धनगढी : अविरल वर्षाका कारण आएको बाढी र पहिरोले सुदूरपश्चिम प्रदेशमा ठूलो धनजनको क्षति भएको छ । वर्षाका कारण सबैभन्दा बढी अछाममा क्षति पुगेको छ ।
शुक्रबार राति आएको पहिरोले अछाममा १७ जनाको मृत्यु हुनुका साथै ५ जना बेपत्ता भएका छन, भने कैलालीमा बाढीले १ जनाको मृत्यु भएको छ, भने १ जना बेपत्ता भएका छन् ।
अछामको कमलबजार नगरपालिका वडा नम्बर ६ ठाँडीखाँदमा इन्द्रसिंह कामीको घरमा पहिरो जाँदा एकै परिवारका ७ जनाको मृत्यु भएको छ, भने ७ जना घाइते भएका छन । मृत्यु हुनेमा ३० वर्षीया अमृता कामी, १७ वर्षीया सरिता कामी, २१ वर्षीया अर्चना कामी, ९ वर्षीय निखिल कामी, ३६ वर्षीया मैनकला कामी, १५ वर्षीया गीता कामी र १२ वर्षीया सिरु कामी रहेका छन ।
घाइते हुनेमा इन्द्रसिंह कामी, भक्त कामी, कल्पना कामी, सुशीला कामी, सफलता कामी, डिक्रा कामी र ममता कामी रहेका छन । यसैगरी कमलबजार नगरपालिका वडा नम्बर ८, डुङ्लाका खिउरे दमाईको घरमा पहिरो जाँदा उनको परिवारका ५ जनाको मृत्यु भएको प्रहरीले जनाएको छ ।
मृत्यु हुनेमा २६ वर्षीया गम्भी दमाई, २३ वर्षीया भाना दमाई, ६ वर्षीया डिक्रा दमाई, ३ वर्षीया कलु दमाई र ४ वर्षीया कल्पना दमाई रहेका छन । परिवारका मूली खिउरे भने घाइते भएका छन । तुर्माखाँदा गाउँपालिका वडा नम्बर ५, नाडाका नेत्रबहादुर शाही र रितबहादुर शाहीको घर पहिरोले बगाउँदा ४ जनाको मृत्यु भएको छ भने पाँच जनाको अवस्था अज्ञात रहेको छ ।
मृत्यु हुनेमा घरमूली ४५ वर्षीय नेत्रबहादुर शाही, उनकी श्रीमती ३६ वर्षीया मनिषा शाही, उनकी १७ वर्षकी छोरी विमला शाही र उनकी भतिजी १७ वर्षीया जानकी शाही रहेका छन । पहिरोमा परेर २१ वर्षीया भावना शाही, १७ वर्षीया कल्पना शाही, १३ वर्षीय सुन्दर शाही, १ वर्षीया मेलिना शाही र अढाइ वर्षीया करिस्मा शाही बेपत्ता भएका छन ।
उनीहरुको खोजी कार्य जारी रहेको प्रहरी नायब महानिरीक्षक मोहनकुमार आचार्यले बताए । ढकारी गाउँपालिका वडा नम्बर ६, मा पहिरोले घर पुरिँदा २ वर्षीय नवीन बुढाको मृत्यु भएको छ, भने उनकै परिवारका ३ जना घाइते भएका छन् ।
उद्धारका लागि नेपाली सेनाको हेलिकप्टर शनिबार दिउँसो अछामका घटनास्थलमा पुगेको छ । गम्भीर घाइते भएका ३ जनालाई थप उपचारका लागि सुर्खेत लगिएको छ, भने ३ जनाको जिल्ला अस्पताल अछाममा उपचार भइरहेको छ ।
अविरल वर्षात्का कारण कैलालीमा बाढीले बगाएर धनगढी उपमहानगरपालिका–१३, झलारी गाउँ बस्ने १९ वर्षीया नवीना चौधरीको मृत्यु भएको छ भने भजनी नगरपालिका वडा नम्बर ८, का ५५ वर्षीया कालुराम चौधरीलाई मोहना नदीमा आएको बाढीले बगाएको छ । उनको अवस्था अझै अज्ञात रहेको जिल्ला प्रहरी कार्यालय कैलालीका प्रहरी नायब उपरीक्षक वेदप्रकाश जोशीले बताए ।
घर भत्कँदा कैलालीको चुरे गाउँपालिका–३, का ८ वर्षीय आयुष सापकोटा र टीकापुर नगरपालिका–१, का २२ वर्षीय शिशिर चौधरी घाइते भएका छन । उनीहरुको स्थानीय अस्पतालमा उपचार भइरहेको छ । बाढीले कैलाली र कञ्चनपुरमा १ हजार भन्दा बढी घर डुवानमा पर्नुका साथै सयौँ परिवार विस्थापित भएका छन ।
कैलालीको भजनी नगरपालिका वडा नम्बर १,२,३,५,७ र ८ मा मोहना र कान्द्रा नदीमा आएको बाढीले ७ सय भन्दा बढी घर डुबानमा परेको प्रहरी नायब उपरीक्षक जोशीले बताए । कैलारी गाउँपालिका वडा नम्बर ३, ५ र ७ मा मोहना नदीमा आएको बाढीले १ सय ८० घर, लम्की चुहा नगरपालिका वडा नम्बर ७ र ९ मा १ सय १० परिवार, जानकी गाउँपालिकाको वडा नम्बर ४ र ७ मा १ सय ४० परिवार र धनगढी उपमहानगरपालिका–१३ श्रीलंकामा १३ परिवार डुबानमा परेका छन । -नागरिकन्युजबाट
