नेपालगन्ज : अनौपचारिक क्षेत्र सेवा केन्द्र (इन्सेक)का अध्यक्ष डा. कुन्दन अर्यालले तत्कालिन माओवादी सशस्त्र द्धन्द्धरत पक्ष जवाफदेही बन्नुपर्ने बताएका छन् ।
इन्सेक लुम्बिनी प्रदेश कार्यालय नेपालगन्जले मंगलबार आयोजना गरेको मानव अधिकार तथा मानवीय अवस्था विषयक अन्तरक्रिया कार्यक्रमलाई सम्बोधन गर्दै उनले द्धन्द्धरत पक्ष जवाफदेही बन्न नसक्दा पटक पटक यो विषय उठ्ने गरेको बताए ।
‘कुनै न कुनै हिसाबले जवाफदेही बन्नुपर्छ, त्यो बेलामा यस्तो भएको थियो, यस्तो थियो भनेर जवाफदेही बन्नुपर्छ,’ उनले भने ‘पीडित पक्षले त्यही जवाफदेहिताको खोजी गरेको हो, पीडितको मागलाई सम्बोधन गरेर समाधान गर्नुपर्छ ।’
द्धन्द्ध पीडितहरु अत्यन्त निराश भएपछि स्वभाविक रुपले न्यायका लागि अदालत जाने र त्यसपछि विधेयक ब्युझिने अध्यक्ष अर्याल बताउँछन् । ‘तत्कालिन समयको बिद्रोही पक्ष माओवादी र सत्ताधारी पक्ष जो सुकैले पनि यसलाई अन्यथा मान्नु हुदैन,’ उनले थपे ।
माओवादीको सशस्त्र द्धन्द्ध हुनुमा विभेद, अन्याय, अत्याचार र देशको कुशासन भएको तर्क गरे । माओवादी द्धन्द्धलाई प्रतिशोधले अगाडी बढाउन नहुने सुझाव दिदै अध्यक्ष अर्यालले भने, ‘अब त्यस्तो प्रतिशोधले अगाडी बढाएर हुदैन, ज्यानको बदला ज्यान लिन खोजेर हुदैन, एउटा काल खण्डमा बिद्रोह जन्मियो, हाम्रै कालखण्डमा त्यसलाई टुंग्याउन सकियो भने हाम्रै देशको ईज्जत जोगिन्छ ।’
इन्सेक लुम्बिनी प्रदेश प्रमुख भोला महतको अध्यक्षतामा सम्पन्न उक्त कार्यक्रममा बाँकेका प्रमुख जिल्ला अधिकारी विपिन आचार्य, बाँकेका प्रहरी प्रमुख (एसपी) सन्तोषसिंह राठौंर, मानव अधिकारकर्मी, द्धन्द्ध पीडित, सञ्चारकर्मी लगायतको सहभागिता रहेको थियो ।
