नेपालगन्ज : राप्ती सोनारीमा नदीजन्य सामाग्रीको अबैध उत्खनन् रोक्न सक्रिय भएका जनप्रतिनिधीलाई विवादमा ल्याउन खोजिएको छ । राप्ती सोनारी गाउँपालिका वडा नम्बर ६ का वडाअध्यक्ष लवराज खरेललाई विवादमा ल्याउन खोजिएको हो ।
ब्यक्तिगत प्रयोजनका लागि दुई वर्षअघि आफुले खरिद गरी घर छेउमा राखेको नदीजन्य पदार्थलाई देखाएर केही ब्यक्तिले आफुलाई विवादित बनाउन खोजेको वडाअध्यक्ष खरेल बताउँछन् । ‘पर्खाल बनाउने प्रयोजनका लागि मेरो घर पछाडी ग्राभेल थुपारेको थिए, अघिल्लो आर्थिक बर्ष खल्ला टपरी घाटको स्वीकृत टेण्डर ‘टिका निर्माण सेवा’ सँग मैले पाँच हजार रुपैयाँका दरले ३० टिप्पर खरिद गरेको थिए, यो मेरो घरको पर्खाल निर्माण गर्ने प्रयोजनका लागि राखेको हो, बिक्री गर्ने प्रयोजनका लागि होइन,’ उनले भने ‘जनप्रतिनिधी भइसकेपछि जब यहाँका नदी र खोलामा अबैध उत्खनन् रोक्न लाग्यौें, हाम्रा विरुद्ध भ्रमपूर्ण कुरा गरेर विवादमा ल्याउन केही ब्यक्तिहरु लागेका छन् ।’
विधि र प्रक्रियामा ल्याउँदा सुरुमा धेरैलाई नराम्रो लागेपनि कालान्तरमा त्यसले सबैलाई फाइदा गर्ने बताए । नदीजन्य सामाग्रीको अबैध उत्खनन् रोकेर बैधानिक रुपले ब्यवसाय गर्ने वातावरण सिर्जना गर्न खोज्दा केहीलाई अप्ठ्यारो लागेको खरेलले सुनाए ।
‘हामीले सिस्टममा लैजान खोज्दा केहीलाई अप्ठ्यारो लागेको छ, अहिले उल्टै हामीलाई पनि विवादमा ल्याउने प्रयास गरिरहेका छन्, सत्य कुरा के हो, जनताले प्रष्ट रुपमा थाहा पाइसकेका छन्,’ उनले भने । आफु गाउँ कार्यपालिकाको नीति र नियम अनुसार चल्ने खरेलको भनाई छ । केही समयअघि उनले दुई वटा जेसिवी नियन्त्रणमा लिएर स्थानीय प्रहरीलाई बुझाएका थिए । तर, प्रहरीले दुबै जेसिवीलाई छाडेको खरेलले गुनासो गरेका थिए ।
राप्ती सोनारी ६ का स्थानीयले पनि वडाअध्यक्ष खरेलले जनप्रतिनिधी भएर आइसकेपछि राम्रो काम गरेको र उनलाई सहयोग गर्नुपर्नेमा केही ब्यक्तिहरुबाट उल्टो असहयोग हुन थालेको बताएका छन् । 'वडाअध्यक्षले नियम कानुन अनुसार चलाउन खोज्नु भएको छ, तर उहाँले थालेको काममा सहयोग होईन, उल्टै असहयोग भइरहेको छ, उहाँलाई केहीले बिवादमा ल्याउन खोजेका छन्,' एक स्थानीले भने ।
