बाँचुन्जेल साथ दिन्छु भन्दै बृद्धसँग सम्पत्ती फुत्काउने कमला धरौटीमा छुटिन्

समाज

Home
समाज
बाँचुन्जेल साथ दिन्छु भन्दै बृद्धसँग सम्पत्ती फुत्काउने कमला धरौटीमा छुटिन्

बाँचुन्जेल साथ दिन्छु भन्दै बृद्धसँग सम्पत्ती फुत्काउने कमला धरौटीमा छुटिन्

दाङ : दाङको लमही नगरपालिका वडा नम्बर ९ का ७५ वर्षीय जानकीलाल बस्नेतसँग बिहेको नाटक गरी लाखौं मूल्य बराबरको जग्गा फुत्काएकी तुलसीपुरकी कमला थापा धरौटीमा छुटेकी छन् । दाङ जिल्ला अदालतले थुनछेक बहस गरी एक लाख धरौटीमा छोड्न उनलाई आदेश दिएको हो ।

धरौटी रकम बुझाएर उनी तारेखमा छुटेकी छन् । न्यायाधीश रामप्रसाद बत्यासको इजालसबाट फागुन २७ गते उक्त आदेश भएको अदालतका सूचना अधिकारी राजेन्द्र शर्माले जानकारी दिए ।

तुलसीपुर उपमहानगरपालिका वडा नम्बर ६ बरुवा गाउँकी ३८ वर्षीया कमलाले कात्तिक २८ गते (साबिक फूलबासी गाविस वडा नम्बर ५) हालको अमेलिया नगरपालिका-९ स्थित बस्नेतको नाममा रहेको कित्ता नम्बर १९ को १ बिगाहा ८ कठ्ठा १५ धुर जग्गामध्ये १२ कठ्ठा १५ धुर जग्गा आफ्नो नाममा पास गराएकी थिइन् ।

पीडित बस्नेतले कमलाले आफूसँग विवाह गर्छु भनेर जग्गा आफ्नो नामसारी गरेपछि सम्पर्कविहीन बनेको हुँदा आफूमाथि जालसाजी भएको भन्दै ठगी मुद्दा दर्ता गरेका थिए । बस्नेतले केही दिनअघि तुलसीपुरमा पत्रकार सम्मेलन गरी घटनाबारे जानकारी दिएका थिए ।

६ महिना लामो सम्बन्धका कारण आफू विश्वासमा परेर एक लाख बढी रकम, एउटा सुनको औंठी र लाखौं मूल्य पर्ने जग्गा कमलालाई पास गरिदिएको भएपनि उनले धोका दिएको हुँदा मुद्दा दायर गरेको बताएका थिए । त्यतिखेर उनले आफूले जग्गा फिर्ता पाउनुपर्ने माग राखेका थिए ।

बस्नेतले माघ २५ गते कमलाविरूद्ध जिल्ला प्रहरी कार्यालय घोराहीमा पुगेर बिहेको नाटक गरी आफ्नो जग्गा फुत्काएर सम्पर्क बिहीन बनेको भन्दै जालसाजी र ठगी मुद्दा दिएका थिए । सोही जाहेरीका आधारमा उनी पक्राउ परेकी थिइन् ।

यो पनि पढ्नुस् :

बाँचुन्जेल साथ दिन्छु भन्दै ३८ वर्षीया महिलाले सम्पत्ती नाममा गराउँदा.....

प्रकाशित मिति: सोमबार, फागुन २९, २०७९ २०:५८

प्रतिक्रिया दिनुहोस्