बाँके (नरैनापुर): बाँकेको नरैनापुर गाउँपालिकाले उत्कृष्ट बिद्यार्थी तथा बिद्यालयलाई सम्मान गरेको छ । गाउँपालिकाले ५८ औँ राष्ट्रिय बाल दिवसको अवसर पारेर महेन्द्र माध्यमिक मटेहिया बिद्यालयमा आयोजित कार्यक्रममा गाउँपालिकाभित्र कक्षा १० मा उत्कृष्ट नतिजा हासिल गर्ने बिद्यार्थीलाई सम्मान गरेको हो ।
एस.इ.इ मा सर्र्वोत्कृष्ट अंक ल्याएर पास भएका बिद्यार्थी दिक्षिणा यादव र पवन सिंह यादवलाई ल्यापटप प्रदान गरिएको थियो । बिद्यार्थीलाई खादा ओढाएर नेपालको संविधान, कापी झोला, प्रमाणपत्र पनि प्रदान गरिएको थियो ।
कार्यक्रममा गाउँपालिका अध्यक्ष इस्तियाक अहमद शाहले विकास भनेको रोड निर्माण गर्नु मात्र नभएको बताए । शिक्षा र स्वास्थ्यमा सुधार गर्न सके सबै क्षेत्र क्रमिक रुपमा विकास हुदै जाने धारणा राखे । गाउँपालिकाले शिक्षा क्षेत्रलाई उच्च प्राथमिकतामा राखेर कार्यक्रम अगाडी बढाएको उनले बताए ।
गाउँपालिकाका प्रमुख प्रशासकीय अधिकृत मणिराम खरालले सम्मानले भावी दिनमा शिक्षण सिकाई क्रियाकलापलाई थप अगाडी बढाउन उर्जा प्रदान गर्ने बताए । गाउँपालिका शिक्षा शाखा प्रमुख कृष्णप्रसाद थारुले नरैनापुर भित्र शिक्षाको गुणस्तरलाई अगाडी बढाउनका लागि बिद्यार्थी, शिक्षक र बिद्यालयलाई हौसला स्वरुप उक्त पुरस्कार तथा सम्मान प्रदान गरिएको जानकारी दिए ।
नरैनापुर ५ का वडाअध्यक्ष कृष्णचन्द्र मौर्यले शिक्षा क्षेत्रमा राजनीति नगर्न सबैलाई आग्रह गरे । शिक्षा क्षेत्रको सुधारका लागि जनप्रतिनिधिहरु प्रतिवद्ध रहेको बताए ।
सो क्रममा अध्यक्ष शाहसहित, प्रमुख प्रशासकीय अधिकृत खराल, वडा नम्बर १ का वडाअध्यक्ष इशाक जोलाह, वडा नम्बर २ का वडाअध्यक्ष मसुद अहमद शाह, वडा नम्बर ४ का वडाअध्यक्ष मनोज शर्मा, वडा नम्बर ५ का वडाअध्यक्ष कृष्णचन्द्र मौर्य, जिन्सी शाखा प्रमुख भरत महत्तो, विपत शाखा प्रमुख लक्ष्मीकान्त मिश्र, रोजगार शाखा प्रमुख मकबुल अहमद मुकेरी, कमल केसी लगायतले बिद्यार्थीलाई पुरस्कृत गरेका थिए ।
