- तीन वर्षदेखी छैन बिद्यालयको लेखापरिक्षण
- ब्यवस्थापन समिति अध्यक्षले नै चलाउँछन् बिद्यालयको खाता
निर्मला चौधरी/बाँके (फत्तेपुर) : राप्ती सोनारी गाउँपालिका वडा नम्बर ६ मा रहेको सरस्वती माध्यामिक बिद्यालय पनेरियामा बेथिती बढेको छ । बिद्यालयले विगत तीन वर्षदेखी लेखा परिक्षण समेत गरेको छैन । यस्तै दुई वर्षदेखी बिद्यार्थीलाई छात्रबृत्ती वितरण गरिएको छैन ।
बिद्यालयमा बढेको बेथितीका कारण शैक्षिक गुणस्तर खस्किनुका साथै आर्थिक सुशासन समेत कायम हुन नसकेको अभिभावक बताउँछन् । बिद्यालयमा कार्यरत कतिपय शिक्षकले लामो समयदेखी तलब खान पाएका छैनन्, भने केही शिक्षकले बिद्यालयमा अध्यापन गरिरहँदा समेत नियुक्ती पत्र पाएका छैनन् । बिद्यालयमा एउटै ब्यक्तिले बिद्यालय ब्यवस्थापन समितिको अध्यक्ष भएर चलाइरहने, प्रधानाध्यापक फेरबदल भइरहने, बिद्यालयको हिसाब किताब भद्रगोल हुन थालेपछि अभिभावकले असन्तुष्टी ब्यक्त गरेका हुन् ।
बिद्यालयमा मौलाएको बेथिती रोक्न यतिबेला वडा नम्बर ६ का वडाअध्यक्ष लवराज खरेल सक्रिय भइरहेका छन् । विगत २२ वर्षदेखी बिद्यालय ब्यवस्थापन समितिको अध्यक्ष हुँदै आएका राजकुमार बुढाकै हस्ताक्षरमा बिद्यालयको खाता सञ्चालनमा छ । जबकी नियम अनुसार बिद्यालयको खाता प्रधानाध्यापक र लेखापालको संयुक्त हस्ताक्षरमा चलाउनुपर्छ । तर, उक्त बिद्यालयमा ब्यवस्थापन समितिका अध्यक्ष र प्रअको संयुक्त खाता चलिरहेको छ ।
‘म यो बिद्यालयलाई सुधार्ने अभियानमा छु, केही ब्यक्तिहरु मेरो अभियानलाई बाधा पुर्याउन खोज्दैछन्,’ खरेलले भने ‘गाउँपालिका अध्यक्ष तप्तबहादुर पौडल ज्यूले पनि मलाई पुरै सहयोग गर्नु भएको छ, राम्रो काममा सबैको साथ पाइएको छ ।’ बिद्यालयमा बेथिती बढिरहँदा वडा कार्यालय टुलुटुलु हेरेर नबस्ने उनको भनाई छ ।
विगतमा बिद्यालय ब्यवस्थापन समितिका अध्यक्षले आर्थिक अनियमितता गर्नका लागि धमाधम गुणस्तरहिन भवन मात्र बनाउन ध्यान दिएको तर, शिक्षाको गुणस्तर खस्किएको खरेल बताउँछन् । बिद्यालयको ब्यवस्थापन कमजोर हुँदा कार्यरत प्रधानाध्यापक र शिक्षकहरु मनपरी रुपले चलेको उनले सुनाए । बिद्यालयमा बढेको बेथिती रोक्न गाउँपालिका शिक्षा शाखा पनि आँखा चिम्लेर बसेको भन्दै अभिभावकको गुनासो छ ।
करिव तीन वर्षअघि उक्त बिद्यालयमा ईन्द्र ओली प्रधानाध्यापकको जिम्मेवारीमा थिए । त्यहाँ बसेर बिद्यालय ब्यवस्थापन समितिसँग काम गर्ने वातावरण नबनेपछि उनले प्रधानाध्यापक पदबाट राजिनामा दिएका थिए । ओलीले बिद्यालयमा कार्यरत रहँदा लेखा परिक्षण गराउन सकेनन् । बिद्यालयको गन्जागोल हिसाब मिलाउन नसकेपछि उनी प्रधानाध्यापक पदमा बसिरहन नसकेका हुन् ।
बिद्यालयले त्यसपछि शिक्षक मुकेश यादवलाई प्रधानाध्यापकमा नियुक्त गर्यो । उनले पनि लेखा परिक्षण गराउन सकेनन् । त्यसपछि मुकेश पनि धेरै समय सम्म टिकेनन् । मुकेशको राजिनामा पछि ब्यवस्थापन समितिले सुर्य कार्कीलाई प्रधानाध्यापकमा नियुक्त गर्यो ।
प्रअ कार्की र बिद्यालय ब्यवस्थापन समितिका अध्यक्ष बुढाको संयुक्त हस्ताक्षरमा खाता सञ्चालन गरियो । तर, कार्की पनि नियमित रुपमा बिद्यालय आउन छाडे । ‘पछिल्लो समयमा प्रधानाध्यापक सुर्य कार्की बिद्यालयमा ५७ दिनसम्म पनि अनुपस्थित भएको रेकर्ड देखियो,’ वडाअध्यक्ष खरेलले भने ‘बिद्यालयमा आएर बिहान र बेलुकाको हाजिरी एकै चोटी गर्ने, आफ्नो जिम्मेवारीबाट पन्छिन थालेको पाइयो ।’ बिद्यालयमा अनियमित हुने प्रअ कार्कीले केहीदिन अघि प्रअ पदबाट राजिनामा दिइसकेका छन् ।
स्वास्थ्यको समस्या देखाउँदै कार्कीले दिएको राजिनामा स्वीकृत गरेर बिद्यालयले पुनः अर्का प्रधानाध्यापकलाई नियुक्त गरिसकेको जनाएको छ । तीन वर्षदेखी बिद्यालयको लेखा परिक्षण नभएकै कारण माबि तहका शिक्षक महारुप जैशी र निमाबि तहका शिक्षक जितबहादुर जिएमले प्रअको जिम्मेवारी लिन नमानेको वडाअध्यक्ष खरेलको भनाई छ । विगत २२ वर्षको अवधिमा करिव १२ जना प्रधानाध्यापक फेरबदल भइसकेको बताइएको छ ।
यता बिद्यालय ब्यवस्थापन समितिका अध्यक्ष बुढा भने वडाअध्यक्ष खरेलको आरोपप्रति सहमत छैनन् । फुसको छानो भएको बिद्यालयलाई अगाडी बढाएर आफुले यहाँसम्म ल्याएको र बिद्यालय सञ्चालनका क्रममा राजनीतिक हस्तक्षेप गरेर समस्या सिर्जना गर्न खोजेको लगाएका छन् । ‘बिद्यालयलाई यो अवस्थासम्म ल्याउन मेरो धेरै रगत र पसिना बगेको छ, त्यो कुरालाई भुल्नु हुदैन,’ उनी भन्छन् ।
