेर बसेको र अहिले आएर संरचना हटाउन नमानेको धिताल बताउँछन् । रेडक्रस र चिकित्सक संघको भने फरक बुझाई छ । आफ्ना ब्यवसायिक संरचना भत्काउने हो भने बिरामीलाई अत्यावश्यक पर्ने रक्तसञ्चार सेवा नै बन्द हुने रेडक्रसले चेतावनी दिइरहेको छ । यस्तै चिकित्सक संघले पनि तत्कालन भत्काउन नसकिने जनाएको छ ।
रेडक्रस बाँकेका सभापति गोवद्र्धनसिंह सम्झना भन्छन्, ‘रक्तसञ्चार सेवाको भरपर्दो विकल्प तयार नहुँदासम्म हामी यि भौतिक संरचना भत्काउन सक्दैनौं ।’ भेरी अस्पतालको स्तरोन्नती गर्ने योजना र यसको सुदृढिकरणमा भने आफुहरुको सहयोग नै रहने उनले सुनाए ।
‘भेरी अस्पताल हाम्रो पनि हो, यसको प्रगति नहोस्, विकास नहोस् भन्ने कसैले पनि चाहदैन,’ उनले भने ‘हामीले भेरी अस्पतालका लागि रक्तसञ्चार सेवा दिएर वर्षौदेखी सहयोग गर्दै आएका छौं, हाम्रो आफ्नै जग्गा कारकाँदोमा पनि छ, एक दिन हामी आफ्नो जग्गामा जानैपर्छ, हामी खोजिरहेका छौं, ढिलो चाडो हामी त्यो ठाउँ छाड्छौं, तर अहिले नै छाड्न गाह्रो छ ।’
अस्पताल विकास समितिका सदस्य धनराम ओलीले ब्यवसायिक संरचना मात्र भत्काउन खोज्दा त्यसको यर्थाततालाई अन्यत्रै मोडिएको बताए । ‘अस्पताल अगाडी रहेका अन्य ब्यवसायिक संरचना हटाएर पनि पर्खा निर्माण गर्न ठेक्का दिइसकेका छौं,’ उनले भने ‘चिकित्सक संघ र रेडक्रसले आम्दानी गर्न बनाएका ब्यवसायिक संरचना मात्रै हटाउन बाँकी छ, हामीले रेडक्रसको रक्तसञ्चार केन्द्र रहेको भवन हटाउन खोजेकै छैनौं ।’
रेडक्रस र चिकित्सक संघ सहमतीमा नआउँदा अस्पताल अगाडीका ब्यवसायिक जीर्ण संरचना हटाउने कार्य अधुरो नै हुन पुगेको सदस्य ओलीले सुनाए । नेपालगन्जको सुर्खेत रोडमा चिकित्सक संघ र कारकाँदोमा रेडक्रसकै भवन तथा ब्यवसायिक संरचना रहेकाले उनीहरुलाई अभाव नरहेको उनको भनाई छ ।
