नेपालगन्ज : बिद्युतीकरणको काम सम्पन्न भएपनि नेपाल बिद्युत प्राधिकरणले राप्ती सोनारी गाउँपालिका वडा नम्बर ३, ४ र ५ का स्थानीय बासिन्दालाई मिटर जडान कार्यमा झुलाइरहेको पाइएको छ ।
राप्ती सोनारी गाउँपालिकाले आफ्नै लगानीमा वडा नम्बर ३ मा विद्युतीकरणको काम सम्पन्न गरी गत चैत १८ गते प्राधिकरणलाई हस्तान्तरण गरेको थियो । यस्तै वडा नम्बर ४ र ५ मा प्राधिकरण आफैले बिद्युतीकरणको काम सम्पन्न गरेको थियो । बिद्युतीकरण सम्पन्न भएको ६ महिनाभन्दा बढी समय भईसक्दा पनि अधिकांस नागरिकले बत्ती बाल्न पाएका छैनन् ।
मिटर जडानका लागि उपभोक्ताले अग्रिम फाराम र रकम बुझाईसकेपनि अहिलेसम्म मिटर पाएका छैनन् । बिद्युत प्राधिकरणले मिटर नदिएपछि स्थानीय उपभोक्ता अध्यारोमै बस्न बाध्य भएका हुन् ।
उपभोक्ताको गुनासो ब्यापक रुपमा बढ्न थालेपछि गाउँपालिकाका जनप्रतिनिधी दिनहुँजसो नेपालगन्जस्थित बिद्युत प्राधिकरण लगायतका निकायमा धाईरहेका छन् । स्थानीय जनप्रतिनिधी सहितको टोली केहीदिन अघि मात्र बिद्युत प्राधिकरण लुम्बिनी प्रदेश डिभिजन कार्यालय र नेपालगन्ज वितरण केन्द्रमा पुगेर दवाव दिएका थिए ।
त्यस क्रममा प्राधिकरणका प्रमुखले मिटर जडानको प्रक्रिया चाडै थालिदिने प्रतिवद्धता जनाएका थिए । उनीहरुको प्रतिवद्धता कार्यान्वयनमा नआएपछि सोमबार राप्तीसोनारी गाउँपालिका अध्यक्ष लाहुराम थारुसहित जनप्रतिनिधी र उपभोक्ताले जिल्ला प्रशासन कार्यालयमा पुगेर प्रमुख जिल्ला अधिकारीको ध्यानार्कषण गराएका छन् ।
प्रमुख जिल्ला अधिकारी शिवराम गेलालले मिटर वितरणका विषयमा बुझ्न प्राधिकरण नेपालगन्ज वितरण केन्द्रका प्रमुख लखनलाल मल्लिकलाई बोलाए । जिल्ला प्रशासन कार्यालयमा भएको छलफलमा वितरण केन्द्र प्रमुख मल्लिकले डिभिजन कार्यालयमाथी दोष थुपार्दै आफु पन्छिने कोसिस गरेका थिए । डिभिजन कार्यालयले नै आवश्यक मिटर र जनशक्ति उपलब्ध नगराउँदा राप्ती सोनारीमा काम अधुरो हुन पुगेको उनको आरोप थियो ।
राप्ती सोनारी गाउँपालिका अध्यक्ष लाहुराम थारुले बिद्युतीकरणको काम सम्पन्न भएपनि बत्ती बाल्न नपाउँदा जनतामा आक्रोश पैदा भएको बताए । ‘गाउँपालिकाले आफ्नै लगानीमा वडा नम्बर ३ मा बिद्युतीकरणको काम सम्पन्न गरेर हस्तान्तरण गरिसकेको अवस्था छ, हामीले हस्तान्तरण गरेको पनि ६ महिना वितिसक्यो,’ उनले भने ‘जनतामा यति धेरै आक्रोश छ की अब उनीहरुको आक्रोशलाई थेग्न गाह्रो भईसकेको छ ।’ गाउँपालिकाले मिटर जडानका लागि प्राधिकरणलाई आवश्यक पर्ने सहयोग गर्न तयार रहेको अध्यक्ष थारुले बताए ।
सो क्रममा प्रमुख जिल्ला अधिकारी गेलालले राप्ती सोनारीमा दशै अगाडी मिटर जडानको ब्यवस्था मिलाउन वितरण केन्द्र प्रमुख मल्लिकलाई निर्देशन दिएका थिए । प्रजिअ गेलालको निर्देशनपछि ३४ वटा मिटर तत्काल जडानका लागि पठाउने उनले प्रतिवद्धता जनाए । प्राधिकरण डिभिजन कार्यालय र वितरण केन्द्र प्रमुख बीचको विवादका कारण आफुहरु बत्ती बाल्नबाट बञ्चित रहेको उपभोक्ताको बुझाइ छ ।
सम्बन्धित समाचार :
मिटर जडान गरिदिन माग गर्दै प्राधिकरणमा डेलिगेशन
भिडियो हेर्नुस् :
