राप्ती नदीमा निरन्तर बाढी

समाज

Home
समाज
राप्ती नदीमा निरन्तर बाढी

राप्ती नदीमा निरन्तर बाढी 'भारतले लक्ष्मणपुर बाँधका सबै ढोका खोलेको छ' : प्रजिअ खत्री

बाँकेको कुसुमस्थित राप्ती नदीमा बढेको बाढी । तस्बिर : दूरसन्चार

बाँके(कुसुम): दुईदिन देखि अविरल रूपमा परेको वर्षाका कारण बाँकेस्थित राप्ती नदीमा बाढी निरन्तर बढिरहेको छ । राप्तीमा बुधबार दिउँसोदेखि पानीको सतह खतराको चिन्ह भन्दा माथी पुगेको हो ।
कुसुम स्थित बाढी मापन केन्द्रमा बिहीबार (आज) बिहान साढे ६ बजे पानीको सतह ६.३५ मिटर र बिहान १० बजे ६.२८ मिटर कायम रहेको गेज रिडर भद्रबहादुर थापाले जानकारी दिए । यसअघि बुधबार बेलुका ७ बजेको रेकर्ड अनुसार राप्ती नदीको सतह ६.६२ मिटर कायम रहेको थियो । नदीमा पानीको सतह ५.४० मिटर पुगेपछि तल्लो तटिय क्षेत्रमा डुबान हुने खतरा मानिन्छ ।
जिल्ला आपतकालिनन कार्य सञ्चालन केन्द्र बाँकेका सूचना व्यवस्थापन अधिकृत रुपन ज्ञवालीले राप्ती नदीमा पानीको सतह बढ्ने क्रम जारी रहेको बताए । 'नदीमा पानीको सतह निरन्तर रुपले बढिरहेको छ, सुरक्षित स्थानमा बस्न अलर्ट गराइरहेका छौँ,' उनले भने ।
राप्तीमा बाढी बढेपछि खतरा स्वरुप निरन्तर रूपले साइरन बजाउन सुरु गरिएको छ । राप्तीको तल्लो तटिय क्षेत्र फत्तेपुर, गंगापुर, होलिया, बेतहनी, कम्दी लगायत स्थानमा बाढीले डुबान गर्ने खतरा हुन्छ । जिल्ला प्रशासन कार्यालय बाँकेले पनि राप्तीको तल्लो तटिय क्षेत्रका सर्वसाधारणलाई सर्तकता अपाउन आग्रह गरेको छ ।
बाँकेका प्रमुख जिल्ला अधिकारी सुर्यबहादुर खत्रीले राप्ती नदीमा पानीको सतह निरन्तर रुपले बढिरहेपनि अहिलेसम्म डुबान गरेको खबर नआएको बताए । 'सुरक्षाकर्मीलाई अलर्ट अवस्थामा राखेका छौँ, अहिलेसम्म कतै डुबान गरेको खबर आएको छैन,' उनलेे टेलिफोनमा भने । राप्तीको बाढीले धानबालीमा भने क्षति गरेको छ । पाकेर तयार भएको र काटिसकेको धान बालीलाई अविरल वर्षा र राप्तीको बाढीले क्षति गरेको हो ।
भारतले अन्तराष्ट्रिय कानुन विपरीत निर्माण गरेको लक्ष्मणपुर बाँध, कलकलवा बाँधका कारण हरेक वर्ष ठूलो बाढी आउने बित्तिकै बाँकेका आधा दर्जन बढी गाउँ डुब्दै आएका छन । बाढीका कारण हजारौं बिघा खेतीयोग्य जमिन कटान र पटान भइसकेको छ । राप्तीमा बाढी आएपछि भारतले लक्ष्मणपुर बाँधका सबै ढोका खोलेको प्रजिअ खत्रीले बताए । 'नदी प्राकृतिक रुपले नै बग्न पाईरहेको छ, भारतले बाँधका सबै ढोका खोलेको जानकारी आएको छ,' उनलेे भने ।