नेपालगन्ज : कोरोना भाईरस कोभिड–१९ महामारीलाई लक्षित गरेर बन्द गरिएको सिमानाका खोल्न बाँके प्रशासनले आनाकानी गरेको छ । सरकारले एक साताघि नै कोरोना महामारीका कारण बन्द गरिएका सिमानाका खोल्ने निर्णय गरेको थियो । तर, उक्त निर्णय कार्यान्वयन गर्न बाँके प्रशासनले आनाकानी गरेको हो ।
गृहमन्त्रालयले असोज ७ गते पत्र लेख्दै आदेश कार्यान्वयन गर्न सबै जिल्ला प्रशासन लगायत निकायलाई निर्देशन दिएको थियो । मन्त्रालयका शाखा अधिकृत सुमन पण्डितले हस्ताक्षर गरेको उक्त पत्रमा भनिएको छ, ‘नेपाल सरकार मन्त्रिपरिषदबाट स्वीकृत विदेशबाट नेपाल आगमन हुने र नेपालबाट प्रस्थान गर्ने यात्रुहरुको यात्रा व्यवस्थापन सम्बन्धी आदेश २०७८ यसैसाथ संलग्न छ, उक्त आदेशको तहाँ र मातहतका कार्यालयहरुसँग सम्बन्धित विषयहरु कार्यान्वयन गर्ने व्यवस्था मिलाउनु हुन आदेशानुसार अनुरोध छ ।’
सिमा नाका नखुल्दा नेपाल र भारतका सुरक्षाकर्मीले आवत–जावतमा कडाइ गरिरहेका छन् । ईलाका प्रहरी कार्यालय जमुनाहा बाँकेले पनि सिमानाका खोल्ने विषयमा माथीबाट कुनै निर्देशन नआएको बताएको छ । नाकामा पहिलेको जस्तै सवारी साधन आवत जावत गर्नमा कडाई गरिएको छ । स्वीकृती लिएका एम्बुलेन्स, पेट्रोलियम ट्यांकर र भारतीय मालबाहक ट्रक बाहेक अन्य सर्बसाधारणका सवारी साधनहरुलाई नेपालबाट भारत जान दिइएको छैन ।
यस्तै भारतबाट पनि त्यहाँका सुरक्षाकर्मीले एम्बुलेन्स, पेट्रोलियम ट्यांकर र मालबाहक सवारी साधनलाई मात्र नेपाल आउन दिइरहेका छन् । ‘नाका खोल्ने विषयमा मन्त्रालयले एउटा मापदण्ड बनाएको छ, सोही मापदण्ड अनुसार हामीले सिमाको आवत जावतलाई ब्यवस्थापन गरेका छौं,’ प्रमुख जिल्ला अधिकारी शिवराम गेलालले भने ।
अत्यावश्यक सवारी साधनहरु एम्बुलेन्स, पेट्रोलियम ट्यांकर र मालबाहक ट्रक बाहेक अन्य सवारी साधन आवत जावत गर्न नपाउने मापदण्डमा उल्लेख भएको उनले बताए । ‘स्थलमार्ग ब्यवस्थापन सम्बन्धमा गृहमन्त्रालयले पत्र पठाएको हो, तर मन्त्रालयले हामीलाई सिमानाका पुरै खोल्नु भनेको छैन,’ प्रजिअ गेलालले थपे ।
सर्बसाधारणको हकमा आवत जावत गर्न कुनै रोक नलगाइएको उनले बताए । विदेश नागरिकको सम्बन्धमा उनीहरुले ७२ घण्टा अगाडीको पिसिआर रिपोर्ट पेश गर्नुपर्ने हुन्छ,’ उनले भने ।
गृहमन्त्रालयले जिल्ला प्रशासन कार्यालय लगायतलाई लेखेको पत्र ।
यो पनि पढ्नुस् :
सरकारले सिमा खोल्यो, नाकामा अवरोध कायमै
