बाँकेको कुसुममा एकैदिन तीन सडक दुर्घटना, एक घण्टा सडक अवरुद्ध

समाज

Home
समाज
बाँकेको कुसुममा एकैदिन तीन सडक दुर्घटना, एक घण्टा सडक अवरुद्ध

बाँकेको कुसुममा एकैदिन तीन सडक दुर्घटना, एक घण्टा सडक अवरुद्ध

बाँके(कुसुम) : पुर्ब-पश्चिम राजमार्ग अन्तरगत बाँकेको राप्ती सोनारी गाउँपालिका वडा नम्बर १ कुसुममा बुधबार एकैदिन तीन वटा सडक दुर्घटना भएका छन् ।
बुधबार अपरान्ह साढे ४ बजेतिर कुसुम (सौरी) स्थित लालमट्टी उकालोमा ना ६ ख ८८०९ नम्बरको बस पल्टिँदा १० जना यात्रु घाइते भएको ईलाका प्रहरी कार्यालय कुसुमका ईन्चार्ज एवम प्रहरी नायव निरीक्षक(सई) पुस्करराज जोशीले जानकारी दिए । पुर्बबाट पश्चिम तर्फ जादै गरेको उक्त बस लालमट्टीस्थित पहिरो खसेको ठाउँमा पल्टिँएको थियो । घाइतेहरुको नेपालगन्ज मेडिकल कलेज, शिक्षण अस्पताल कोहलपुरमा उपचार भईरहेको छ ।
गत असोजमा परेको अविरल वर्षाका कारण त्यहाँ पहिरो खसेको थियो । उक्त पहिरोको केही भाग पन्छाएर तत्कालीन समयमा सडक सुचारु गरेपनि पहिरोको सबै भाग नहटाउँदा सवारी साधन आवत-जावत गर्न समस्या हुने गरेको थियोे ।
सोही ठाउँमा बुधबार जम्काभेट भएपछि बसले एक मोटरसाइकललाई जोगाउन खोज्दा बस पल्टिन पुगेको प्रहरीले जनाएको छ । बसले बाटो छेकेपछि करिव १ घण्टासम्म पुर्ब-पश्चिम राजमार्ग अवरुद्द हुन पुगेको थियो । अवरुद्द भएको उक्त सडकलाई प्रहरीले जेसिबीको सहायताले १ घण्टापछि खुलाएको थियो ।
यस्तै बुधबार दिउँसो ३ बजेतिर कुसुमस्थित सिक्टाको उकालोमा दाङतर्फ जादै गरेको बा ३ ख ९५२६ नम्बरको हाइससँग नेपालगन्ज जादै गरेको रा ७ प ५८३८ नम्बरको मोटर साइकल ठोक्किएको थियो । उक्त दुर्घटनामा मोटरसाईकल चालक दाङ निवासी एक युवक घाइते भएको ईलाका प्रहरी कार्यालय कुसुमले जनाएको छ । तीब्र गतिमा गुडेको मोटरसाईकल अनियंत्रित भई हाइससँग ठोक्किएको थियो । घाइते युवकको शिक्षण अस्पताल कोहलपुरमा उपचार भईरहेको छ ।
यसैगरी बुधबार बिहान करिब ९ बजेतिर कुसुम (सौरी) स्थित लालमट्टी डाँडामा ना ६ ख ९६७९ नम्बरको बस दुर्घटनामा परेको थियो । नेपालगन्जदेखि नारायणघाटतर्फ जाँदै गरेको उक्त बस दुर्घटना हुँदा सबै यात्रु सकुशल भएका थिए ।