बाँके(नरैनापुर) : नरैनापुर गाँउपालिमा राष्ट्रिय परिचय पत्रको विवरण संकलन गर्ने अभियान सुरु भएको छ । उक्त सुविधा वडाबाटै प्राप्त गरेपछि नरैनापुरबासी निकै उत्साहित भएका छन् ।
पहिलो चरणमा नरैनापुर गाउँपालिकाको वडा नम्बर १, २, ३ र ५ मा वडास्तरीय घुम्ती शिविर आयोजना गरी विवरण लिने काम सुरु गरिएको प्रमुख प्रशासकिय अधिकृत मणिराम खरालले बताए ।
राष्ट्रिय परिचय पत्रको विवरण संकलनका लागि आवश्यक उपकरण र जनशक्ति व्यवस्थापन गरी पहिलो चरणमा चारवटा वडाबाट अभियान सुरु गरिएको बताउँदै उनले प्रत्येक वडामा दुईवटा स्टेशन रहने गरी ८ वटा स्टेसनमार्फत विवरण संकलन गर्ने कार्य जारी रहेको जानकारी दिए ।
गाउँपालिकाभित्र सुरु भएको राष्ट्रिय परिचयपत्रको विवरण संकलन केन्द्रको अनुगमन गर्दै गाउँपालिका अध्यक्ष इश्तिायक अहमद शाहले अबको युग प्रविधिमैत्री भएकाले सबैले परिचयपत्र प्राप्त गर्नुपर्ने बताए । अध्यक्ष शाहले परिचयपत्र वितरण तथा तथ्यांक संकलनको कामलाई थप प्रभाकारी बनाउन प्रमुख जिल्ला अधिकारीको ध्यानाकर्षण गराए ।
यूवा भन्दा बृद्ध बृद्धाहरु राष्ट्रिय परिचयपत्र बनाउनका लागि लाइनमा बसेको देखेपछि अध्यक्ष शाहले नरैनापुरबासीको सहजताका लागि वडा परिसरमा थप स्टेशन बनाएर परिचपत्रको कामलाई बढाउन तयार रहेको उल्लेख गरे ।
राष्ट्रिय परिचय पत्र नागरिकको बैयक्तिक तथा जैविक विवरण समावेश गरी बायोमेटिक सुबिधायुक्त प्रमाणपत्र भएको बताउँदै अध्यक्ष शाहले विवरण दर्ता गराउन नरैनापुरबासी सँग अपिल गरे ।
नरैनापुर गाउँपालिका वडा नम्बर ५ का वडा सचिव भरत महत्तोले सबै नेपाली नागरिकको बैयक्तिक तथा जैविक विवरणलाई केन्द्रीकृत रूपमा भण्डारण सहित सबै परिचय खुल्ने र नदोहोरिने गरी बहुउपयोगी राष्ट्रिय परिचय पत्र नम्बर प्रदान गर्ने संघीय सरकारको उद्देश्य अनुरूप विवरण संकलन भइरहेको बताए ।
दैनिक ८० देखि १ सय जनाको विवरण संकलन भईरहेको जानकारी दिदै उनले विवरण दर्ता गराउनेहरुको संख्या बढ्दै गएको बताए । नरैनापुर गाउँपालिका वडा नम्बर २ का सचिव एवं गाउँपालिकाका सूचना अधिकारी लक्ष्मीकान्त मिश्रले सरकारले पछिल्लो समय सबै नागरिकका लागि राष्ट्रिय परिचय पत्र अनिवार्य गर्न लागेकाले अभियानका क्रममा वडा तथा टोलमै शिविर आयोजना गरिएकोले सम्पूर्ण नरैनापुरबासीलाई सम्बन्धित वडामा गएर आफनो विवरण दर्ता गराउन आग्रह गरे ।
नरैनापुर-५ की ६२ वर्षिय महेशा यादवले वडा स्तरबाट राष्ट्रिय परिचय पत्रको विवरण संकलन सुरु भएपछि आफु जस्तो बृद्धाका लागि धेरै सहज भएको बताइन् । आफ्नो वडामा रहेका बृद्ध बृद्धालाई नेपालगन्ज गएर राष्ट्रिय परिचय पत्रको विवरण दर्ता गराउन धेरै महंगो र दुःखदायी रहेकोमा वडाबाटै उक्त सेवा लिन पाएपछि खुशी लागेको प्रतिक्रिया दिइन् ।
स्मरण रहोस् नरैनापुरमा इलाका प्रशासन कार्यालय स्थापनाका लागि गाउँपालिकाले पटक–पटक प्रयास गरेपनि जिल्ला प्रशासन कार्यालय बाँकेले हाल सम्म स्थापना गर्न सकेको छैन् । गाउँपालिकामा सुरु भएको उक्त अभियान एक महिनाभित्र सम्पन्न गर्ने लक्ष्य रहेको विवरण संकलन गरिरहेका राष्ट्रिय परिचय पत्र तथा पञ्जिकरण विभागका प्राविधिक रामबहादुर ओलीले बताएका छन् ।
विवरण संकलनका लागि नेपाली नागरिकता अनिवार्य भएको र त्यसको विकल्पमा राहदानी वा शैक्षिक प्रमाणपत्र पनि पेश गर्न सकिने विभागले जनाएको छ । जिल्ला प्रशासनमा विवरण संकलन गर्दा तत्कालै परिचय पत्र नम्बर उपलब्ध हुने भएपनि अभियानका क्रममा भने विवरण पेश गरेको कम्तीमा १५ दिनपछि मात्रै नम्बर उपलब्ध हुने बताइएको छ ।
