नेपालगन्ज : ११३ औं अन्तर्राष्ट्रिय महिला दिवसलाई बाँकेमा विविध कार्यक्रम गरी मनाइएको छ । जिल्लाका ८ वटै स्थानीय तहमा छुट्टा छुट्टै कार्यक्रम गरेर दिवस मनाइएको हो ।
नेपालगन्ज उपमहानगरपालिकासहित विभिन्न गैर सरकारी संस्थासँगको सहकार्यमा र्याली सहित कार्यक्रम गरियो । नेपालगन्ज उपमहानगर क्षेत्रको परिक्रमा गरेको उक्त र्याली पश्चात रामलिला मैदानमा पुगेर कार्यक्रममा परिणत भएको थियो ।
यस्तै दिवसको अवसरमा ब्रह्माकुमारी ईश्वरीय विश्वविद्यालय एवं राजयोग प्रशिक्षण केन्द्र नेपाल, क्षेत्रीय कार्यालय नेपालगन्जले पनि कार्यक्रम गरेको छ । नारी दिवसको अवसरमा स्वस्थ र सुखी समाजका लागि नारीको भूमिका विषयक स्नेह मिलन कार्यक्रम गरिएको हो ।
उता कोहलपुरमा पनि र्याली सहित बिबिध कार्यक्रम गरिएको छ । कोहलपुर नगरपालिकाका उपमेयर संगिता सुबेदीका अनुसार र्याली तथा अन्तरकृया कार्यक्रम गरिएको हो ।
यसैगरी खजुरा गाउँपालिकाले पनि दिवसको अवसरमा र्याली निकालेको छ । गाउँपालिका कार्यालयबाट सुरु भएको र्याली पश्चात कार्यक्रम गरिएको उपाध्यक्ष मञ्जु मल्लले जानकारी दिइन् ।
राप्ती सोनारी गाउँपालिकाले पनि दिवसको अवसरमा विभिन्न कार्यक्रम गरेको छ । गाउँपालिका उपाध्यक्ष मनिषासिंह थारुको सभापतित्व एवम् जिल्ला समन्वय समिति बाँकेका उपप्रमुख सिता कार्कीको प्रमुख आतिथ्यतामा सम्पन्न कार्यक्रममा विभिन्न क्षेत्रका महिलालाई सम्मान समेत गरिएको थियो ।
त्यस्तै बैजनाथ गाउँपालिकाले रामपुरमा अन्तरक्रिया कार्यक्रम गरेको छ । गाउँपालिका उपाध्यक्ष निर्मला रोकायको सभापतित्व एवं गाउँपालिका अध्यक्ष प्रकाशबहादुर शाहीको प्रमुख आतिथ्यतामा लैङ्गिक समानताको बलियो आधार सिर्जनात्मक पहुँचको विस्तार भन्ने मुलनाराका साथ कार्यक्रम गरिएको हो ।
त्यसैगरी जिल्लाको नरैनापुरमा पनि दिवसको अवसरमा कार्यक्रम गरियो । उक्त कार्यक्रमलाई सम्बोधन गर्दै गाँउपालिका अध्यक्ष इश्तियाक अहमद शाहले महिलाहरुका लागि ८ मार्च चाडपर्वको रुपमा रहेको बताए । महिला दिवसकै दिन महिलाहरुले मुक्तिका लागि आन्दोलन सुरु गरेको स्मरण गराउँदै अध्यक्ष शाहले महिला नेतृत्वको पनि व्यापकरुपमा वृद्धि हुँदै गएको बताए ।
यसैबीच नेपाल टे«ड युनियन महासंघ (जिफन्ट)ले उक्त दिवसलाई श्रमिक महिलासँग मनाएको छ । नेपालगन्जको श्रमिक बजारमा कामको पखाईमा रहेका श्रमिक महिलालाई दिवसको बारेमा जानकारी गराउनुका साथै निःशुल्क स्वास्थ्य परीक्षण गरेको हो ।
नेपालगन्जको रामबाग नजिक कामको पर्खाईमा रहेका श्रमिक महिलाको हक अधिकारबारे जानकारी गराउनुका साथै निःशुल्क स्वास्थ्य परीक्षण गरी सेनेटरी प्याड, मास्क लगायतका स्वास्थ्य सामग्री वितरण गरिएको जिफन्ट राष्ट्रिय कमिटी सदस्य पूर्ण केसीले जानकारी दिए ।
