नेपालगन्ज : बीचमै काम छाडेर ठेकेदार भागेपछि जानकी गाउँपालिकाको प्रशासनिक भवन अलपत्र परेको छ । प्रशासनिक भवन निर्माणको काम समयमै सम्पन्न नहुँदा कार्यालयको कामकाज गर्न समस्या भइरहेको छ । गाउँपालिकाको विभिन्न शाखाले दिने सेवा एउटै कोठा (हल) बाट दिने गरिएको छ ।
तीन तल्ले सुविधा सम्पन्न प्रशासनिक भवन बनाउन गाउँपालिकाले ५ करोड ९७ लाख रुपैयाँको लागत अनुमानमा ४ करोड २२ लाख ८४ हजार ८ सय १७ रुपैयाँमा ठेक्का सम्झौता गरेको थियो । ठेकेदार कम्पनी ‘ठेगिम/श्रीकृष्ण/निशान जेभी’ कोहलपुर-११ बाँकेसँग २०७७ माघ २६ गते ठेक्का सम्झौता भएको हो ।
सम्झौताको म्याद २०७९ माघ ३० गते सम्म रहेपनि अहिलेसम्म ५० प्रतिशत मात्र काम सम्पन्न गरेको कार्यालयका इन्जिनियर प्रजेशकुमार आलेले जानकारी दिए । ‘ठेकेदारले बनाउनुपर्ने तीन तल्लाको भवन हो, तर अहिलेसम्म दोस्रो तल्ला मात्र ढलान भएको छ,’ उनले भने ।
ठेकेदार कम्पनीले २०७८ माघ ४ गते दोस्रो तल्ला ढलान गरेको थियो । त्यसपछि काम पुरै ठप्प पारेर सम्पर्क विहिन भएको इन्जिनियर आले बताउँछन् । ठेकेदार सम्पर्क विहिन भएपछि गाउँपालिका कार्यालयले बारम्बार लिखित र मौखिक रुपमा ताकेता गर्दै आएको छ । यस्तै दुई पटक स्पष्टीकरण पनि सोधिएको छ ।
कार्यालयका अनुसार काम अलपत्र पार्ने ठेकेदार कम्पनीले अहिलेसम्म २ करोड १ लाख भुक्तानी लिइसकेको देखिन्छ । पछिल्लो समयमा ठेकेदारलाई धेरै ताकेता गरेपछि अलपत्र काम अगाडी बढाउने मौखिक रुपमा सहमती जनाएको कार्यालयका प्रमुख प्रशासकीय अधिकृत सिंहराज डाँगीले जानकारी दिए ।
‘ठेकेदार कम्पनी सम्पर्कमा आएर काम गर्नेमा सहमत भएको छ,’ उनले भने । सम्झौता अवधिभित्रै प्रशासनिक भवन निर्माणको काम सम्पन्न गर्ने प्रतिवद्धता जनाएको प्रमुख डाँगीले बताए । निर्माण सम्झौताका क्रममा पर्याप्त समय दिएकाले गाउँपालिका कार्यालय अब म्याद थप गर्ने पक्षमा देखिदैन ।
गाउँपालिका अध्यक्ष छब्बन खाँ प्रशासनिक भवन नहुँदा जनतालाई सेवा दिन निकै समस्या भइरहेको बताउँछन् । ‘भवन नहुँदा अहिले कार्यालय र अन्य शाखाको कामकाज जसोतसो चलाइरहेका छौं,’ उनले भने ‘भवन चाडो सम्पन्न भएपछि जनतालाई राम्ररी सेवा दिन सकिन्थ्यो ।’
भवन निर्माण गर्ने ठेकेदारलाई गाउँपालिकाले अप्ठ्यारो अवस्थामा सहजीकरण गरिदिन तयार रहेको अध्यक्ष खाँले बताए । गाउँपालिकाका कार्यपालिका सदस्य एवम् प्रवक्ता टीकानाथ यादवले भवन समयमा नबन्दा गाउँपालिकाको काम सञ्चालन गर्न अप्ठ्यारो भइरहेको बताए । ‘भवन समयमा नबन्दा काम सञ्चालन गर्न धेरै अप्ठ्यारो भइरहेको छ,’ उनले भने ।
