बाँके (नरैनापुर) : अविरल वर्षाका कारण बाँकेको राप्ती सोनारी गाँउपालिकाको वडा नम्बर ७ र नरैनापुर गाउँपालिका वडा नम्बर ६ मा सिक्टा सिचाइँ आयोजनाले निर्माण गरेको बाँध भत्किन थालेपछि स्थानीय त्रसित भएका छन् ।
नरैनापुर गाउँपालिका अध्यक्ष इश्तियाक अहमद शाहको आग्रहमा मंगलबार अनुगमन गरिएको छ । सो क्रममा गाउँपालिका अध्यक्ष शाह सहित, प्रमुख जिल्ला अधिकारी सूर्यबहादुर खत्री, प्रहरी उपरीक्षक श्यामकृष्ण अधिकारी, नरैनापुरका प्रमुख प्रशासकीय अधिकृत मणिराम खराल लगायतले स्थलगत अनुगमन गरेका थिए । अनुगमन गर्दै तत्काल बाँधमा तटबन्ध गर्ने प्रमुख जिल्ला अधिकारी खत्रीले प्रतिवद्धता व्यक्त गरे ।
प्रजिअ खत्रीले नरैनापुरको अवस्था दर्दनाक रहेकोले गृह मन्त्रालयमार्फत बाढी प्रभावितको समस्या समाधानका लागि पहल गर्ने बताए । गाउँपालिका अध्यक्ष शाहले राप्ती सोनारी र नरैनापुरका नागरिकले बाढी, डुबान र कटानको समस्या झेल्दै आएको जानकारी गराउँदै दीर्घकालिन समाधानका लागि पहल गर्न आग्रह गरेका थिए ।
बाढी प्रभावितलाई तत्काल राहत दिन अनुगमन टोलीलाई आग्रह गरे । अध्यक्ष शाहले सिक्टाले बनाएको बाँध पूर्ण रुप फुटेको खण्डमा ठूलो मानवीय क्षति हुन सक्ने भएकोले बाँध मर्मत गर्न प्राविधिकलाई तत्काल खटाउन सुझाव दिए ।
प्रजिअ खत्रीलाई राप्ती सोनारी ७ का वडाअध्यक्ष रामलखन थारुले बाँध भत्किए हजारौं मानिसको ज्यान जान सक्ने भएकाले तत्काल उचित प्रवन्ध मिलाउन आग्रह गरे । निरन्तर रुपमा परेको पानीका कारण नरैनापुरमा तीन हजार घरधुरी बाढी तथा डुबानबाट प्रत्यक्ष रुपमा पीडित हुन पुगेको नरैनापुरका प्रमुख प्रशासकीय अधिकृत खरालले जानकारी गराएका थिए ।
बाढी तथा डुबानबाट नरैनापुरमा मात्र दुई सय घर परिवार पूर्णप्रभावित हुन पुगेको उनले बताए । वर्षा नहुँदा गत साउनमा नरैनापुरलाई सुख्खा ग्रस्त क्षेत्र घोषणा गरेपनि सरकारले कुनैपनि राहत दिन नसकेका बेला फेरी बाढी र डुबानको समस्याले स्थानीयलाई झन् पिडा दिएको बताउँदै गाउँपालिका अध्यक्ष शाहले संघीय सरकारलाई गम्भिर बन्न आग्रह गरे ।
‘स्थानीय सरकारको मापदण्डमा भए बमोजिम राहत प्रदान गरिनेछ,’ उनले भने । बाढीका कारण नरैनापुर गाउँपालिका उपाध्यक्षको घर पनि डुबानमा परेको जानकारी दिए । प्रमुख जिल्ला अधिकारी खत्रीको निर्देशनमा बस्तीलाई सुरक्षित राख्न छिट्टै आवश्यक तटबन्ध र अन्य संरचना निर्माण कार्य सुरु हुने अध्यक्ष शाहको विश्वास छ ।
अनुगमन गर्न पुगेको टोलीले नरैनापुरको बाढी प्रभावित क्षेत्रको स्थलगत अनुगमन गरेको गाउँपालिका जिन्सी शाखा प्रमुख भरत महतोले बताएका छन् ।
