कोहलपुर : गोरखापत्र संस्थानले बाँकेको कोहलपुरबाट आफ्नै प्रेस सञ्चालनमा ल्याएको छ । प्रजातन्त्र दिवसको अवसरमा संस्थानले शनिबारबाट औपचारिक रुपमा प्रेस सञ्चालनमा ल्याएको हो । कोहलपुर नगरपालिका वडा नम्बर ३ मैटहवामा गोरखापत्रको प्रकाशन गृह रहेको छ ।
कोहलपुर प्रकाशन गृहको शनिबार प्रधानमन्त्री शेरबहादुर देउवाले भर्चुअल रुपमा उद्घाटन गरेका हुन् । उद्घाटन शत्रलाई सम्बोधन गर्दै प्रधानमन्त्री देउवाले गोरखापत्र कसैको मुखपत्र नभएको बताए । गोरखापत्रलाई प्रतिस्पर्धात्मक अवस्थामा अझ जिम्मेवार, व्यवसायिक र विश्वसनीय बनाउन आवश्यक रहेको उनको भनाई छ ।
शताव्दी लामो यात्रा पार गरेको गोरखापत्र थुप्रै राजनीतिक र सामाजिक परिवर्तनको साक्षी रहेको देउवाले बताए । वर्तमान डिजिटल युगमा यसलाई थप सन्तुलित र व्यवसायिक बनाउन उनले सुझाव दिए ।
कोहलपुरबाट गोरखापत्रको आफ्नै प्रेस सञ्चालनमा आएपछि गोरखापत्रको उपस्थिति र पहुँच लुम्बिनी, कर्णाली र सुदूरपश्चिम प्रदेशमा पुग्नेमा आफू आशावादी रहेको उनले बताए । सञ्चार तथा सूचना प्रविधिमन्त्री ज्ञानेन्द्रबहादुर कार्कीले पनि भर्चुअल सम्बोधन गर्दै गोरखापत्रले पश्चिम नेपालको कोहलपुरबाट प्रकाशन गर्न लागेको कामले सिंगो नेपाललाई एकताको सुत्रमा बाँध्ने अभियानलाई जोडेको बताए ।
सञ्चार तथा सूचना प्रविधि मन्त्रालयका सचिव डा. बैकुण्ठ अर्यालले गोरखापत्रले आफ्नो सेवा र पहुँचलाई देशभर विस्तार गर्ने उद्देश्यमा नयाँ आयाम थपेकोमा बधाई दिए । विगतमा यसको पहुँच दूरदराजमा पुग्नलाई महिनौं लाग्ने अवस्थालाई अब मुक्ति मिल्ने उनको भनाई छ ।
गोरखापत्र संस्थानका कार्यकारी अध्यक्ष विष्णुप्रसाद सुवेदीले गोरखापत्र एउटा पत्रिका मात्र नभई सभ्यता, संस्कृति र साहित्य बोकेको गौरव र इतिहास भएको बताए । अहिलेको डिजिटल युग सुहाउँदो बनाउन गोरखापत्रलाई सुधार गरेर स्मार्ट गोरखापत्रको रुपमा विकास गर्ने अभियान थालिसकेको उनले बताए ।
सो कार्यक्रममा नेपाल टेलिभिजनका कार्यकारी अध्यक्ष समीरजंग शाह, बाँकेका प्रमुख जिल्ला अधिकारी सुर्यबहादुर खत्री, कोहलपुर नगरपालिकाका नगर प्रमुख लुटबहादुर रावत, बाँकेका प्रहरी प्रमुख(एसपी) श्यामकृष्ण अधिकारी, गोरखापत्रका निमित्त प्रधान सम्पादक शिवकुमार भट्टराई, दी राइजिङ नेपालका निमित्त प्रधान सम्पादक भीमसेन थपलिया, गोरखापत्रका प्रशासन विभागका निमित्ति निर्देशक ओम भुसाल, गोरखापत्र संस्थान सञ्चालक समिति सदस्य राजु महत, कविता अधिकारी लगायतको उपस्थिति रहेको थियो ।
