दाङ : लुम्बिनी प्रदेशको दाङमा बुधबार राष्ट्रियसभा सदस्यको उपनिर्वाचन हुने भएको छ । निर्वाचनको सम्पूर्ण तयारी पूरा भएको निर्वाचन आयोगले जनाएको छ । प्रदेश निर्वाचन कार्यालय दाङका प्रमुख नारायणप्रसाद भण्डारीका अनुसार बुधबार बिहान १० बजेदेखि दिउँसो ३ बजेसम्म मतदान हुनेछ ।
घोराहीस्थित कर्मचारी मिलन केन्द्रमा मतदान हुनेछ । मतगणना सकिएको एक घण्टाभित्रै परिणाम सार्वजनिक हुने भण्डारीले बताए । उनले भने, ‘मतगणना सकिनासाथ तत्कालै गणना सुरू गर्ने हाम्रो तयारी छ,’ उनले भने ।
यही माघ ११ गते राष्ट्रियसभा सदस्य पदका लागि तीन दलबाट तीन जनाको उम्मेदवारी दर्ता भएको थियो । सत्तारूढ दलमध्येका नेकपा एमाले, नागरिक उन्मुक्ति पार्टी र प्रमुख प्रतिपक्षी नेपाली कांग्रेसबाट गरी तीन जना चुनावी प्रतिष्पर्धामा उत्रिएका छन् ।
एमालेका उम्मेदवार कुमार दसौदी र कांग्रेसका माधवप्रसाद आचार्य दुबै रोल्पाका हुन् भने नागरिक उन्मुक्ति पार्टीबाट राजेन्द्रवीर राय प्रतिस्पर्धामा छन् । एमालेका केन्द्रीय सदस्य दसौदीको समर्थकमा राप्रपाकी प्रदेश सभा सदस्य मिनाकुमारी श्रेष्ठ र प्रस्तावकमा गढवा गाउँपालिका अध्यक्ष यमनारायण पोखरेल बसेका छन् ।
रोल्पाका पूर्वजिल्ला सभापति समेत रहेका नेपाली कांग्रेसका आचार्यको प्रस्तावकमा दाङको बंगलाचुली गाउँपालिका उपाध्यक्ष भक्तबहादुर जिसी र समर्थकमा लमही नगरपालिकाका मेयर जोगराज चौधरी बसेका छन् । नागरिक उन्मुक्ति पार्टीका रायको प्रस्तावकमा प्रदेशसभा सदस्य राजकुमार चौधरी र प्रदेशसभा सदस्य धर्मबहादुर चौधरीले समर्थन गरेका छन् ।
गत असोज २३ गते नेकपा एमालेबाट राष्ट्रियसभा सदस्यमा निर्वाचित रूपन्देहीका खिमलाल भट्टराईले राजीनामा दिएपछि रिक्त रहेको उक्त स्थानमा पदपूर्तिका लागि उपनिर्वाचन हुन थालेको हो । राष्ट्रिय सभा सदस्यका लागि प्रदेश सभा सदस्य र स्थानीय तहका प्रमुख तथा उपप्रमुखले मतदान गर्ने छन् ।
प्रदेश सभा सदस्य एक जनाको मतभार ४८ र स्थानीय तहका प्रमुख उपप्रमुखमध्ये हरेकको मतभार १८ हुने गर्छ । लुम्बिनी प्रदेशमा कुल मतदाता संख्या ३ सय ५ रहेको छ । जसमध्ये प्रदेश सांसदको संख्या ८७ र स्थानीय तहका प्रमुख तथा उपप्रमुख मतदाताको संख्या २ सय १८ जना रहेको छ ।
लुम्बिनी प्रदेशमा कुल १ सय ९ स्थानीय तह रहेका छन् । तीमध्ये कांग्रेसले ४८, एमालेले २७, माओवादीले २५, जसपाले ३, जनमोर्चा र लोसपाले २÷२ तथा राप्रपा र जनता प्रगतिशीलले १÷१ स्थानमा जितेका छन् ।
