निर्मला चौधरी
नेपालगन्ज : लोकतन्त्रवादी कानुन ब्यवसायीको संगठन ‘डेमेक्रेटिक लयर्स एसोसिएसन’ (डिएलए) बाँकेको नयाँ नेतृत्व चयनका लागि निर्वाचन तालिका अझै प्रकाशित भएको छैन । गत चैत २६ गते डिएलए बाँकेले आफ्नो चुनावी अधिवेशन सम्पन्न गरेको थियो । अधिवेशन पश्चात निर्वाचन समितिले कार्यतालिका प्रकाशित गरेर प्रक्रिया अगाडी नबढाउँदा अन्यौलता बढेको हो ।
सर्वसम्मत नेतृत्व चयनका लागि सहजीकरण गर्न वरिष्ठ अधिवक्ता भोलासिंह हमालको संयोजकत्वमा एक समिति बनाइएको छ । उक्त समितिको सदस्यमा अधिवक्ता प्रह्लाद कार्की, प्रमोदबहादुर श्रेष्ठ, गोपीचन्द्र वर्णवाल र लोकबहादुर शाह सदस्य रहेका छन् । तर, उक्त समितिले मंगलबार बेलुकासम्म पनि सहमती जुटाउन सकेको छैन । आगामी नयाँ कार्यकालका लागि डिएलए बाँकेको अध्यक्षमा सुनिलकुमार श्रेष्ठ, निर्वतमान अध्यक्ष ईश्वरीप्रसाद ज्ञवाली, उदयराज बर्मा, शिव श्रेष्ठ, बलबहादुर चन्द र जनकबहादुर शाहीले आकांक्षा राखेका छन् ।
श्रेष्ठ नेपाल बार एसोशियसनका निवर्तमान वरिष्ठ उपाध्यक्ष तथा तत्कालिन पुनरावेदन बार नेपालगन्जका पुर्वअध्यक्ष हुन् । यस्तै डिएलए बाँकेका निर्वतमान अध्यक्ष रहेका ज्ञवाली पुनरावेदन बार नेपालगन्जका पुर्वअध्यक्ष हुन । यसैगरी शिवकुमार उच्च अदालत बार नेपालगन्जका वर्तमान अध्यक्ष तथा चन्द उच्च अदालत बार नेपालगन्जका पुर्वअध्यक्ष हुन । त्यस्तै बर्मा जिल्ला बार बाँकेका पुर्वअध्यक्ष र शाही जिल्ला बार बाँकेका वर्तमान अध्यक्ष हुन् ।
यस्तै उपाध्यक्षमा कर्णबहादुर केसी आकांक्षी देखिएका छन । सचिवमा प्रभाकर भट्टराईसहित पूनम श्रेष्ठ, गोपाल गिरी, राकेशकुमार सोनी र युगबहादुर गुरुङले आकांक्षा राखेका छन । यसैगरी कोषाध्यक्षमा मो. अयुव सिद्धिकी, सतिशचन्द्र थारु, मो. रिजवान अहमद मिर्जा र यशोदा कुमारी उपाध्याय तथा सदस्यमा विश्वजीत तिवारी, केवल सिंह थारु, राघव कार्की, श्रीकृष्ण थारु, देबीमाया खत्री, मिरा ददेल लगायतले आकांक्षा राखेका छन् ।
निर्वतमान अध्यक्ष ज्ञवाली पुनः दोहोरिन खोज्दा अन्य आकांक्षीले नमानेपछि सर्वसम्मत नेतृत्व चयनमा सहमति जुट्न नसकेको स्रोतले जनाएको छ । नेतृत्व परिवर्तन गर्नुपर्ने डिएलएभित्र अधिकांसको जोड छ । उनीहरुले सहमति नभए निर्वाचन प्रक्रियामा लैजानुपर्ने र मतदानबाट नेतृत्व छान्ने अधिकार कानुन ब्यवसायीलाई दिनुपर्ने माग पनि गरेका छन् ।
प्रमुख निर्वाचन अधिकृत (अधिवक्ता) गणेशकुमार रेग्मीले सहजीकरण समितिको समयावधि मंगलबार बेलुकासम्म रहेको र समितिले सर्वसम्मत नेतृत्व चयनमा सहमती जुटाउन नसकेपछि अब निर्वाचन प्रक्रिया सुरु हुने बताए । ‘सहमती नभएमा समितिले मलाई एउटा रिपोर्ट दिनेछ, त्यसपछि बुधबार निर्वाचन तालिका सार्वजनिक हुन्छ, सबैबाट सहमती गराएर अगाडी बढ्ने क्रममा ढिलाई भएको हो,’ उनले भने । संस्थाको आन्तरिक अधिवेशन भएका कारण निर्वाचन समिति लचिलो बनेको रेग्मीले सुनाए ।
