नारायण वली
रुपन्देही : दश बर्षे शसस्त्र द्धन्द्ध, ०६२/६३ को जनआन्दोलन, राजसंस्थाको अन्त्य र मधेश आन्दोलन पश्चात देशको बद्लिदो राजनीतिक गतिले सिंगो नेपाललाई २०७३ साल तिर सात वटा प्रदेशमा विभाजित गरायो । एउटा संघिय राजधानी सहित अहिले देशमा ७ वटा प्रदेश राजधानी रहेका छन ।
जनताले संघियताको स्वाद चाखेको पनि ५ बर्ष बितिसकेको छ । पछिल्लो समय सामाजिक सञ्जाल र बिभिन्न ठाउँ र चोकहरुमा संघियता र धर्मनिरपेक्षता खारेज हुनुपर्ने जनविरोध एंव प्रदेश संरचना हटाएर देशमा स्थानिय तह र केन्द्रिय राजधानी भए पुग्ने गुनासो बढिरहेका बेला दाङका एक युवा भने पुर्वपश्चिम राजमार्गमा संघीयता र धर्म निरपेक्षता खारेजी विरुद्ध कठोर पैदल यात्रामा निस्किएका छन् ।
देश संघियतामा गएपनि तर भौतिक रुपमा विकास भने नभएको होईन । दाङको तुलसीपुर उपमहानगरपालिका–११ जसपुरका झनक बस्नेतले काठमाण्डौंसम्मको यात्रा थालेका हुन् । लुम्बिनी प्रदेशको पश्चिम जिल्ला बर्दिया र कर्णाली प्रदेशको राजधानी सुर्खेत सिमामा पर्ने बबई नदीदेखि सल्यानको कालिमाटी गाउँपालिका हुँदै दाङको बबई गाउँपालिकाबाट उनले यात्रा सुरु गरेका थिए ।
संघियताले देश र जनतालाई मारमा पारेको र धर्म परिवर्तनले हिन्दु धर्मको राज्य भनेर चिनिने नेपाल धर्मका नाममा बिखण्डन हुँदै गएको भन्दै संघिय राजधानी पुगेर केही ज्ञापन पत्र बुझाउने योजना रहेको पैदल यात्री बस्नेतले बताए ।
यही साउन ४ गतेदेखि यात्रा तय गरेका बस्नेत ११ औं दिनको पैदल यात्रापछि आइतबार लुम्बिनी प्रदेशको अस्थायी मुकाम बुटवल आईपुगे ।
उनलाई बुटवल उपमहानगरपालिका-११ न्यु दुर्गानगर टोल विकास समितिले बुटवल–२ पाखापानीस्थित मनकामना मन्दिर नजिक यात्राको सफलताको कामना गर्दै अबिर र माला लगाएर स्वागत गरे । टोलका युवा लिलाधर बिकको नेतृत्वमा आएको टोलविकास समितिका धेरै जसो महिलाहरुको सहभागिता हरेको थियो ।
२०४१ साल मंसिर २५ गते जसपुरमा जन्मिएका बस्नेतले २०५६ सालदेखि सक्रिय रुपमा राजनीतिक यात्रा सुरु गरेको सुनाए । विभिन्न संघ, संस्थामा रहँदै आएका उनी हाल नेपाली कांग्रेसको तुलसीपुर नगर कार्य समितिका सहसचिव छन् ।
काठमाण्डौं सम्मको पैदलयात्रामा निस्किएका बस्नेतको संघियता बिनाको हिन्दु राष्ट्र कायम हुनुपर्ने र संघियतालाई हटाउनु पर्ने माग रहेको छ । दुई वटा मागको ज्ञापनपत्र बुझाएर दबाब दिने उद्देश्यले पैदलयात्रा मार्फत सरकारलाई ध्यानाकर्षण गराउने जनाए । आईतबार बुटवल आएका बस्नेतलाई पत्रकारहरुले ज्ञापनपत्र बुझाउनलाई पैदल यात्रा नै गर्नुपर्ने थियो र ? भन्ने सोधेको जिज्ञासामा उनले भने, ‘संघीयता देश र जनताको हितमा छैन् । हिन्दु राष्ट्र आजको आवश्यकता हो त्यसैले ‘शक्तिकेन्द्रको स्वार्थमा ल्याइएको संघियता र धर्म निरपेक्षताको विरोध स्वरुप सरकारको कानसम्म पुगोस् भनेर पैदलयात्रा थालेको बताए ।
नेपाली कांंग्रेसका प्रभावशाली नेता स्व. खुम बहादुर खड्काले लिएको संघियता र धर्म निरपेक्षताको अठोटलाई अभियान स्वरुप सार्थक बनाउनका लागि पैदलयात्रा थालेको सुनाए । पैदल यात्रालाई काठमाडौंस्थित पशुपति नाथको मन्दिरमा पुगेर बिट मार्ने निधो गरेका बस्नेतले नेपाली काँग्रेसका महामन्त्रीद्धय विश्वप्रकाश शर्मा, गगनकुमार थापा र समय मिलेसम्म नेपाली कांग्रेस सभापति तथा प्रधानमन्त्री शेरबहादुर देउवालाई समेत भेटेर ज्ञापन पत्र बुझाउने योजना रहेको बताए ।
