बाँके (नरैनापुर) : नरैनापुर गाउँपालिकाका अध्यक्ष इश्तियाक अहमद शाहले बाढीले क्षति पुगेका परिवारको पहिचान गरी राहतमा कुनै कसर बाँकी नराखी काम गर्न स्थानीय विपद व्यवस्थापन समितिलाई निर्देशन दिएका छन् ।
बाढीले सबैतिर आक्रान्त पारेपछि विपद व्यवस्थापन समितिको बैठक राखेर उनले ६ वटै वडाका वडाअध्यक्ष, स्थानीय प्रहरी, रेडक्रासकर्मी, स्वयं सेवक र स्वास्थ्य संस्थाका प्रमुखलाई वास्तविक बाढी पीडितको तथ्यांक संकलन गर्न निर्देशन दिएका हुन् ।
नरैनापुर गाउँपालिकामा भएको बाढी प्रभावित क्षेत्रको पहिचान गरि तत्काल राहत सामाग्री वितरण गर्ने अध्यक्ष शाहले बताए । गाउँपालिका स्थानीय विपद व्यवस्थापन समितिका अध्यक्ष शाहको अध्यक्षतामा बसेको उक्त बैठकले यही असोज १८ गतेदेखि परेको अविरल वर्षाका कारण नरैनापुर गाउँपालिकाका ६ वटै वडामा भएको क्षति विवरण वडाअध्यक्षको नेतृत्वमा बनेको बिपद् व्यवस्थापन टिमले संकलन गरी गाउँपालिकामा बुझाउने र त्यही अनुरूप राहत वितरण गर्ने निर्णय गरेको छ ।
साथै बिपदको समयमा सहयोगका लागि विभिन्न संघ,संस्थालाई सहयोगको लागि अनुरोध/आव्हान गर्ने र संकलन भएका राहत सामग्री एकद्वार प्रणालीमार्फत गाउँपालिका बाटै वितरण गर्ने निर्णय गरिएको छ ।
यसैगरी बर्षातका कारण क्षति भएका सार्वजनिक संरचना तत्काल पुनः निर्माण गर्ने, धानबाली क्षति विवरण नरैनापुर गाउँपालिकाको कृषि शाखाले संकलन गर्ने र विपदका कारण हुने सम्भावित स्वास्थ्य सम्बन्धी प्रकोप नियन्त्रण गर्न स्वास्थ्य शाखाले बिशेष पहल गर्ने निर्णय गरेको विपद शाखा संयोजक लक्ष्मीकान्त मिश्राले जानकारी दिए ।
उक्त बैठकमा विपद समितिका संयोजक समेत रहेका गाउँपालिका अध्यक्ष शाह, वडा नम्बर २ का वडाअध्यक्ष मसुद अहमद शाह, वडा नम्बर ४ का वडाअध्यक्ष मनोजकुमार शर्मा, वडा नम्बर ५ का वडाअध्यक्ष कृष्णचन्द्र मौर्य, प्रमुख प्रशासकीय अधिकृत मणिराम खराल, विओपी नरैनापुरका सशस्त्र प्रहरी निरिक्षक नन्दकिशोर महतो, विओपी कटकुइँयाका दयाराम पौडेल, गाउँपालिकाका विभिन्न शाखा प्रमुख लगायतको सहभागिता रहेको थियो ।
