कोहलपुरमा गडरिया दम्पत्तीको हत्या, शंकास्पद ब्यक्ति नियन्त्रणमा

समाज

Home
समाज
कोहलपुरमा गडरिया दम्पत्तीको हत्या, शंकास्पद ब्यक्ति नियन्त्रणमा

कोहलपुरमा गडरिया दम्पत्तीको हत्या, शंकास्पद ब्यक्ति नियन्त्रणमा

कोहलपुर : कोहलपुर नगरपालिका वडा नम्बर १४ स्थित पार्वतीपुरमा मंगलबार एक दम्पतीको ‘हत्या’ भएको छ । आफ्नै घरमा २५ वर्षका कृष्णकुमार गडरिया र उनकी २३ वर्षीया पत्नी अञ्जली गडरियाको सोमबार राती हत्या भएको हो । इलाका प्रहरी कार्यालय कोहलपुरका प्रमुख एवम् प्रहरी नायब उपरीक्षक ऐनबहादुर मल्लले दम्पत्तीको हत्या नै भएको बताए ।

घटनाको अनुसन्धान गरिरहेका मल्लले दम्पत्तीको हत्या भएपनि कस्ले र किन गर्यो भन्नेमा अहिले एकिन नभएको बताए । घटनाको वास्तविकता पत्ता लगाउन विभिन्न संयन्त्र परिचालन गरिएको उनको भनाई छ । ‘उनीहरुको हत्या नै भएको हो, तर कस्ले र किन हत्या गर्यो भन्ने बारे अनुसन्धान भइरहेको छ,’ मल्लले भने ।

घटनामा संलग्न रहेको आरोपमा केही ब्यक्तिलाई नियन्त्रणमा लिएर सोधपुछ गरिएको छ । प्रहरीका अनुसार मृतक दम्पत्ती घरको कोठामा र उनका दाई र भाउजु छतमा सुतेका थिए । मंगलबार बिहान अबेला सम्म पनि उनीहरु नउठेपछि आफन्तले प्रहरीलाई खबर गरेका थिए । उनीहरुबीच एक वर्षअघि मात्र विवाह भएको बताइएको छ ।

मृतक कृष्णको मुखबाट रगत निस्केको र दायाँ हातमा चोट लागेको प्रहरीले जनाएको छ । जिल्ला प्रहरी कार्यालय बाँकेका प्रवक्ता एवम् प्रहरी नायव उपरिक्षक मधुसुदन न्यौपानेले घटनाको सुक्ष्म रुपले अनुसन्धान भइरहेको बताए । घटनाका विषयमा शंकास्पद ब्यक्तिलाई सोधपुछ गरिरहेको र वास्तविकता चाडै पत्ता लाग्ने बताए ।

‘घटनाको वास्तविकता विस्तृत रुपमा अनुसन्धान गरिसकेपछि मात्रै थाहा हुन्छ,’ न्यौपानेले भने ‘घटनाको अनुसन्धान भइरहेको छ ।’

प्रकाशित मिति: मंगलबार, साउन १०, २०७९ १५:१०

प्रतिक्रिया दिनुहोस्