नेपालगन्ज : नेपालगन्जकी सुप्रसिद्ध समाजसेवी स्वर्गिय मोहम्मदी सिद्दिकीको सम्मानमा मोहम्मदी सिद्धिकी सामाजिक सेवा पुरस्कार स्थापना गरिने भएको छ । गैरसरकारी संस्था महासंघ नेपाल बाँकेले सो पुरस्कार स्थापना गर्ने निर्णय गरेको हो ।
२०१५ सालमा बुुवा स्व. नूर महोम्मद सिद्दिकी र आमा हविवुनमिसाक सिद्दिकीको कोखबाट भारतको गोरखपुरमा जन्मिएकी सिद्दिकीबाट आम नागरिकहरु प्रभावित थिए ।
२०४८ साल देखि अनवरत समाज सेवा र राजनीतिमा जीवन व्यतित गरेकी सिद्धिकीको बिश्वव्यापी रुपमा फैलिएको कोभिडको दोस्रो महामारीमा कोभिडको संक्रमणबाट निधन भएको थियो ।
महासंघले सिद्धिकीको सम्मानमा उक्त पुरस्कार स्थापना गर्ने र पुरस्कार व्यवस्थापनका लागि सिद्धिकीकी बहिनी तथा गैसस महासंघ नेपाल बाँकेकी कार्यसमिति सदस्य मैमुना सिद्धिकीको संयोजकत्वमा ५ सदस्सिय समिति गठन गर्ने निर्णय गरेको छ ।
महासंघका अध्यक्ष नमस्कार शाहको अध्यक्षतामा बसेको बैठकले उक्त निर्णय गरेको हो । बैठकले पुरस्कारका लागि बिभिन्न संघ, संस्थाहरुबाट सहयोग संकलन गर्ने निर्णय गरेको अध्यक्ष नमस्कार शाहले जानकारी दिएका छन् ।
अक्षय कोष स्थापना गरि अक्षय कोषबाट आएको व्याजबाट हरेक बर्षको असोज ६ गते मनाईने सामाजिक सेवा दिवसमा सामाजिक सेवामा उत्कृष्ठ कार्य गर्ने बाँकेस्थित एक सामाजिक संस्था वा समाजसेवीलाई नगद सहित सम्मान प्रदान गर्ने योजना महासंघले बनाएको छ । महासंघका अनुसार, यसै बर्षदेखि पुरस्कार प्रदान गर्न सुरु गरिनेछ ।
सिद्धिकीका श्रीमान समाजसेवी तथा राजनीतिक व्यक्तित्व मोहम्मद सुलेमान सिद्दिकीको २०४७ साल फागुन १९ गते निधन भएपछि उनकै प्रेरणाले उत्तराधिकारीको रुपममा मोहम्मदी समाजसेवा र राजनीतिमा होमिएकी थिईन् ।
राजनीति र समाजसेवालाई सँग सँगै तर एक, अर्कालाई नजोडेर गर्दै अघि बढाएकी थिइन् । २०४९ सालको पहिलो स्थानीय निर्वाचनमा उनी साबिक नेपालगन्ज नगरपालिका-९ को वडाअध्यक्षमा काँग्रेसका तर्फबाट ४ जना पुरुष उमेदवारलाई पराजित गर्दै निर्वाचित भएकी थिइन् ।
२०५४ सालको स्थानीय निर्वाचनमा नेपालगन्जको उपमेयरको उमेदवार बनेकी उनलाई २०६४ सालको संविधान सभा निर्वाचनमा कांँग्रेसले उनलाई संविधान सभाको सदस्य बनाएको थियो ।
बिभिन्न संघ, संस्थामा आवद्ध स्वर्गिय सिद्धिकी गैरसरकारी संस्था नेपाल महासंघ बाँकेको सल्लाहकार समेत रहेकी थिईन् । सिद्धिकीको सम्झना र सम्मानमा महासंघले यस अघि स्मारिका प्रकाशन गरिसकेको गैसस बाँकेका अध्यक्ष शाहले बताए ।
