नेपालगन्ज : नेपालगन्ज उपमहानगरपालिकाको मुट मानिने बीरेन्द्र चोक । पछिल्लो समयमा धम्बोझी चोकका नामले पनि उत्तिकै परिचित ठाउँ हो ।
यहाँ कुनैबेला स्वर्गिय राजा बीरेन्द्रको शालिक थियो । जनआन्दोलन २०६२/६३ ताका उक्त चोकमा रहेको बीरेन्द्रको शालिक तोडफोड भयो । त्यसयता शालिक बिहिन अवस्थामा रहेको चोक कुरुप अवस्थामा थियो । यही चोकमा राजसंस्था पक्षधर र राप्रपाले दुई पटक शालिक राख्न खोज्दा स्थानीय प्रहरी प्रशासनले हटाइदिएको छ ।
यसअघि करिव दुई वर्षअघि पनि उक्त चोकमा शालिक राख्ने प्रयास असफल भएको थियो । राजावादी र राप्रपाका नेता, कार्यकर्ताले बिहीबार बिहान उक्त चोकमा स्वर्गीय राजा बीरेन्द्रको शालिक राखेका थिए । शालिक राखेको एक घण्टा बित्न नपाउदै स्थानीय प्रहरी, प्रशासनले बल प्रयोग गरि हटाउन खोज्दा झडप भयो ।
सो क्रममा प्रहरीले केही राउण्ड हवाई फायर समेत गरेको थियो । केही सुरक्षाकर्मी र सर्बसाधारण समेत घाइते भए । स्वर्गिय राजाको शालिक राख्न नपाएको भिडले सहिद सेतु बिकको शालिकमाथी तोडफोड गर्यो । स्थानीय प्रहरी प्रशासनले स्वर्गिय राजा बीरेन्द्रको शालिक हटाएको विषयमा बहस चलेको छ । अधिकांसले शालिक हटाएकोप्रति बिरोध गरेका छन् ।
सामाजिक सञ्जालमा आक्रोश ब्यक्त भएको देखिन्छ । अधिकांसले स्वर्गिय राजा बीरेन्द्रको शालिक पुनःस्थापना गर्न नदिएर इतिहास मेटाउन खोजेको आरोप लगाएका छन् । स्थानीय प्रहरी प्रशासनले शालिक हटाएपछि अहिले धम्बोझी अर्थात् बीरेन्द्र चोक पुनः कुरुपतामा परिणत भएको छ ।
सहमतिबाट शालिक स्थापना गर्ने सहमती
नेपालगन्जमा सहमतिबाट मात्रै राजा वीरेन्द्रको शालिक स्थापना गर्न दलहरू सहमत भएका छन् । जिल्ला प्रशासन कार्यालय बाँकेको आव्हानमा भएको सर्वदलीय बैठकले सबैको सहमतिमा मात्र शालिक राख्ने निर्णय भएको हो ।
राष्ट्रिय प्रजातन्त्र पार्टी बाहेकका दलहरूको उपस्थितिमा भएको बैठकले सामाजिक सद्भावमा खलल नआउने गरि नेपालगन्ज उपमहानगरपालिकामा बसी निर्णय गरेर मात्र बीरेन्द्रको शालिक स्थापना गर्ने निर्णय गरेको हो । दरबार हत्याकाण्ड भएको २१ वर्षपछि जेठ १९ गतेको अवसर पारेर राजावादी समुह र राप्रपाका नेता कार्यकर्ताले बिहीबार बिहान शालिक स्थापना गरेका थिए ।
