कोहलपुर : कोहलपुरको पार्वतीपुरमा गडरिया दम्पत्ती हत्याकाण्डमा संलग्न दुई जना अभियुक्तलाई प्रहरीले पक्राउ गरेर अनुसन्धान सुरु गरेको छ ।
कोहलपुर नगरपालिका वडा नम्बर १४ का २५ वर्षीय कृष्ण गडरिया र उनकी २३ वर्षीया पत्नी अञ्जलीको मंगलबार बिहान आफ्नै घरमा हत्या गरिएको अवस्थामा शव फेला परेको थियो । ती दम्पत्तीको हत्यामा नेपालगन्ज उपमहानगरपालिका वडा नम्बर १९ सूर्जीगाउँका १९ वर्षीय राजन सोनकर र वडा नम्बर १८ लग्दहवाका २६ वर्षीय सकिल अली शेषको संलग्नता पुष्टी भएको इलाका प्रहरी कार्यालय कोहलपुरका प्रमुख (डिएसपी) ऐनबहादुर मल्लले जानकारी दिए ।
पक्राउ परेका आरोपीले प्रहरी समक्ष घटना स्वीकारिसकेको उनले बताए । गडरिया दम्पत्तीको एक वर्ष पहिले मात्र बिबाह भएको थियो । कृष्णका सहोदर दाजु विजयकुमार र उनकी पत्नी रेखाको योजनामा नेपालगन्जका ‘कन्ट्याक्ट किलर’ प्रयोग भएको तथ्य पनि प्रहरीले पत्ता लगाएको छ ।
‘डेढ महिना अघि नै दुई लाख रुपैयाँ उनीहरूले बुझिसकेका रहेछन, घटना हुनुभन्दा अघिल्लो दिन ५० हजार दिएको रहेछ, बाँकी साढे दुई लाख केही समयपछि दिने कुरा भएको तथ्य अनुसन्धानबाट खुलेको छ,’ मल्लले भने।
पाँच लाखमा भाइ बुहारीको हत्या गर्न भनेर ‘कन्ट्रयाक्ट किलर’ हरूलाई दाजु विजयकुमारले ‘सुपारी’ दिएर योजना बनाएको तथ्य खुलेको डिएसपी मल्लले बताएका छन् । पक्राउ परेका राजनबाट कटुवा पेस्तोल र चार राउण्ड गोलीसमेत बरामद भएको प्रहरीले जनाएको छ ।
राजनले घटना गराउँदा उक्त नलकटुवा पेस्तोल लगेको भएपनि प्रयोग नभएको र घर नजिकै बारीमा लगेर गाडेको अवस्थामा बरामद भएको प्रहरीले जनाएको छ । गडरिया दम्पत्तीको हत्या घाँटीमा डोरीले कस्दा निस्सासिएर तथा हातको नशा समेत काटिएको हुँदा अत्यधिक रक्तश्रावबाट भएको पोष्टमर्टम रिपोर्टबाट देखिएको छ ।
