नेपालगन्ज : बाँकेस्थित नेपाल-भारत सिमा नाकाबाट भन्सार छलेर अबैध सामान भित्रिने क्रम बढेको छ । सिमा क्षेत्रमा खटिएका सुरक्षाकर्मी र भन्सार कर्मचारीकै मिलेमतोमा भारतको रुपैडिहाबाट तस्करले खुलेआम विभिन्न सामान अबैध रुपमा नेपालगन्ज भित्र्याउने गरेका हुन् ।
सुरक्षाकर्मी र कर्मचारीको संरक्षणमा तस्करहरुले मुख्य नाका जमुनाहा र आसपासमा रहेका अन्य अबैध नाकाबाट दिनहुँजसो सामान भित्र्याउने गरेको प्रत्यक्षदर्शीले बताएका छन् । भारतीय बजार रुपैडिहाबाट मालबाहक सवारी साधन, अटोरिक्सा, मोटरसाईकल, स्कुटर, साईकल प्रयोग गरी तस्करले लत्ता कपडा, खाद्यान्न र मोटर पाट्र्स सामान भन्सार छलेर भित्र्याउने गरेका हुन् ।
उनीहरुलाई सुरक्षाकर्मीले नै पहरा दिएर गन्तब्यतर्फ पठाउने गरेको प्रत्यक्षदर्शीले बताए । सशस्त्र प्रहरीको चेकपोष्ट चौलिकाबाट उक्त अबैध बाटो करिव २ मिटरको मात्र दुरिमा रहेको छ । यस्ता अन्य अबैध बाटोबाट दिनहुँ तस्करी भइरहेको छ ।
बाँकेमा नेपाल प्रहरी र सशस्त्र प्रहरी बलले सिमा सुरक्षा र भन्सार सुरक्षा गस्तीको काम गर्दै आएका छन । नेपालगन्जको जमुनाहा नाकादेखी चौलिका चोकसम्म करिव आधा दर्जन स्थानमा प्रहरी र सशस्त्र प्रहरीको चेक प्वाइन्ट राखिएको छ ।
प्रहरी र सशस्त्र प्रहरीको कार्यालय तथा चेकपोष्ट आसपासकै क्षेत्रबाट भन्सार छलेर सामान तस्करी हुने गरेको हो । ‘तस्करीको सामान अचेल दिनहुँ खुलेआम रुपमा भित्रिरहेको छ,’ चौलिकाका स्थानीयले भने ‘मुख्य सडकमा सुरक्षाकर्मी र कर्मचारीले चेकजाँच गरेको देखिन्छ, तर उनीहरुकै पछाडी भित्री बाटोबाट दिन दहाडै सामान तस्करी भइरहेको छ, सामान तस्करी भएको देखेपनि नदेखे जस्तो बहाना गर्छन् ।’ सेटिङ नमिलेका सामान मात्र सशस्त्र प्रहरीले जफत गरेर भन्सार कार्यालयलाई बुझाउने गरेको ति स्थानीयले बताए ।
सुरक्षाकर्मी मात्र नभएर भन्सारका केही कर्मचारीले पनि तस्करसँग सेटिङ मिलाएको प्रत्यक्षदर्शीको आरोप छ । यस्तै तस्करसँग मासिक रुपमा रकम नै बुझेर सशस्त्र प्रहरीका उच्च अधिकृतले पनि भारतबाट लत्ता कपडा, खाद्य सामाग्री तथा मोटरपाट्र्स भित्र्याउने काम गरिरहेको स्रोतले जानकारी दिएको छ ।
‘तस्करीमा संलग्न ब्यक्तिले मासिक रुपमा पैसा बुझाउँछन, उनीहरुलाई सशस्त्र प्रहरीका हाकिमहरुले संरक्षण दिइरहेका छन,’ एक स्थानीयले नाम नछाप्ने र्शतमा भने । स्रोतका अनुसार रातको समयमा भारतबाट तस्करी भएर आउने सामानलाई नेपालगन्जसम्म सहज रुपमा पुर्याउन सशस्त्र प्रहरीका उच्च अधिकृतले आफ्ना जुनियर कर्मचारीलाई समेत खटाउने गरेका छन् ।
सशस्त्र प्रहरी बल नम्बर ३० गण बागेश्वरी बाँकेका प्रमुख एवं सशस्त्र प्रहरी उपरीक्षक जनकराज बस्नेत भने आफू आएपछि तस्करी पुरै नियन्त्रणमा आएको दाबी गर्छन् । सिमा क्षेत्रमा तस्करी नियन्त्रणमा आएको र तस्करीमा सुरक्षाकर्मीको संलग्नता नरहेको उनको जिकिर छ ।
