बाँके(राप्ती सोनारी) : राप्ती सोनारी गाउँपालिका अध्यक्ष तप्त पौडेलले गाउँपालिकले प्रवाह गर्ने सेवा पहुँच भन्दा पनि नियम संगत रुपमा हुने बताएका छन् ।
राप्ती सोनारी गाउँपालिकाको आयोजना, प्रदेश प्रशिक्षण प्रतिष्ठान लुम्बिनी प्रदेशको सहयोग तथा बास नेपालको सहजिकरणमा शुक्रबार गाउँपालिकाको प्राङ्गणमा आयोजित सार्वजनिक सुनुवाईमा आम गाउँपालिकाबासीका बीच अध्यक्ष पौडेलले यस्तो बताएका हुन् ।
गाउँपालिकाभित्र हुने हरेक काम गुणस्तरीय हुनेमा शंका नगर्न अनुरोध गर्दै उनले गुण्स्तरीय काम नगर्नेले सेवा नपाउने बताए । गाउँपालिकाले पारदर्शिता र जवाफदेहिता प्रर्वद्धनलाई प्राथमितामा राखेर काम गर्ने उनको भनाइ छ । सरोकारवाला र नागरिकहरु बीचमा झण्डै दुई घण्टा जति भएको दोहोरो प्रस्नोत्तरपछि गाउँपालिकाको समग्र विकासका बिषयमा ६ बुदें साँझा प्रतिबद्धता घोषणा गरिएको छ ।
यसरी गरिएका प्रतिबद्धतामा बेरोजगार युवालाई लक्षित गरि सिप मुलक तालिम सञ्चालन गर्ने र व्यवसाय सञ्चालन गर्न चाहने युवालाई उत्कृष्ट योजनाका आधारमा अनुदान ब्यवस्था गर्ने, आर्थिक बर्ष २०७८/७९ को बार्षिक बजेट पूर्ण रुपमा खर्च हुन नसकेको पाइएकाले विनियोजित बजेट शतप्रतिशत खर्च गर्ने गरी समयमा नै पारदर्शी रुपमा सम्पन्न गर्ने, लक्षित बर्ग उत्थान कार्यक्रमलाई प्रभावकारी र पारदर्शी रुपमा सञ्चालन गर्ने, वडा नम्बर २ मा सञ्चालित निर्माणाधिन बाटोको काम प्रभावकारी नभएको भन्ने गुनासो आएकाले यथाशक्य योजनाको अनुगमन गर्ने रहेका छन् ।
यस्तै गाउँपालिकाको सुचना प्रवाहलाई थप चुस्त दुरुष्त बनाउन सूचना शाखालाई प्रभावकारी बनाउने साथै आम नागरिकसम्म सूचना पुर्याउन विविधता अपनाउने, हाल गाउँपालिकामा सञ्चालित योजनामा प्राविधिक त्रुटी देखिएको, योजनाको फिल्ड अनुगमन बिना नै फच्र्यौट हुने गरेको भन्ने गुनासो आएकाले प्रभावकारी फिल्ड अनुगमनको प्रतिवेदनपछि मात्रै फच्र्यौट गर्नका लागि सिफरिस गर्ने प्रतिबद्धता गरिएको छ ।
यसरी गरिएका प्रतिवद्धताहरुमा गाउँपालिका अध्यक्ष पौडेल, उपाध्यक्ष मनिषासिंह थारु, प्रमुख प्रशासकीय अधिकृत सिंहराज डाँगी, वडा अध्यक्षहरु यमबहादुर खड्का, मिनराज खड्का, झगरु थारु, लवराज खरेल, रामलखन थारु, शालिकराम डाँगी, कार्यपालिका सदस्य केशबराज दमाई, राधिका सुनार, विभिन्न शाखाका प्रमुखले हस्ताक्षर गरेका थिए ।
बासका निर्देशक हेमराज भट्टले स्वागतसँगै सार्वजनिक सुनुवाइको उद्धेश्यमाथि प्रकाश पारेका थिए । उक्त कार्यक्रमको सुरुवातमा गाउँपालिकाले गरेका काम तथा आगामी योजना बारे गाउँपालिका अध्यक्ष पौडेलले जानकारी गराएका थिए ।
बासका श्रोत व्यक्ती मन भण्डारीले सहजीकरण गरेको उक्त कार्यक्रममा २ सय बढीको सहभागिता रहेको थियो, भने स्थानीय रेडियो भुवर भवानी ९८.८ मेगाहर्जले प्रत्यक्ष प्रशारण गरेको थियो ।
