नेपालगन्ज : नेपाली कांग्रेस बाँकेको निर्वाचनमा खटिएर महत्वपूर्ण भुमिका निभाए वापत निर्वाचन परिचालन समितिका पदाधिकारीलाई सम्मान गरिएको छ । नेपाली कांग्रेस बाँकेको १४ औं जिल्ला अधिवेशनबाट निर्वाचित सभापति, पदाधिकारी, सदस्य र महासमिति सदस्यलाई प्रमाणपत्र वितरण तथा पदभार ग्रहण कार्यक्रममा उनीहरुलाई सम्मान गरिएको हो ।
प्रमुख अतिथी एवम् कांग्रेस केन्द्रीय सदस्य सञ्जय गौतम, अर्का केन्द्रीय सदस्य मैकुलाल बाल्मिकी र कांग्रेस बाँकेकी निर्वतमान सभापति किरण कोइरालाले कार्यक्रममा उपस्थित भएका निर्वाचन परिचालन समितिका संयोजक एवम् प्रमुख निर्वाचन अधिकृत उदयमणि आचार्य, निर्वाचन परिचालन समितिका सदस्य प्रहलाद कार्की, बीरेन्द्र यादव, समितिका सदस्य तथा प्रवक्ता अर्जुन ओली र सदस्य दिवाकर खनाललाई खादा तथा टिका लगाएर सम्मान गरेका हुन् ।
अहोरात्र खटिएर कांग्रेस बाँकेको निर्वाचन शान्तिपूर्ण र निष्पक्ष रुपमा सम्पन्न गर्नमा महत्वपूर्ण भूमिका निभाएकाले सम्मान गरिएको थियो । नेपाली कांग्रेसको निर्वाचन सम्बन्धी निर्देशिका अनुसार कांग्रेसको १४ औं अधिवेशनमा निर्वाचन गराउनका लागि पार्टीका शुभेच्छुक संस्थाहरु प्रजातान्त्रिक कानुन ब्यवसायी संघ (डिएलए), नेपाल शिक्षक संघ, नेपाल प्रेस युनियन र प्रजातान्त्रिक प्राध्यापक संघलाई जिम्मेवारी दिइएको थियो ।
पार्टीको निर्वाचन निर्देशिका बमोजिम कांग्रेस बाँकेको निर्वाचनमा यि चार वटा संगठनका अध्यक्ष एवम् प्रतिनिधीलाई समेटेर प्रमुख निर्वाचन अधिकृतको संयोजकत्वमा जिल्ला निर्वाचन परिचालन समिति गठन गरिएको थियो । उक्त समितिको अगुवाई र अग्रसरतामा पार्टीको वडादेखी जिल्ला तह सम्मको निर्वाचन सम्पन्न गरिएको हो ।
यसअघि प्रमुख निर्वाचन अधिकृतको रुपमा केन्द्रीय निर्वाचन समितिले दाङका वरिष्ठ अधिवक्ता रेवती रमण भट्टराईलाई खटाएको थियो । उनी अस्वस्थ भएपछि बर्दियाका अधिवक्ता उदयमणि आचार्यलाई खटाएर जिल्ला निर्वाचन सम्पन्न भएको हो ।
